Read Maltese Bible with DC – IL-BIBBJA IL-KOTBA MQADDSA ĠOŻWÈ 18 Bible Online

ĠOŻWÈ 18 - Maltese Bible with DC – IL-BIBBJA IL-KOTBA MQADDSA bible

ĠOŻWÈ 18

¹Il-ġemgħa kollha ta’ Iżrael iltaqgħet u waqqfu t-tinda tal-laqgħa f’Silo. L-art kienet taħt il-ħakma tagħhom;

²iżda kien għad baqa’ seba’ tribujiet fost ulied Iżrael li ma kinux għadhom ħadu l-wirt tagħhom.

³Ġożwè qal lil ulied Iżrael: “Kemm se ddumu titnikkru biex tmorru tieħdu l-art li takom il-Mulej, Alla ta’ missirijietkom?

⁴Ġibu tlitt irġiel minn kull tribù u jien nibgħathom, u jmorru jduru l-art u jħożżuha fi ktieb, u jqassmuha skont l-ishma tagħhom, u jiġu għandi.

⁵Imbagħad iqassmuha f’seba’ oqsma. Ġuda jibqa’ f’artu n-naħa tan-Nofsinhar u dar Ġużeppi tibqa’ f’artha fit-Tramuntana.

⁶U intom tħożżu l-art f’seba’ oqsma, u ġibuhomli hawn u jien intellgħalkom ix-xorti hawn, quddiem il-Mulej, Alla tagħna.

⁷Il-Leviti ma għandhomx sehem f’nofskom għaliex is-saċerdozju tal-Mulej hu sehemhom. Gad u Ruben u nofs it-tribù ta’ Manassi diġà ħadu sehemhom in-naħa l-oħra tal-Ġordan, fil-Lvant, li tahom Mosè, il-qaddej tal-Mulej.”

⁸U dawk l-irġiel qabdu u marru, u Ġożwè ordna lil dawk li marru jħożżu l-art fi ktieb u qalilhom: “Morru u duru l-art, u ħożżuha fuq ktieb, u erġgħu ejjew għandi, imbagħad jien intellgħalkom ix-xorti hawn f’Silo quddiem il-Mulej.”

⁹U l-irġiel marru u daru mal-art u niżżlu kollox fi ktieb, belt belt, f’seba’ oqsma. U marru għand Ġożwè fil-kamp f’Silo.

¹⁰U Ġożwè tellgħalhom ix-xorti f’Silo quddiem il-Mulej, u hemm qassam l-art lil ulied Iżrael skont l-oqsma tagħhom.

¹¹U telgħet ix-xorti tat-tribù ta’ Benjamin skont il-familji tagħhom, u messhom sehem bejn ulied Ġuda u wlied Ġużeppi.

¹²Il-limiti tagħhom kienu jibdew fit-Tramuntana mill-Ġordan, u jibqgħu sejrin lejn il-ġnub ta’ Ġeriko, in-naħa tat-Tramuntana, u jitilgħu fuq il-muntanji fil-Punent u jispiċċaw fid-deżert ta’ Bet-awen.

¹³U minn hemm kienu jaqsmu għan-naħa tan-Nofsinhar għal ħdejn Luż, taħt ir-riħ ta’ Luż, jiġifieri Betel, u minn hemm kienu jinżlu għal Għatarot-addar għal fuq il-muntanja min-naħa t’isfel li tiġi biswit Betħoron t’isfel.

¹⁴Imbagħad il-limiti kienu jinżlu u jduru ’l isfel għal ġenb il-baħar mill-muntanja quddiem Betħoron ’l isfel u jispiċċaw f’Kirjat-bagħal - li hi Kirjat-ġegħarim - belt ta’ wlied Ġuda. Din kienet in-naħa tal-Punent.

¹⁵Il-limiti tan-Nofsinhar kienu jibdew minn tarf Kirjat-ġegħarim u jieħdu lejn Efron, lejn l-għajn tal-ilma ta’ Neftuħa.

¹⁶U mbagħad jinżlu lejn tarf il-muntanji biswit il-wied ta’ Benħinnom, fil-wita ta’ Refajin fit-Tramuntana; jinżlu minn wied Ħinnom ’l isfel lejn in-naħa tal-Ġebusin, u jieħdu lejn Għajn-rogel.

¹⁷Imbagħad jilwu lejn it-Tramuntana, jgħaddu minn Għajn-xemex u jiġbdu lejn l-inħawi ta’ Gelilot, biswit it-telgħa ta’ Adummim, u jinżlu lejn il-blata ta’ Boħan bin Ruben.

¹⁸Imbagħad jgħaddu mill-ġenb biswit l-Għaraba;

¹⁹jgħaddu mill-ġenb ta’ Bet-ħogla lejn it-Tramuntana u jispiċċaw fl-ilsien tat-Tramuntana tal-Baħar il-Mielaħ, fit-tarf tan-Nofsinhar tal-Ġordan. Dawn huma l-limiti tan-Nofsinhar.

²⁰Fuq in-naħa tal-Lvant il-limiti kienu l-Ġordan. Dan hu sehem Benjamin bil-limiti tiegħu dawramejt, skont il-familji tagħhom.

²¹L-ibliet tat-tribù ta’ Benjamin skont il-familji tagħhom kienu: Ġeriko, Bet-ħogla, Għemek-kesis,

²²Bet-għaraba, Semarajm, Betel,

²³Għawwim, Para, Għofra,

²⁴Kefar-għammoni, Għofni, Geba; tnax-il belt bl-irħula tagħhom.

²⁵Gibgħon, Rama, Birot,

²⁶Misfe, Kefira, Mosa,

²⁷Rekem, Irfel, Tarala,

²⁸Sela, Elef, Ġebus, li hi Ġerusalemm, Gibgħat, Kirjat; erbatax-il belt bl-irħula tagħhom. Dan hu sehem Benjamin skont il-familji tagħhom.