Read Maltese Bible with DC – IL-BIBBJA IL-KOTBA MQADDSA ĠOŻWÈ 19 Bible Online

ĠOŻWÈ 19 - Maltese Bible with DC – IL-BIBBJA IL-KOTBA MQADDSA bible

ĠOŻWÈ 19

¹Imbagħad telgħet ix-xorti għal Simgħon, għat-tribù ta’ wlied Simgħon skont il-familji tagħhom. Sehemhom kien f’nofs sehem ulied Ġuda.

²Fil-qasam tagħhom kellhom: Birsaba, Seba, Molada,

³Ħasar-sugħal, Bala, Għesem,

⁴Eltolad, Betul, Ħorma,

⁵Siklag, Bet-markabot, Ħasar-susa,

⁶Bet-lebawt, Saruħen, tlittax-il belt bl-irħula tagħhom.

⁷Għajn-Rimmon, Għeter u Għasan; erbat ibliet u l-irħula tagħhom,

⁸u l-irħula kollha ta’ madwar dawn l-ibliet sa Bagħlat-bir, li hi Rama fin-Nofsinhar. Dan hu sehem it-tribù ta’ wlied Simgħon skont il-familji tagħhom.

⁹Sehem ulied Simgħon ittieħed minn sehem ulied Ġuda; għax kien sehem ulied Ġuda kbir wisq għalihom, u għalhekk ulied Simgħon ħadu sehem f’nofs il-qasam tagħhom.

¹⁰Telgħet it-tielet xorti għal ulied Żebulun skont il-familji tagħhom, u l-medda ta’ sehemhom kienet tieħu sa Xarid.

¹¹Il-limiti kienu jitilgħu lejn il-Punent lejn Margħala, jaslu sa Dabbeset u jaslu sal-wied in-naħa tal-Lvant ta’ Ġoknegħam.

¹²Minn Xarid kienu jduru lejn il-Lvant, lejn tlugħ ix-xemx, sal-limiti ta’ Kislot-tabor, u jieħdu lejn Dabrat, u jitilgħu lejn Ġafigħa.

¹³Minn hemm jgħaddu lejn il-Lvant, lejn tlugħ ix-xemx sa Gat-ħefer, Għitta-kasin, jiġbdu lejn Rimmon u jilwu lejn Negħa;

¹⁴iduru mat-Tramuntana ta’ Ħannaton, u jibqgħu sejrin sal-wied ta’ Iftaħel.

¹⁵Kattat, Naħalal, Simron, Idla, Betlehem; tnax-il belt bl-irħula tagħhom.

¹⁶Dan kien sehem ulied Żebulun skont il-familji tagħhom: dawn l-ibliet bl-irħula tagħhom.

¹⁷Għal Issakar telgħet ir-raba’ xorti, għal ulied Issakar skont il-familji tagħhom.

¹⁸Fil-limiti tagħhom kien hemm Ġisragħel, Kesulot, Sunem,

¹⁹Ħafarajm, Siħon, Anaħarat,

²⁰Rabbit, Kisjan, Għabes,

²¹Ramet, Għajn-gannim, Għajn-ħadda, Bet-passes;

²²il-limiti tagħhom kienu jwasslu sat-Tabor, Saħasima, Betxemex u jispiċċaw fil-Ġordan; sittax-il belt bl-irħula tagħhom.

²³Dan hu sehem it-tribù ta’ wlied Issakar skont il-familji tagħhom; dawn l-ibliet bl-irħula tagħhom.

²⁴Telgħet il-ħames xorti għat-tribù ta’ wlied Aser skont il-familji tagħhom.

²⁵Il-limiti tagħhom kien fihom: Ħelkat, Ħali, Beten, Aksaf,

²⁶Alammelek, Għamgħad, Misal u kienu jilħqu l-Karmel in-naħa tal-Punent u Siħor-libnat;

²⁷imbagħad iduru għan-naħa ta’ tlugħ ix-xemx lejn Betdagon, u jmissu ma’ Żebulun u l-wied ta’ Iftaħel, fit-Tramuntana Bet-għemek u Negħijel, u jaslu sa Kabul fit-Tramuntana,

²⁸Għebron, Reħob, Ħammon, Kana, sa Sidon il-Kbira.

²⁹Iduru lejn Rama sal-belt ta’ Tir imdawra bis-swar; iduru lejn Ħosa u jispiċċaw f’xifer il-baħar; Maħleb, Akżib,

³⁰Għumma, Afek, Reħob - tnejn u għoxrin belt bl-irħula tagħhom.

³¹Dan kien sehem ulied Aser skont il-familji tagħhom; dawn l-ibliet bl-irħula tagħhom.

³²Għal Naftali mbagħad telgħet is-sitt xorti, għal ulied Naftali skont il-familji tagħhom.

³³Il-limiti ta’ sehemhom kienu minn Ħelef, mill-Balluta f’Sagħnannim u Adam-nekeb u Ġabnel sa Lakkum u jaslu sal-Ġordan.

³⁴Imbagħad iduru lejn il-Punent lejn Ażnot-tabor u jieħdu minn hemm lejn Ħukkok; u jilħqu Żebulun fin-Nofsinhar, u jmissu lil Aser min-naħa tal-Punent u lil Ġuda min-naħa tal-Ġordan minn tlugħ ix-xemx.

³⁵Kellhom dawn l-ibliet bis-swar: Siddim, Ser, Ħammat, Rakkat, Kinneret,

³⁶Adama, Rama, Ħasor,

³⁷Kedes, Edregħi, Għajn-ħasor,

³⁸Ġeron, Migdal-el, Ħorem, Bet-għanat, Betxemex - dsatax-il belt bl-irħula tagħhom.

³⁹Dan hu sehem it-tribù ta’ wlied Naftali skont il-familji tagħhom: l-ibliet bl-irħula tagħhom.

⁴⁰Telgħet is-seba’ xorti għal ulied Dan skont il-familji tagħhom.

⁴¹Il-limiti ta’ sehemhom kienu dawn: Sorgħa, Estawl, Għir-xemex,

⁴²Sagħlabbin, Ajjalon, Ġetla,

⁴³Elon, Timna, Għekron,

⁴⁴Elteki, Gibbeton, Bagħalat,

⁴⁵Ġehud, Bene-berak, Gat-rimmon;

⁴⁶u fuq il-Punent il-limiti kienu f’Mirjakon biswit Ġaffa.

⁴⁷Imma l-art ta’ wlied Dan ma baqgħetx għandhom, għalhekk ulied Dan telgħu u ħabtu għal Lesem, u rebħuha, u għaddewha minn xifer ix-xabla, ħaduha f’idejhom, u bdew jgħammru fiha, u semmewha Dan għal isem missierhom.

⁴⁸Dan huwa sehem ulied Dan skont il-familji tagħhom: dawn l-ibliet bl-irħula tagħhom.

⁴⁹Meta spiċċaw iqassmu l-art, kull sehem bil-limiti tiegħu, ulied Iżrael taw sehem lil Ġożwè bin Nun f’nofshom.

⁵⁰Skont ma kien qalilhom il-Mulej tawh il-belt li talabhom, jiġifieri Timnat-seraħ fuq il-muntanji ta’ Efrajm, u bena l-belt, u beda jgħammar fiha.

⁵¹Dawn huma l-ishma li qassmu bix-xorti Elgħażar il-qassis, u Ġożwè bin Nun, u l-kapijiet tal-familji ta’ wlied Iżrael f’Silo quddiem il-Mulej, f’bieb it-tinda tal-laqgħa. Hekk temmew t-tqassim tal-art.