Read Maltese Bible with DC – IL-BIBBJA IL-KOTBA MQADDSA ĠOŻWÈ 2 Bible Online

ĠOŻWÈ 2 - Maltese Bible with DC – IL-BIBBJA IL-KOTBA MQADDSA bible

ĠOŻWÈ 2

¹Ġożwè bin Nun bagħat bil-moħbi minn Sittim żewġt irġiel jitkixxfu l-art u qalilhom: “Morru u araw l-art u ’l Ġeriko.” U telqu u daħlu f’dar ta’ mara żienja, jisimha Raħab, u raqdu hemm.

²U għarrfu lis-sultan ta’ Ġeriko u qalulu: “Ara, dal-lejl daħlu hawn xi rġiel minn ulied Iżrael biex jitkixxfu l-art.”

³U s-sultan ta’ Ġeriko bagħat jgħid lil Raħab: “Oħroġ ’il barra l-irġiel li ġew għandek f’darek, għax dawk ġew biex jitkixxfu l-art kollha.”

⁴U l-mara, li kienet ħadet iż-żewġt irġiel u ħbiethom, wieġbet: “Iva, ġew għandi rġiel u ma kontx naf mnejn ġew;

⁵imma meta wasal biex jidlam u jingħalaq il-bieb l-irġiel ħarġu, bla ma jien naf fejn marru. Itilqu malajr għal warajhom u tilħquhom.”

⁶Hi kienet tellgħethom fuq il-bejt, u ħbiethom qalb il-ħatab tal-kittien, li kellha maħżun fuq il-bejt.

⁷U l-oħrajn marru għal warajhom matul it-triq tal-Ġordan sal-mogħdija fuq ix-xmara; u l-bieb sakkruh warajhom.

⁸Qabel ma raqdu, Raħab telgħet ħdejhom fuq il-bejt

⁹u qaltilhom: “Jien naf li l-Mulej takom f’idejkom din l-art, għax aħna lkoll imbeżżgħin minnkom; in-nies li jgħammru f’din l-art kollha mwerwrin minħabba fikom.

¹⁰Għax smajna kif il-Mulej nixxef l-ilma tal-Baħar tal-Qasab minn quddiemkom meta ħriġtu mill-Eġittu, u x’għamlu liż-żewġ slaten tal-Amurrin, li hemm lil hemm mill-Ġordan, Siħon u Għog, kif qridtuhom.

¹¹Malli smajna qalbna nħallet u ma baqgħet ebda ruħ f’ħadd minna minħabba fikom. Tassew li l-Mulej, Alla tagħkom, hu Alla fis-sema minn fuq u fuq l-art minn taħt.

¹²Issa, mela, aħilfuli bil-Mulej li kif jiena ġibt ruħi sewwa magħkom, hekk intom iġġibu ruħkom sewwa ma’ dar missieri, u tagħtuni sinjal żgur

¹³li tħallu ħajjin lil missieri u lil ommi u ’l ħuti, subien u bniet, u kulma għandhom, u teħilsuna mill-mewt.”

¹⁴L-irġiel weġbuha: “Nagħmlulkom tajjeb b’ħajjitna, jekk ma tikxfux din il-biċċa tagħna. Meta l-Mulej jagħtina l-art aħna nżommu l-kelma li tajniek, u nuruk ħniena.”

¹⁵U niżżlithom b’ħabel mit-tieqa, għax darha, fejn kienet tgħammar, kienet mal-ħajt tas-sur,

¹⁶u qaltilhom: “Morru lejn l-għoljiet, biex ma jiltaqgħux magħkom dawk li ħarġu għalikom. Inħbew hemm għal tlitt ijiem sakemm jerġgħu lura; imbagħad morru għal triqtkom.”

¹⁷U l-irġiel qalulha: “Aħna nkunu maħlulin minn din il-ħalfa tiegħek li ġegħeltna naħilfu,

¹⁸kemm-il darba meta aħna nidħlu fl-art ma ddendilx dan ir-rumnel aħmar mat-tieqa, li minnha niżżiltna, u ma tiġborx għandek f’darek lil missierek u ’l ommok u ’l ħutek u ’l dar missierek kollha.

¹⁹U kull min joħroġ ’il barra minn bieb darek, iħallas b’demmu u aħna ma nkunux ħatja. Kull min ikun għandek f’darek, inħallsu għalih aħna b’demmna, jekk xi ħadd imidd idu fuqu.

²⁰Jekk inti mbagħad tikxef din il-biċċa tagħna, aħna nkunu maħlula minn din il-ħalfa li ġegħeltna naħilfu.”

²¹U hi wieġbet: “Hekk ikun, bħalma għedtuli.” U ħalliethom imorru, u telqu; u hi dendlet ir-rumnell aħmar mit-tieqa għal mal-ħajt.

²²Telqu u marru lejn l-għoljiet, u baqgħu hemm moħbija għal tlitt ijiem sakemm reġgħu lura dawk li ħarġu jfittxuhom, u dawn fittxew it-triq kollha, u ma sabuhomx.

²³Imbagħad iż-żewġt irġiel reġgħu lura, niżlu mill-għoljiet, qasmu l-Ġordan, u marru għand Ġożwè bin Nun, u qalulu kulma ġralhom.

²⁴U lil Ġożwè qalulu: “Tassew li l-Mulej tana f’idejna l-art kollha, għax in-nies kollha tal-pajjiż qalbhom inħallet minħabba fina.”