Read Maltese Bible with DC – IL-BIBBJA IL-KOTBA MQADDSA ĠOŻWÈ 20 Bible Online

ĠOŻWÈ 20 - Maltese Bible with DC – IL-BIBBJA IL-KOTBA MQADDSA bible

ĠOŻWÈ 20

¹Il-Mulej kellem lil Ġożwè u qallu:

²“Għid lil ulied Iżrael: Agħżlu għalikom l-ibliet tal-kenn[19] skont ma għedtilkom permezz ta’ Mosè,

³biex jistkenn fihom il-qattiel li jkun darab lil xi ħadd bi żball u bla ma ried, u jkunu għalikom ta’ kenn mill-vendetta ta’ qarib il-mejjet.

⁴Hu jaħrab lejn waħda minn dawn l-ibliet, u jieqaf fid-daħla ta’ bieb il-belt, u jgħid li jisimgħuh ix-xjuħ tal-belt kulma jkun ġralu. Imbagħad iżommuh għandhom fil-belt u jagħtuh xi mkien fejn joqgħod magħhom.

⁵U jekk min għandu d-dritt tal-vendetta jagħmel għal warajh, ma għandhomx jitilqulu l-qattiel f’idejh, għax ikun darab lil għajru bla ma ried, bla ma kien jobogħdu minn qabel.

⁶U jibqa’ f’dik il-belt sakemm jidher quddiem il-ġemgħa għall-ġudizzju, sal-mewt tal-qassis il-kbir li jkun f’dak iż-żmien, imbagħad il-qattiel jerġa’ lura lejn daru fil-belt tiegħu, il-belt li jkun ħarab minnha.”

⁷U għażlu lil Kedes fil-Galilija, fil-muntanji ta’ Naftali; u Sikem fil-muntanji ta’ Efrajm; u Kirjat-arba, jiġifieri Ħebron, fil-muntanji ta’ Ġuda.

⁸In-naħa l-oħra tal-Ġordan, imbagħad, fuq il-Lvant ta’ Ġeriko, għażlu lil Beser fid-deżert, fil-wita tat-tribù ta’ Ruben; u Ramot f’Gilgħad tat-tribù ta’ Gad; u ’l Golan f’Basan tat-tribù ta’ Manassi.

⁹Dawn kienu l-ibliet li ngħataw lil ulied Iżrael kollha u lill-barrani li jkun jgħammar f’nofshom biex fihom jistkenn kull min ikun darab lil xi ħadd bi żball, u hekk ma jmutx b’id min ikollu d-dritt tal-vendetta, sakemm jidher quddiem il-ġemgħa.