Read Maltese Bible with DC – IL-BIBBJA IL-KOTBA MQADDSA ĠOŻWÈ 22 Bible Online

ĠOŻWÈ 22 - Maltese Bible with DC – IL-BIBBJA IL-KOTBA MQADDSA bible

ĠOŻWÈ 22

¹Imbagħad Ġożwè sejjaħ lir-Rubenin u lill-Gadin u lin-nofs it-tribù ta’ Manassi.

²U qalilhom: “Intom ħaristu kulma ordnalkom Mosè, il-qaddej tal-Mulej, u smajtu kliemi f’kulma ordnajtilkom.

³Ma ħallejtux lil ħutkom f’dan iż-żmien kollu sal-lum, u ħaristu bir-reqqa kulma ordnalkom Alla tagħkom, il-Mulej.

⁴Issa li l-Mulej, Alla tagħkom, ta l-mistrieħ lil ħutkom bħalma kien wegħedhom, dawru wiċċkom u morru lejn it-tined tagħkom fl-art tal-wirt tagħkom li takom Mosè, il-qaddej tal-Mulej, in-naħa l-oħra tal-Ġordan.

⁵Biss qisu sewwa li tagħmlu l-ordnijiet u l-liġijiet li ordnalkom Mosè, il-qaddej tal-Mulej; li tħobbu l-Mulej, Alla tagħkom, u li timxu fit-toroq kollha tiegħu, u li tħarsu l-ordnijiet tiegħu, u li tintrabtu miegħu, u taqduh b’qalbkom kollha u b’ruħkom kollha.”

⁶U Ġożwè berikhom u bagħathom; u huma telqu lejn it-tined tagħhom.

⁷Lil nofs it-tribù ta’ Manassi Mosè tahom sehem f’Basan, lin-nofs l-ieħor Ġożwè tahom sehem ma’ ħuthom in-naħa l-oħra tal-Ġordan lejn il-Punent. Hu u jibgħathom lejn it-tined tagħhom Ġożwè ssokta jberikhom u jgħidilhom:

⁸“Erġgħu lura lejn it-tined tagħkom mimlijin bil-ġid u b’imrieħel kbar, b’fidda, b’deheb, bi bronż, u b’ħadid, b’ilbiesi bil-kotra; aqsmu l-priża tal-għedewwa tagħkom ma’ ħutkom.”

⁹U reġgħu lura u telqu wlied Ruben, u wlied Gad u nofs it-tribù ta’ Manassi mingħand ulied Iżrael, minn Silo, li hi f’art Kangħan, biex imorru fl-art ta’ Gilgħad, li hi sehemhom u ħaduhom skont ma kien qal il-Mulej permezz ta’ Mosè.

¹⁰Kif waslu fl-inħawi tal-Ġordan fl-art ta’ Kangħan, bnew hemm ulied Ruben, u wlied Gad u nofs it-tribù ta’ Manassi, artal ħdejn il-Ġordan, artal kbir li jidher.

¹¹U semgħu wlied Iżrael min jgħid: “Araw, ulied Ruben, ulied Gad u nofs it-tribù ta’ Manassi, bnew artal biswit art Kangħan[20] fl-inħawi tal-Ġordan, in-naħa ta’ wlied Iżrael.”

¹²U semgħu wlied Iżrael u nġemgħet il-kotra kollha ta’ wlied Iżrael f’Silo, biex jitilgħu jaħbtu għalihom.

¹³U wlied Iżrael bagħtu għandu wlied Ruben u wlied Gad u nofs it-tribù ta’ Manassi fl-art ta’ Gilgħad, lil Fineħas bin Elgħażar il-qassis;

¹⁴u miegħu għaxar prinċpijiet, prinċep għal kull tribù ta’ Iżrael, kull wieħed kap tal-familja tiegħu fil-qtajja’ ta’ Iżrael.

¹⁵U ġew għand ulied Ruben u wlied Gad u nofs it-tribù ta’ Manassi fl-art ta’ Gilgħad, u kellmuhom u qalulhom:

¹⁶“Dan hu li tgħidilkom il-ġemgħa kollha tal-Mulej: ‘X’ħażen hu dan li għamiltu lil Alla ta’ Iżrael, li warrabtu llum minn wara l-Mulej, bnejtu għalikom artal, u xxewwixtu llum kontra l-Mulej?

¹⁷Forsi kienet ħaġa żgħira għalina d-dnub ta’ Pegħor li minnu għadna ma ssaffejniex sal-lum, minkejja l-qerda li waqgħet fuq il-poplu tal-Mulej, biex issa intom terġgħu twarrbu minn wara l-Mulej?

¹⁸Jekk intom illum terġgħu lura minn wara l-Mulej u tqumu llum kontra l-Mulej, għada jinkorla għall-ġemgħa kollha ta’ Iżrael.

¹⁹Jekk sehemkom hi art imniġġsa, aqsmu għall-art li hi tal-Mulej fejn hemm it-tabernaklu tal-Mulej, u għammru fostna; imma tqumux kontra l-Mulej, u tqumux kontra tagħna u tibnu għalikom artal barra mill-artal tal-Mulej, Alla tagħna.

²⁰Ma naqasx forsi Għakan bin Żeraħ fil-ħwejjeġ tal-interdett? Ma xegħlitx il-qilla tal-Mulej għal Iżrael kollu? U ma kienx waħdu li miet għal ħtijietu[21].’ ”

²¹U wlied Ruben u wlied Gad u nofs it-tribù ta’ Manassi wieġbu lill-prinċpijiet tal-eluf ta’ Iżrael:

²²“Alla fuq l-allat il-Mulej[22]! Alla fuq l-allat il-Mulej! Hu jaf, u Iżrael jaf ukoll: jekk dan għamilnieh illum b’tixwix jew b’nuqqas lejn il-Mulej, la taħfirhilniex illum,

²³li aħna morna nibnu artal għalina biex inwarrbu minn wara l-Mulej! Ħa jħallasna l-Mulej innifsu jekk aħna għamilnieh biex noffru s-sagrifiċċju tal-ħruq, u offerti tal-qmuħ u nagħmlu fuqu s-sagrifiċċji tas-sliem.

²⁴Aħna għamilnieh għax bżajna u għedna: Għada għad jistaqsu wliedkom lil uliedna u jgħidulhom: ‘X’għandkom x’taqsmu mal-Mulej ta’ Iżrael intom?

²⁵Il-Mulej għamel il-Ġordan fruntiera bejnna u bejnkom, ulied Ruben u wlied Gad: intom ma għandkomx sehem fil-Mulej’ u hekk ibiegħdu wliedkom lil uliedna mill-biża’ tal-Mulej’.

²⁶Għalhekk għedna: ‘Ħa nagħmlu għalina u nibnu artal, mhux għas-sagrifiċċji tal-ħruq u l-vittmi

²⁷imma bħala xhieda bejnna u bejnkom, u bejn in-nisel tagħna u n-nisel tagħkom, li jiġi warajna, li aħna nqimu sewwa lill-Mulej fil-preżenza tiegħu bis-sagrifiċċji tal-ħruq tagħna, bil-vittmi tas-sliem, u ma jgħidux għada wliedkom lil uliedna: ‘Ma għandkomx sehem fil-Mulej’.

²⁸Għalhekk għedna: ‘Jekk għada jistaqsu lilna jew lil nisilna ngħidulhom: Araw il-mudell tal-artal tal-Mulej li għamlu missirijietna, mhux għas-sagrifiċċji tal-ħruq jew għall-vittmi, imma b’xhieda bejnna u bejnkom[23].’

²⁹Ma jkun qatt minna li nqumu kontra l-Mulej, u nwarrbu minn wara l-Mulej u nibnu artal għas-sagrifiċċji tal-ħruq, għall-offerti tal-qmuħ u għall-vittmi, barra mill-artal tal-Mulej, Alla tagħna, li hemm quddiem it-tabernaklu tiegħu.”

³⁰Fineħas il-qassis, u l-prinċpijiet tal-ġemgħa, u l-kapijiet tal-eluf ta’ Iżrael li kienu miegħu, semgħu l-kliem li qalu wlied Ruben u wlied Gad u wlied Manassi, u għoġobhom.

³¹U Fineħas bin Elgħażar wieġeb lil ulied Ruben u wlied Gad u wlied Manassi: “Illum għarafna li l-Mulej huwa fostna għaliex intom ma qomtux kontra l-Mulej b’dan li għamiltu. Issa intom ħlistu lil ulied Iżrael minn id il-Mulej.”

³²U Fineħas bin Elgħażar il-qassis, u l-prinċpijiet, reġgħu lura mingħand ulied Ruben u wlied Gad mill-art ta’ Gilgħad għall-art ta’ Kangħan għand ulied Iżrael u tawhom l-aħbar.

³³U wlied Iżrael għoġbithom din il-ħaġa u bierku lil Alla wlied Iżrael; u ma baqgħux jgħidu li jridu jitilgħu jaħbtu għalihom, u jħarbtu l-art li fiha jgħammru wlied Ruben u wlied Gad.

³⁴U wlied Ruben u wlied Gad semmew l-artal Għed, xhieda, għaliex qalu: “Xhieda hu bejnietna li l-Mulej hu Alla.”