Read Maltese Bible with DC – IL-BIBBJA IL-KOTBA MQADDSA ĠOŻWÈ 23 Bible Online

ĠOŻWÈ 23 - Maltese Bible with DC – IL-BIBBJA IL-KOTBA MQADDSA bible

ĠOŻWÈ 23

¹U ġara li kien għadda ħafna żmien minn mindu l-Mulej kien ta l-mistrieħ lil Iżrael mill-għedewwa kollha tagħhom ta’ madwarhom, u Ġożwè kien xiħ u mdaħħal fiż-żmien

²meta sejjaħ lil Iżrael kollu, lix-xjuħ tiegħu, u ’l-kapijiet u lill-imħallfin u ’l-uffiċjali tiegħu u qalilhom: “Arawni, jien xiħ imdaħħal fiż-żmien.

³Intom rajtu kulma għamel quddiemkom lil dawn il-ġnus kollha l-Mulej, Alla tagħkom; għax il-Mulej, Alla tagħkom, hu li kien jitqabad għalikom.

⁴Araw, jien qassamtilkom b’wirt lit-tribujiet tagħkom dawn il-ġnus li għad fadal minn dawk li jien qridt, mill-Ġordan sal-Baħar il-Kbir, in-naħa ta’ nżul ix-xemx.

⁵U l-Mulej, Alla tagħkom, għad jaqlagħhom u jkeċċihom minn quddiemkom, u intom tirtu arthom bħalma l-Mulej, Alla tagħkom, wegħedkom.

⁶Għalhekk agħmlu ħilitkom kollha biex tħarsu kulma hu miktub fil-ktieb tal-liġi ta’ Mosè, mingħajr ma tilwu lejn ix-xellug jew lejn il-lemin,

⁷bla ma titħalltu ma’ dawn il-ġnus li għad baqa’ magħkom. La ssemmux isem allathom, u la taħilfux bihom, la taqduhomx, u la tadurawhomx.

⁸Iżda ngħaqdu mal-Mulej, Alla tagħkom, bħalma għamiltu sa issa.

⁹U l-Mulej keċċa minn quddiemkom ġnus kbar u qawwija, u intom ma waqfilkom ħadd sal-lum.

¹⁰Għalhekk wieħed minnkom jagħmel għal wara elf, għaliex il-Mulej, Alla tagħkom, hu li jitqabad għalikom, bħalma wegħedkom.

¹¹Ħarsu sewwa lilkom infuskom li tħobbu lill-Mulej, Alla tagħkom.

¹²Jekk intom terġgħu lura, u tingħaqdu mal-fdal ta’ dawn il-ġnus li għad fadal magħkom, tiżżewġu u titħalltu magħhom u huma magħkom,

¹³kunu afu li l-Mulej, Alla tagħkom, ma jibqax aktar ikeċċi dawn il-ġnus minn quddiemkom, u jkunu għalikom xibka u tfixkil, frosta għal ġenbejkom u xewk f’għajnejkom, sakemm jeqirdukom minn din l-art tajba li takom il-Mulej, Alla tagħkom.

¹⁴Arawni issa, jien illum se naqbad it-triq tal-bnedmin kollha tal-art. Kunu afu b’qalbkom kollha u b’ruħkom kollha li ebda waħda mill-wegħdiet ta’ ġid li għamlilkom il-Mulej, Alla tagħkom, ma naqset. Kollha seħħewlkom, ebda waħda minnhom ma marret fix-xejn!

¹⁵Imma bħalma seħħewlkom il-wegħdiet kollha ta’ ġid li l-Mulej, Alla tagħkom, kien għamlilkom, hekk il-Mulej, Alla tagħkom, iġib fuqkom id-deni kollu li wegħedkom sakemm jeqridkom minn din l-art tajba li takom il-Mulej, Alla tagħkom.

¹⁶Jekk intom tiksru l-patt tal-Mulej, Alla tagħkom, li ordnalkom, u tmorru taqdu allat oħra u tqimuhom, tixgħel il-qilla tal-Mulej għalikom u jeqridkom minnufih minn wiċċ l-art tajba li takom.”