Read Maltese Bible with DC – IL-BIBBJA IL-KOTBA MQADDSA ĠOŻWÈ 24 Bible Online

ĠOŻWÈ 24 - Maltese Bible with DC – IL-BIBBJA IL-KOTBA MQADDSA bible

ĠOŻWÈ 24

¹Ġożwè ġema’ t-tribujiet kollha ta’ Iżrael f’Sikem u sejjaħ lix-xjuħ, lill-kapijiet, lill-imħallfin, lill-uffiċjali u resqu quddiem Alla.

²U Ġożwè qal lill-poplu kollu: “Dan qal il-Mulej Alla ta’ Iżrael: ‘Missirijietkom, Teraħ missier Abraham u missier Naħor, sa minn żmien il-qedem kienu jgħammru n-naħa l-oħra tax-xmara[24] u jaqdu allat oħra.

³Jien ħadt lil missierkom Abraham min-naħa l-oħra tax-xmara u għaddejtu mill-art kollha ta’ Kangħan u kattartlu nislu, u tajtu lil Iżakk.

⁴Lil Iżakk tajtu ’l Ġakobb u ’l Għesaw; u lil Għesaw tajtu l-muntanja ta’ Xegħir biex tkun tiegħu; u Ġakobb u wliedu niżlu l-Eġittu.

⁵U bgħatt lil Mosè u lil Aron u drabt lill-Eġittu b’kulma għamiltlu f’nofsu, u mbagħad ħriġtkom minn hemm,

⁶u ħriġt lil missirijietkom mill-Eġittu, u wassaltkom sa ħdejn il-baħar, u l-Eġizzjani għamlu għal wara missirijietkom bil-karrijiet u ż-żwiemel sal-Baħar tal-Qasab.

⁷U għajtu lill-Mulej, u l-Mulej tafa’ dlam bejnkom u bejn l-Eġizzjani, u ġibt fuqhom il-baħar li għattiehom. Rajtu b’għajnejkom x’għamilt fl-Eġittu. Imbagħad intom domtu żmien twil fid-deżert.

⁸Wassaltkom fl-art tal-Amurrin, li kienu jgħixu n-naħa l-oħra tal-Ġordan, u dawn ħabtu għalikom, u jien erħejthom f’idejkom u writtu arthom, u jiena qridthom minn quddiemkom.

⁹Qam Balak bin Siffur, sultan ta’ Mowab, u ħabat għal Iżrael, u bagħat isejjaħ lil Bagħlam bin Begħor biex jisħetkom.

¹⁰Imma jien ma ridtx nisma’ lil Bagħlam u kellu jberikkom u ħlistkom minn idejh.

¹¹U intom qsamtu l-Ġordan u ġejtu sa Ġeriko, u ħabtu għalikom in-nies ta’ Ġeriko, l-Amurrin, il-Periżżin, il-Kangħanin, il-Ħittin, il-Girgasin, il-Ħiwwin u l-Ġebusin, u rħejthom f’idejkom.

¹²U bgħatt quddiemkom iż-żnażan, u dawn, u mhux ix-xabla jew il-qaws tiegħek, keċċewhom minn quddiemkom, lilhom u ż-żewġ slaten tal-Amurrin.

¹³U tajtkom art li qatt ma ħdimtu, u bliet li qatt ma bnejtu, u għammartu fihom; kiltu mill-oqsma tad-dwieli u taż-żebbuġ li intom ma ħawwiltux.’

¹⁴Għalhekk issa ibżgħu mill-Mulej, u aqduh bir-reqqa u l-fedeltà; warrbu l-allat li missirijietkom qdew lil hemm mix-xmara[25] u fl-Eġittu, u aqdu l-Mulej.

¹⁵U jekk ma jogħġobkomx taqdu l-Mulej, għażlu llum lil min tridu taqdu; jekk hux l-allat li kienu jaqdu missirijietkom lil hemm mix-xmara, jew l-allat tal-Amurrin li f’arthom qegħdin tgħammru. Imma jien u dari naqdu l-Mulej.”

¹⁶U l-poplu kollu wieġeb u qal: “Ma jkun qatt li aħna nħallu l-Mulej biex naqdu allat oħra.

¹⁷Għax kien il-Mulej, Alla tagħna, li talla’ lilna u ’l missirijietna mill-art tal-Eġittu, minn dar il-jasar, u li għamel quddiemna stess dawn il-ħwejjeġ kbar, u ħarisna matul it-triq kollha li minnha għaddejna u fost il-popli li minn ġo nofshom qsamna.

¹⁸U l-Mulej keċċa minn quddiemna l-popli kollha u l-Amurrin li kienu jgħammru fl-art. Għalhekk aħna wkoll lill-Mulej naqdu, għaliex hu Alla tagħna.”

¹⁹U Ġożwè wieġeb lill-poplu: “Intom ma tifilħux taqdu l-Mulej, għaliex hu Alla qaddis, Alla għajjur; huwa ma jaħfrilkomx dnubietkom u ħtijietkom,

²⁰għax jekk intom titilqu l-Mulej biex taqdu allat barranin, hu jdur kontra tagħkom, jaħqarkom u jeqridkom, wara li jkun għamlilkom il-ġid.”

²¹U l-poplu wieġeb lil Ġożwè: “Le! Għax aħna l-Mulej se naqdu.”

²²Ġożwè wieġeb lill-poplu: “Kunu xhieda intom għalikom infuskom, li intom għażiltu l-Mulej biex taqdu lilu.” U huma wieġbu: “Nixhdu aħna.”

²³“Mela issa neħħu l-allat barranin li hemm f’nofskom, u dawru qalbkom lejn il-Mulej, Alla ta’ Iżrael.”

²⁴U l-poplu wieġeb lil Ġożwè: “Lill-Mulej, Alla tagħna, naqdu, u leħnu nisimgħu.”

²⁵Hekk Ġożwè dak in-nhar għamel patt mal-poplu, u tah il-liġijiet u l-ordnijiet f’Sikem.

²⁶Ġożwè kiteb dan il-kliem kollu fil-ktieb tal-liġi ta’ Alla, u ħa ġebla kbira, u waqqafha hemm taħt il-balluta li hemm fis-santwarju tal-Mulej.

²⁷U Ġożwè qal lill-poplu kollu: “Araw! Din il-ġebla tkun għalina xhieda, għax hi semgħet il-kliem kollu tal-Mulej li qalilna u tkun għalikom xhieda li ma tiċħdux lil Alla tagħkom.”

²⁸U Ġożwè bagħat lill-poplu, lil kulħadd fl-art tiegħu.

²⁹Wara dawn il-ġrajja miet Ġożwè bin Nun, qaddej tal-Mulej, fl-għomor ta’ mija u għaxar snin.

³⁰U difnuh fl-art li kienet messitu f’Timnat-seraħ, fl-għoljiet ta’ Efrajm, fuq it-Tramuntana tal-muntanja Ġagħas.

³¹Iżrael qeda lill-Mulej il-jiem kollha ta’ Ġożwè, u l-jiem kollha tax-xjuħ li baqgħu ħajjin wara Ġożwè, u li kienu jafu bl-opri kollha tal-Mulej, li kien għamel ma’ Iżrael.

³²U l-għadam ta’ Ġużeppi li wlied Iżrael kienu tellgħu mill-Eġittu difnuh f’Sikem fil-biċċa art li kien xtara Ġakobb mingħand ulied Ħamor, missier Sikem, b’mitt biċċa flus, u din baqgħet proprjetà ta’ Ġużeppi.

³³U Elgħażar bin Aron miet, u difnuh f’Gibgħa ta’ Fineħas ibnu, li kienet ingħatat lilu fil-muntanji ta’ Efrajm.