Read Maltese Bible with DC – IL-BIBBJA IL-KOTBA MQADDSA ĠOŻWÈ 3 Bible Online

ĠOŻWÈ 3 - Maltese Bible with DC – IL-BIBBJA IL-KOTBA MQADDSA bible

ĠOŻWÈ 3

¹L-għada Ġożwè bakkar filgħodu, u telqu minn Sittim, u waslu ħdejn il-Ġordan, hu u wlied Iżrael kollha, u hemm għaddew il-lejl qabel ma qasmu x-xmara.

²U wara tlitt ijiem il-kapijiet daru dawra mal-kamp u ordnaw lill-poplu u qalulhom:

³“Meta taraw l-arka tal-patt tal-Mulej, Alla tagħkom, u l-qassisin Leviti jerfgħuha, qumu minn postkom u imxu warajha.

⁴Biss żommu bejnkom u bejna l-bogħod ta’ elfejn driegħ. La tersqux lejha. Hekk tkunu tafu t-triq li għandkom tgħaddu minnha; għax qatt qabel ma għaddejtu minn din it-triq.”

⁵U Ġożwè qal lill-poplu: “Tqaddsu għax għada l-Mulej se jagħmel ħwejjeġ tal-għaġeb f’nofskom.”

⁶U Ġożwè kellem lill-qassisin u qalilhom: “Erfgħu l-arka tal-patt u għaddu quddiem il-poplu.” U refgħu l-arka tal-patt u għaddew quddiem il-poplu.

⁷U l-Mulej qal lil Ġożwè: “Illum nibda nkabbrek f’għajnejn Iżrael kollu biex ikunu jafu li kif jien kont ma’ Mosè, hekk inkun miegħek.

⁸Issa ordna lill-qassisin li jġorru l-arka tal-patt u għidilhom: “Kif taslu sa xfar l-ilma tal-Ġordan, ieqfu fil-Ġordan.”

⁹U Ġożwè qal lil ulied Iżrael: “Ersqu ’l hawn u isimgħu l-kliem tal-Mulej, Alla tagħkom.”

¹⁰U żied jgħidilhom Ġożwè: “B’dan tagħrfu li Alla l-ħaj qiegħed f’nofskom, u sejjer ikeċċi minn quddiemkom il-Kangħanin, il-Ħittin, il-Ħiwwin, il-Periżżin, il-Girgasin, l-Amurrin u l-Ġebusin.

¹¹Araw, l-arka tal-patt tal-Mulej, Sid l-art kollha, sejra tgħaddi quddiemkom fil-Ġordan.

¹²Issa agħżlu tnax-il raġel mit-tribujiet ta’ Iżrael, wieħed għal kull tribù.

¹³Malli l-qassisin li jkunu jerfgħu l-arka tal-Mulej, Sid l-art kollha, iniżżlu riġlejhom fl-ilma tal-Ġordan, l-ilma tiegħu jofrogħ, waqt li l-ilma jkun nieżel.”

¹⁴Xħin in-nies telqu mill-għerejjex tagħhom biex jaqsmu l-Ġordan, il-qassisin, li kienu jġorru l-arka tal-patt, marru quddiemhom.

¹⁵U meta r-reffiegħa tal-arka waslu sal-Ġordan u riġlejn il-qassisin li kienu jġorru l-arka messew ma’ xifer l-ilma - fi żmien il-ħsad[2] kollu l-Ġordan ikun mimli sa fuq ix-xtut tiegħu -

¹⁶l-ilma nieżel min-naħa ta’ fuq waqaf, u qam gozz wieħed, ’il bogħod ħafna ħdejn Adam, il-belt li qiegħda ħdejn Saretan; l-ilma nieżel lejn il-Baħar tal-Għaraba, il-Baħar il-Mielaħ, ġie fix-xejn għalkollox; u l-poplu qasam biswit Ġeriko.

¹⁷Il-qassisin, li kienu jġorru l-arka tal-patt tal-Mulej, waqfu fin-niexef f’nofs il-Ġordan, u l-Iżraelin kollha baqgħu jaqsmu fin-niexef sa ma l-poplu kollu għadda l-Ġordan.