Read Maltese Bible with DC – IL-BIBBJA IL-KOTBA MQADDSA ĠOŻWÈ 6 Bible Online

ĠOŻWÈ 6 - Maltese Bible with DC – IL-BIBBJA IL-KOTBA MQADDSA bible

ĠOŻWÈ 6

¹Ġeriko kienet magħluqa u msakkra minħabba wlied Iżrael; ħadd ma kien joħroġ jew jidħol.

²U l-Mulej qal lil Ġożwè: “Ara, irħejt f’idejk lil Ġeriko u s-sultan tagħha, nies ta’ ħila kbira.

³Duru dawra waħda mal-belt, l-irġiel kollha tal-ġlied, u tagħmlu hekk għal sitt ijiem.

⁴U seba’ qassisin jieħdu seba’ trombi tal-ġublew quddiem l-arka, u fis-seba’ jum idduru mal-belt seba’ darbiet, u l-qassisin idoqqu t-trombi.

⁵Imbagħad malli jdoqq il-kornu, u malli tisimgħu t-tromba ddoqq, il-poplu kollu jgħajjat għajta kbira, u jiġġarrfu l-ħitan tal-belt, u l-poplu jidħol fil-belt, kulħadd minn fejn ikun.”

⁶Ġożwè bin Nun sejjaħ il-qassisin u qalilhom: “Erfgħu l-arka tal-patt u seba’ qassisin jieħdu seba’ trombi tal-ġublew, quddiem l-arka tal-Mulej.”

⁷U lill-poplu qallu: “Għaddu u duru mal-belt, u n-nies armati jgħaddu quddiem l-arka tal-Mulej.”

⁸Malli Ġożwè temm ikellem il-poplu, seba’ qassisin, li kellhom is-seba’ trombi tal-ġublew quddiem il-Mulej, għaddew ’il quddiem u bdew idoqqu t-trombi, u l-arka tal-patt tal-Mulej kienet miexja warajhom.

⁹In-nies armati mxew quddiem il-qassisin, li kienu jdoqqu t-trombi; u l-bqija mxew wara l-arka, għad-daqq tat-trombi.

¹⁰Ġożwè ordna lill-poplu: “Tgħajtux u ssemmgħux leħinkom, u tħallu toħroġ ebda kelma minn fommkom, sa dak in-nhar li ngħidilkom: ‘Għajtu!’ Imbagħad għajtu.”

¹¹U daret l-arka tal-Mulej madwar il-belt għal darba waħda, u reġgħu lura lejn il-kamp, u għaddew il-lejl hemmhekk.

¹²L-għada Ġożwè bakkar, u l-qassisin refgħu l-arka tal-Mulej.

¹³U s-seba’ qassisin li kellhom is-seba’ trombi tal-ġublew quddiem l-arka tal-Mulej, telqu, jimxu u jdoqqu t-trombi; u n-nies armati mxew quddiemhom u l-bqija mxew wara l-arka tal-Mulej, għad-daqq tat-trombi.

¹⁴U daru darba waħda mal-belt fit-tieni jum u reġgħu lura lejn il-kamp. Hekk għamlu għal sitt ijiem.

¹⁵Fis-seba’ jum imbagħad bakkru mat-tbexbix, u daru seba’ darbiet bl-istess mod madwar il-belt; biss dakinnhar daru mal-belt seba’ darbiet.

¹⁶Mas-seba’ darba l-qassisin daqqew it-trombi u Ġożwè qal lill-poplu: “Għajtu, għax takom il-Mulej il-belt.

¹⁷U l-belt tingħata għall-qerda, hi u kulma fiha, f’ġieħ il-Mulej; Raħab iż-żienja biss tibqa’ ħajja, hi u kulma għandha f’darha, għax hi ħbiet il-messaġġiera li bgħatna.

¹⁸Imma intom ħarsu rwieħkom minn dak kollu li għandu jinqered[6], li ma tieħdu xejn minnu, u b’hekk twaqqgħu l-kamp ta’ Iżrael fl-interdett u tħarbtuh.

¹⁹Kull fidda u deheb, u l-oġġetti kollha tal-bronż u l-ħadid huma kkonsagrati lill-Mulej, u jmorru fil-ħażna tal-Mulej.”

²⁰U għajjat il-poplu, u daqqew it-trombi, u malli l-poplu sama’ d-daqq tat-trombi għajtu għajta kbira, u l-ħitan iġġarrfu[7] u l-poplu tala’ għall-belt, kulħadd minn fejn kien, u qabdu l-belt f’idejhom.

²¹U qerdu kulma kien hemm fil-belt, irġiel u nisa, żgħażagħ u xjuħ, gniedes, nagħaġ u ħmir, b’xifer ix-xabla.

²²U liż-żewġt irġiel li kienu marru jitkixxfu l-art Ġożwè qalilhom: “Morru f’dar il-mara żienja u oħorġu minn hemm il-mara u kulma hemm għandha, skont ma ħliftulha.”

²³U ż-żgħażagħ, li kienu marru jitkixxfu, marru u ħarġu lil Raħab u lil missierha u lil ommha u lil ħutha u kulma kellha; u ħarġu lin-nies kollha ta’ darha u qegħduhom barra mill-kamp ta’ Iżrael.

²⁴Imbagħad taw in-nar, u ħarqu l-belt, u kulma kien fiha, imma l-fidda u d-deheb u l-oġġetti kollha tal-bronż u tal-ħadid qegħduhom fil-ħażna ta’ dar il-Mulej.

²⁵Ġożwè, imma, ħalla ħajja lil Raħab iż-żienja, il-familja ta’ missierha u kulma kellha, u baqgħet tgħix f’Iżrael sal-lum, għax kienet ħbiet il-messaġġiera li Ġożwè kien bagħat jitkixxfu ’l Ġeriko.

²⁶Ġożwè ħalef dakinhar u qal: Misħut il-bniedem[8] quddiem il-Mulej li jfettillu jibni din il-belt, u b’ibnu l-kbir isejjisha, u jwaqqfilha bwiebha b’ibnu ż-żgħir.

²⁷U l-Mulej kien ma’ Ġożwè; il-fama tiegħu xterdet mal-art kollha.