Read Maltese Bible with DC – IL-BIBBJA IL-KOTBA MQADDSA 1 TIMOTJU 2 Bible Online

1 TIMOTJU 2 - Maltese Bible with DC – IL-BIBBJA IL-KOTBA MQADDSA bible

1 TIMOTJU 2

¹Nitolbok l-ewwel nett li jsiru suppliki, orazzjonijiet, talb u radd il-ħajr għall-bnedmin kollha;

²għas-slaten, għal dawk kollha li għandhom xi awtorità, biex inkunu nistgħu ngħaddu ħajja fil-kwiet u fis-sliem, fit-tjieba u kif jixraq.

³Dan hu tajjeb u jogħġob lil Alla s-Salvatur tagħna,

⁴li jrid li l-bnedmin kollha jsalvaw u jaslu biex jagħrfu l-verità.

⁵Għax wieħed hu Alla, u wieħed hu l-medjatur bejn Alla u l-bniedem, il-Bniedem Kristu Ġesù,

⁶li ta lilu nnifsu bħala prezz tal-fidwa għal kulħadd; u x-xhieda ta’ dan ngħatat f’waqtha.

⁷Hu għal dan li jien kont magħmul xandar u appostlu - qiegħed ngħid is-sewwa, m’iniex nigdeb - biex ngħallem lill-ġnus il-fidi u l-verità.

⁸Nixtieq li l-irġiel jitolbu kullimkien, jerfgħu ’l fuq idejn safja[7] bla għadab u bla ġlied.

⁹Hekk ukoll nixtieq li n-nisa jiżżejnu bi lbies xieraq, bil-modestja u bl-għaqal, mhux b’xagħarhom midfur, anqas bid-deheb jew ġawhar jew ilbies lussuż,

¹⁰imma bl-għemil it-tajjeb, kif jixraq lil nisa li jridu jkunu twajbin.

¹¹Il-mara għandha toqgħod titgħallem bil-kwiet u bl-umiltà kollha.

¹²Ma nħalli qatt li mara tgħallem jew li taħkem fuq ir-raġel; hi għandha toqgħod fis-skiet.

¹³Għax Adam ġie magħmul l-ewwel, imbagħad Eva.

¹⁴U ma kienx Adam li safa mqarraq; kienet il-mara li, wara li kienet imqarrqa, waqgħet fil-ħtija.

¹⁵Madankollu hi ssalva bil-maternità tagħha sakemm tibqa’ tgħix fil-fidi, fl-imħabba, fil-qdusija u fil-modestja.