Read Maltese Bible with DC – IL-BIBBJA IL-KOTBA MQADDSA 1 TIMOTJU 6 Bible Online

1 TIMOTJU 6 - Maltese Bible with DC – IL-BIBBJA IL-KOTBA MQADDSA bible

1 TIMOTJU 6

¹Dawk li huma lsiera taħt il-madmad iqisu lis-sidien tagħhom bħala nies li jistħoqqilhom kull ġieħ, biex ma jkunux imkasbra l-isem ta’ Alla u t-tagħlim.

²Dawk imbagħad li s-sidien tagħhom jemmnu ma għandhomx b’daqshekk jonqsuhom għax huma aħwa; anzi għandhom jaqduhom aħjar, għall-ħsieb li dawk li għalihom qegħdin jaħdmu huma nies li jemmnu u għeżież. Dan għallem u wissi.

³Min jgħallem ħaġa oħra, min ma joqgħodx għall-kliem li jwettaq ta’ Sidna Ġesù Kristu u għat-tagħlim skont it-tjieba,

⁴dan ikun supperv u ma jkun jaf xejn, marid bil-marda tat-tilwim u kliem li ma jġibx ħlief għira u ġlied, tkasbir u suspetti ħżiena;

⁵u tilwim bejn nies ta’ moħħhom maqlub u nieqsa mill-verità; u mingħalihom it-tjieba qiegħda għal qligħ il-flus.

⁶It-tjieba fiha qligħ kbir, tassew, għal min hu kuntent b’dak li għandu;

⁷għax aħna xejn ma ġibna fid-dinja, u xejn ma nistgħu nieħdu magħna;

⁸sakemm għandna x’nieklu u x’nilbsu, dan għandu jkun biżżejjed għalina.

⁹Imma dawk li jridu jistagħnew jaqgħu fit-tiġrib u fix-xibka u f’ħafna xewqat bla sens u ta’ ħsara li jitfgħu lill-bnedmin fil-qerda u t-telfien.

¹⁰Għax ir-regħba għall-flus hi l-għerq ta’ kull ħażen; kien ħtija ta’ din ir-regħba li xi wħud ħarġu barra mit-triq tal-fidi u nfnew b’niket kbir.

¹¹Imma int, bniedem ta’ Alla, aħrab dan kollu; fittex li jkollok il-ġustizzja, it-tjieba, il-fidi, l-imħabba, is-sabar, il-ħlewwa.

¹²Tqabad it-taqbida t-tajba tal-fidi; qis li tirbaħ il-ħajja ta’ dejjem li għaliha kont imsejjaħ u li tagħha għamilt l-istqarrija sabiħa quddiem ħafna xhieda.

¹³Inwissik quddiem Alla li jagħti l-ħajja lill-ħlejjaq kollha, u quddiem Kristu Ġesù li xehed u għamel l-istqarrija sabiħa quddiem Ponzju Pilatu.

¹⁴Inwissik biex tħares l-istruzzjonijiet li rċevejt u żżomm ruħek bla tebgħa u bla ħtija sa jum id-dehra ta’ Sidna Ġesù Kristu,

¹⁵li għad juriha f’waqtha. Dak li hu l-hieni u waħdu setgħani, is-Sultan tas-slaten u s-Sid tas-sidien,

¹⁶li hu biss ma jmut qatt u jgħammar f’dawl li ħadd ma jista’ jersaq lejh, hu li ebda bniedem qatt ma rah u anqas qatt jista’ jarah. Lilu ġieħ u setgħa għal dejjem! Ammen.

¹⁷Lil dawk li huma għonja bil-ġid ta’ din l-art widdibhom biex ma jitkabbrux u ma jqegħdux it-tama tagħhom f’għana li ma tistax torbot fuqu, imma li għandhom jittamaw f’Alla li jagħtina kollox bix-xaba’ biex ingawdu bih;

¹⁸għidilhom jagħmlu l-ġid, jistagħnew b’opri tajba, li jkunu ġenerużi u jaqsmu mal-oħrajn.

¹⁹Hekk ikunu qegħdin jaħżnu għalihom infushom teżor sabiħ għal li ġej, biex bih jiksbu l-ħajja, il-ħajja vera.

²⁰Timotju, ħares sewwa dak li kien fdat f’idejk. Aħrab il-kliem profan u fieragħ u l-kontradizzjonijiet tal-għerf falz,

²¹li xi wħud ħaddnuh u tbiegħdu mill-fidi. Il-grazzja magħkom.