Read Maltese Bible with DC – IL-BIBBJA IL-KOTBA MQADDSA 2 TIMOTJU 1 Bible Online

2 TIMOTJU 1 - Maltese Bible with DC – IL-BIBBJA IL-KOTBA MQADDSA bible

2 TIMOTJU 1

¹Pawlu, bir-rieda ta’ Alla appostlu ta’ Kristu Ġesù, skont il-wegħda tal-ħajja li hi fi Kristu Ġesù,

²lil Timotju, ibni l-għażiż: grazzja, ħniena u sliem mingħand Alla l-Missier u mingħand Kristu Ġesù Sidna.

³Irrodd ħajr lil Alla, li lilu nqim b’kuxjenza safja bħal missirijieti[1], hekk kif niftakar fik bla heda fit-talb tiegħi lejl u nhar.

⁴Meta niftakar fid-dmugħ[2] tiegħek għalija, tiġini x-xewqa li narak, biex nimtela bil-ferħ.

⁵Niftakar fil-fidi vera tiegħek, fidi li l-ewwel kienet ta’ nanntek Lojd u mbagħad ta’ ommok Ewniki, u li ma għandi ebda dubju li hi fik ukoll.

⁶Minħabba f’hekk infakkrek biex tqajjem fik id-don ta’ Alla, li jinsab fik bit-tqegħid ta’ idejja;

⁷għax Alla ma taniex spirtu ta’ biża’, imma Spirtu ta’ qawwa, ta’ mħabba u ta’ rażan.

⁸Mela tistħi xejn minħabba fix-xhieda għal Sidna, anqas minħabba fija, priġunier tiegħu[3], imma aqsam miegħi t-tbatija għall-Evanġelju, u afda fil-qawwa ta’ Alla,

⁹li salvana u sejħilna b’sejħa qaddisa, mhux għax qies l-għemejjel tagħna, imma skont il-pjan tiegħu stess u skont il-grazzja tiegħu. Din il-grazzja tahielna qabel iż-żmien tal-eternità fi Kristu Ġesù,

¹⁰imma dehret issa permezz tad-dehra tas-Salvatur tagħna Kristu Ġesù li qered il-mewt, u dawwal il-ħajja bla tmiem permezz tal-Evanġelju,

¹¹li għalih jien kont magħmul predikatur, appostlu u mgħallem.

¹²Din hi l-kawża li għaliha qiegħed inbati. Imma b’daqshekk ma nistħix, għax jien naf f’min emmint, u naf sewwa li hu jista’ jħares it-teżor li kien fdat f’idejja, sa ma jasal dak il-Jum.

¹³Żomm quddiem għajnejk l-eżempju tat-tagħlim sħiħ li smajt mingħandi, fil-fidi u fl-imħabba li huma fi Kristu Ġesù.

¹⁴Ħares bl-għajnuna tal-Ispirtu s-Santu li jgħammar fina t-teżor sabiħ li kien fdat f’idejk.

¹⁵Kif inti taf, dawk kollha li joqogħdu l-Asja telquni, fosthom Figellu u Ermoġeni.

¹⁶Il-Mulej ikollu ħniena mill-familja ta’ Onesiforu, li sikwit sibtu ta’ faraġ għalija: hu ma staħax mill-ktajjen tiegħi,

¹⁷imma meta wasal Ruma fittixni bil-ħrara sa ma sabni.

¹⁸Il-Mulej jagħtih il-grazzja li jsib ħniena quddiem il-Mulej f’dak il-Jum. Inti taf aħjar minni kemm għenni f’Efesu.