Read Maltese Bible with DC – IL-BIBBJA IL-KOTBA MQADDSA 2 TIMOTJU 3 Bible Online

2 TIMOTJU 3 - Maltese Bible with DC – IL-BIBBJA IL-KOTBA MQADDSA bible

2 TIMOTJU 3

¹Dan għandek tkun taf: li l-aħħar tad-dinja jkun żmien iebes.

²Il-bnedmin jingħataw għall-imħabba tagħhom infushom u tal-flus; faħħarin, suppervi, dgħajja, ma jisimgħux mill-ġenituri; bla gratitudni, bla tjieba;

³bla qalb, bla ħniena, lablaba, bla rażan; kiefra, bla mħabba għat-tajjeb;

⁴tradituri, bla ħsieb, minfuħa bihom infushom; iħobbu aktar il-pjaċir milli ’l Alla;

⁵nies li jiċħdu l-qawwa tat-tjieba, minkejja li minn barra jagħmluha ta’ tajbin. Nies bħal dawn aħrabhom.

⁶Għax fosthom hemm xi wħud li jindiehsu fil-familji u jaħkmu taħt idejhom nisa msejkna mgħobbijin bid-dnubiet u mkaxkrin minn kull xorta ta’ xewqat,

⁷li dejjem lesti biex jitgħallmu, imma li qatt ma jseħħilhom jaslu biex jagħrfu l-verità.

⁸Bħalma Ġannes u Ġambri waqfu lil Mosè, hekk ukoll dawn jieqfu lill-verità; huma nies ta’ moħħ mgħawweġ u ta’ fidi mħassra.

⁹Iżda mhumiex se jimxu aktar ’il quddiem, għax kulħadd għad isir jaf bil-bluha tagħhom, kif ġara minn dawk it-tnejn.

¹⁰Imma inti mxejt warajja fit-tagħlim tiegħi, fl-imġiba tiegħi, fil-pjan u t-twemmin tiegħi; fis-sabar, fl-imħabba u fil-perseveranza tiegħi;

¹¹fil-persekuzzjonijiet u t-tbatijiet li ġew fuqi f’Antijokja, f’Ikonju u f’Listra. X’persekuzzjonijiet għaddejt minnhom! Iżda ħelisni l-Mulej minnhom kollha.

¹²U dawk li jridu jgħixu ħajja tajba fi Kristu Ġesù lkoll jgħaddu mill-persekuzzjoni.

¹³Imma n-nies il-ħżiena u l-uċuħ b’oħra jmorru mill-ħażin għall-agħar, iqarrqu u jitqarrqu.

¹⁴Imma int ibqa’ miexi f’dak li tgħallimt u emmint bis-sħiħ, għax taf mingħand min tgħallimtu,

¹⁵u għax sa minn żgħoritek sirt midħla tal-Kotba Mqaddsa, li jistgħu jagħtuk l-għerf li jwassal għas-salvazzjoni permezz tal-fidi fi Kristu Ġesù.

¹⁶L-Iskrittura kollha hija mnebbħa minn Alla, u tiswa biex wieħed jgħallem, iċanfar, iwiddeb u jrawwem fis-sewwa,

¹⁷biex hekk il-bniedem ta’ Alla jkun perfett, imħejji għal kull ħidma tajba.