Read Maltese Bible with DC – IL-BIBBJA IL-KOTBA MQADDSA TITU 2 Bible Online

TITU 2 - Maltese Bible with DC – IL-BIBBJA IL-KOTBA MQADDSA bible

TITU 2

¹Int, iżda, għallem skont id-duttrina sħiħa:

²Li x-xjuħ ikunu trankwilli, għaqlin, serji, meqjusa, sħaħ fil-fidi, fl-imħabba u fis-sabar.

³L-istess in-nisa xjuħ: għandhom iġibu ruħhom kif jixraq lil nisa qaddisa; ma jqassux fuq ħaddieħor, anqas ikunu lsiera tal-inbid; għandhom jgħallmu t-tajjeb,

⁴biex hekk idarru n-nisa żgħażagħ iħobbu lil żwieġhom u lil uliedhom;

⁵ikunu meqjusa, safja, nisa tad-dar, twajba, ubbidjenti għal żwieġhom, ħalli l-kelma ta’ Alla ma titkasbarx.

⁶Hekk ukoll ħeġġeġ liż-żgħażagħ biex ikunu meqjusa.

⁷Qis li inti nnifsek tkun f’kollox mera ta’ bniedem li jagħmel it-tajjeb; bniedem ta’ duttrina safja, ta’ serjetà;

⁸li għandu kelma sħiħa li ħadd ma jsib xi jgħid fiha, sabiex kull min jeħodha kontra tagħna jibqa’ mħawwad, billi ma jkollu xejn ħażin xi jgħid fuqna.

⁹Għid lill-ilsiera biex joqogħdu f’kollox għas-sidien tagħhom, u jfittxu li jogħġbuhom u ma jmeruhomx;

¹⁰ma jwarrbu xejn bil-moħbi, imma juru li huma tassew nies ta’ min jafdahom f’kollox, ħalli f’kollox jagħmlu ġieħ lit-tagħlim ta’ Alla, is-Salvatur tagħna.

¹¹Għax dehret il-grazzja ta’ Alla, għas-salvazzjoni lill-bnedmin kollha;

¹²hi trawwimna nwarrbu l-ħażen u l-ġibdiet tad-dinja, biex ngħixu bir-rażna u l-ġustizzja u t-tjieba f’dan iż-żmien,

¹³u nistennew it-tama hienja[3] u d-dehra tal-glorja tal-kbir Alla u Salvatur tagħna, Ġesù Kristu.

¹⁴Hu li ta lilu nnifsu għalina biex jifdina minn kull ħażen u jnaddafna u jagħmel minna poplu magħżul għalih, poplu mħeġġeġ għall-għemil it-tajjeb.

¹⁵Dan li għandek tgħid. Ħeġġeġ u wissi bis-setgħa kollha; u ħadd ma għandu jmaqdrek.