Read Maltese Bible with DC – IL-BIBBJA IL-KOTBA MQADDSA FILEMON 1 Bible Online

FILEMON 1 - Maltese Bible with DC – IL-BIBBJA IL-KOTBA MQADDSA bible

FILEMON 1

¹Pawlu, priġunier ta’ Kristu Ġesù u ħija Timotju lil Filemon seħibna l-għażiż fix-xogħol,

²u lil oħtna Appja u lil Arkippu, suldat magħna, u lill-knisja li tinġabar f’darek:

³Grazzja u sliem għalikom mingħand Alla Missierna u Ġesù Kristu[1].

⁴Niżżi ħajr dejjem lil Alla tiegħi u niftakar fik fit-talb tiegħi.

⁵Jiena smajt bil-fidi li għandek fil-Mulej Ġesù u l-imħabba tiegħek għall-qaddisin.

⁶Nitlob li l-fidi li inti taqsam mal-oħrajn ikollha l-qawwa li twassal biex jingħaraf it-tajjeb kollu li hemm fina minħabba fi Kristu.

⁷Jiena fraħt ħafna u qawwejt qalbi bl-imħabba li għandek; għaliex, ħija, il-qlub tal-qaddisin strieħu fik.

⁸Għalhekk iktar milli nikkmandak tagħmel li jenħtieġ - kif nista’ nagħmel b’wiċċi minn quddiem fi Kristu -

⁹jiena nitolbok, f’isem l-imħabba; jiena, Pawlu, raġel xwejjaħ, u issa priġunier ta’ Kristu Ġesù,

¹⁰qiegħed nitolbok bil-ħerqa għal ibni, li jiena nissilt fil-ktajjen, għal Oneżimu[2],

¹¹dak li darba lilek ma kien jiswielek għal xejn, imma li issa jiswielna, kemm lili u kemm lilek.

¹²Jiena bgħatthulek lura, lilu, bħallikieku bgħattlek qalbi stess[3].

¹³Xtaqt kieku żammejtu miegħi, biex, kif jien fil-ħabs għall-Evanġelju, idur bija minflokok hu.

¹⁴Iżda ma ridt nagħmel xejn mingħajr ma nara x’jidhirlek int, biex l-opra tajba tiegħek ma tkunx għamiltha bilfors, imma tkun ħierġa mill-qalb.

¹⁵Għandu mnejn li għalhekk hu telaq minn miegħek għal ftit, biex inti terġa’ tiksbu lura għal dejjem,

¹⁶mhux iktar bħala lsir, imma xi ħaġa iktar minn ilsir, bħala ħuk għażiż; għażiż fuq kollox għalija, imma kemm iktar għalik, skont id-dinja u skont il-Mulej.

¹⁷Int mela, jekk inti qalb waħda miegħi, ilqgħu bħallikieku kont jien!

¹⁸Jekk naqsek f’xi ħaġa jew jekk għandu jagħtik, ixħet kollox fuqi.

¹⁹B’idi stess qiegħed nikteb: “Jiena, Pawlu, inħallsek” - biex ma ngħidlekx li inti stess taf lilek innifsek lili.

²⁰Iva, ħija, nitolbok, agħmilli dan il-pjaċir minħabba fil-Mulej. Serraħli qalbi fi Kristu.

²¹Ktibtlek għax jiena żgur li int tisma’ minni, anzi jiena naf li se tagħmel aktar minn hekk.

²²Fl-istess ħin ħejjili kamra, għaliex nittama li bis-saħħa tat-talb tagħkom nerġa’ ningħata lilkom.

²³Iselli għalikom Epafra priġunier miegħi għal Kristu Ġesù;

²⁴Marku, Aristarku, Dema, Luqa, sħabi fix-xogħol.

²⁵Il-grazzja tal-Mulej Ġesù Kristu tkun magħkom.