Read Maltese Bible with DC – IL-BIBBJA IL-KOTBA MQADDSA LHUD 1 Bible Online

LHUD 1 - Maltese Bible with DC – IL-BIBBJA IL-KOTBA MQADDSA bible

LHUD 1

¹Alla fl-imgħoddi kellem lil missirijietna ħafna drabi u b’ħafna manjieri permezz tal-profeti.

²Issa f’dan l-aħħar żmien, huwa kellimna permezz ta’ Ibnu, li hu għamlu werriet ta’ kollox, u li bih ukoll għamel il-ħolqien.

³Hu, l-Iben, li hu d-dija tal-glorja ta’ Alla u x-xbieha tal-essenza tiegħu, u li jżomm id-dinja kollha bil-kelma setgħana tiegħu, wara li naddafna minn dnubietna, qagħad fuq il-lemin tal-kobor ta’ Alla fl-għoli tas-smewwiet,

⁴u b’hekk sar daqshekk aqwa mill-anġli daqs kemm ogħla minn tagħhom hu l-isem li kiseb.

⁵Għax lil min mill-anġli qatt qal Alla: “Inti ibni, jiena llum nissiltek”? Jew: “Jiena nkun missieru, u hu jkun ibni”?

⁶Imbagħad, hu u jdaħħal ’l Ibnu l-Kbir fid-dinja, jgħid ukoll: “Ħa jqimuh l-anġli kollha ta’ Alla.”

⁷Għall-anġli tiegħu jgħid: “L-anġli tiegħu jagħmilhom irjieħ, lill-qaddejja tiegħu ilsna tan-nar.”

⁸Imma għall-Iben jgħid: “It-tron tiegħek, O Alla, għal dejjem ta’ dejjem, ix-xettru tal-ġustizzja hu x-xettru ta’ saltnatek [1].

⁹Ħabbejt is-sewwa u bgħadt il-ħażen; għalhekk Alla, Alla tiegħek, dilkek b’żejt ta’ ferħ aktar minn sħabek.”

¹⁰U wkoll: “Int, Mulej, waqqaft l-art fil-bidu, u għemil idejk huma s-smewwiet.

¹¹Huma jintemmu, iżda inti tibqa’; huma lkoll bħal libsa jiqdiemu,

¹²bħal mantar int tkebbibhom [2], bħal libsa huma jitbiddlu. Imma int, li int tibqa’, u s-snin tiegħek qatt ma jintemmu”.

¹³Lil min mill-anġli qatt qal: “Oqgħod fuq il-lemin tiegħi, sa ma nagħmel l-għedewwa tiegħek mirfes għal riġlejk”?

¹⁴M’humiex huma wkoll spirti qaddejja, mibgħutin biex jaqdu lil dawk li għandhom jiksbu s-salvazzjoni?