Read Maltese Bible with DC – IL-BIBBJA IL-KOTBA MQADDSA LHUD 10 Bible Online

LHUD 10 - Maltese Bible with DC – IL-BIBBJA IL-KOTBA MQADDSA bible

LHUD 10

¹Il-Liġi ta’ Mosè, billi għandha biss id-dell tal-ġid li għandu jiġi, u mhux dan l-istess ġid, lil dawk li jersqu qrib lejn Alla ma tista’ qatt tagħmilhom perfetti bis-saħħa ta’ dawk is-sagrifiċċji li huma joffru bla waqfien minn sena għal sena.

²Għax kieku kien hekk, dawk li jagħtu l-kult lil Alla ma kinux forsi jwaqqfuhom dawn is-sagrifiċċji kieku kienu jħossu ruħhom bla dnubiet u mnaddfin minnhom darba għal dejjem?

³Għall-kuntrarju, b’dawn l-istess sagrifiċċji ssir it-tifkira tad-dnubiet minn sena għal oħra.

⁴Għax ma jistax ikun li d-demm tal-gniedes u tal-mogħoż ineħħi d-dnubiet.

⁵Għalhekk Kristu meta daħal fid-dinja qal: “Sagrifiċċju u offerta int ma ridtx, imma ġisem int ħejjejt għalija;

⁶vittmi maħruqa u vittmi għad-dnubiet lilek ma għoġbukx.

⁷Jien imbagħad għedt: ‘Hawn jien, ġejt biex nagħmel ir-rieda tiegħek, o Alla, kif fil-ktieb hemm miktub fuqi.”

⁸L-ewwel qal: “Sagrifiċċji u offerti, vittmi maħruqa u vittmi għad-dnubiet, la ridthom u lanqas għoġbuk”, għalkemm dawn titlobhom il-Liġi.

⁹Imbagħad qal: “Hawn jien, ġejt biex nagħmel ir-rieda tiegħek”. B’hekk Alla neħħa s-sagrifiċċji tal-ewwel biex iqiegħed flokhom tat-tieni.

¹⁰Bis-saħħa ta’ din ir-rieda aħna konna mqaddsin, permezz tal-offerta tal-ġisem ta’ Ġesù Kristu magħmula darba għal dejjem.

¹¹Kull qassis ieħor imur kuljum biex jaqdi l-ministeru tiegħu, u joffri u jerġa’ joffri l-istess sagrifiċċju, bla ma jistgħu qatt ineħħu d-dnubiet.

¹²Imma Kristu, wara li offra sagrifiċċju wieħed għad-dnubiet, qagħad għal dejjem fuq in-naħa tal-lemin ta’ Alla,

¹³fejn qiegħed jistenna sa ma l-għedewwa tiegħu jitqiegħdu mirfes taħt riġlejh.

¹⁴Għax hu b’offerta waħda għamel perfetti għal dejjem lil dawk li huwa jqaddes.

¹⁵Dan jixhedhulna l-Ispirtu s-Santu nnifsu, għax wara li qal:

¹⁶“Dan hu l-patt li jien għad nagħmel magħhom wara dawk il-jiem, jgħid il-Mulej; inqiegħed il-liġijiet tiegħi f’qalbhom, u f’moħħhom niktibhom.” Qal ukoll:

¹⁷“Dnubiethom u ħtijiethom ma niftakarhomx aktar.”

¹⁸Issa, fejn hemm il-maħfra tad-dnubiet, ma hemmx għalfejn issir aktar l-offerta għad-dnubiet.

¹⁹Ladarba, l-aħwa, għandna l-fiduċja li nidħlu fis-Santwarju bis-saħħa tad-demm ta’ Ġesù

²⁰billi ngħaddu mit-triq, ġdida u ħajja, li hu fetħilna ’l ġewwa mill-velu, li hu l-ġisem tiegħu stess;

²¹u ladarba għandna dan il-qassis il-kbir imqiegħed fuq il-familja ta’ Alla,

²²ejjew nersqu b’qalb sinċiera u b’fidi sħiħa, bi qlubna mnaddfin minn kuxjenza ħażina u l-ġisem tagħna maħsul b’ilma safi.

²³Inżommu sħiħ fl-istqarrija qawwija tat-tama tagħna, għax ta’ kelmtu huwa dak li għamlilna l-wegħda.

²⁴Naraw kif nistgħu nħajru lil xulxin għall-imħabba u għall-għemil tajjeb.

²⁵Ma ninqatgħux mil-laqgħat tagħna flimkien, kif ħadu d-drawwa jagħmlu xi wħud; agħmlu l-qalb lil xulxin; u dan wisq aktar għandkom tagħmluh, aktar ma taraw li qiegħed joqrob il-Jum.

²⁶Għax jekk wara li ħadna t-tagħrif sħiħ tal-verità nidinbu minn rajna, ma hemmx sagrifiċċju ieħor għad-dnub xi jsir.

²⁷Jibqgħalna biss li nistennew bil-biża’ l-ġudizzju u l-ħuġġieġa nar li teqred l-għedewwa ta’ Alla.

²⁸Jekk wieħed iwarrab il-Liġi ta’ Mosè jingħata għall-mewt bla ebda ħniena fuq il-kelma ta’ tnejn jew tliet xhieda.

²⁹Aħsbu ftit x’kastig aktar aħrax ħaqqu dak li jkasbar lil Bin Alla, li jniġġes id-demm tal-patt li bih tqaddes, u li jmaqdar l-Ispirtu tal-grazzja!

³⁰Għax aħna nafu min hu dak li qal: “Tiegħi hu l-ħaqq, jien hu li nħallas,” u wkoll: “Jagħmel ħaqq il-Mulej mill-poplu tiegħu.”

³¹Ħaġa tal-biża’ li taqa’ f’idejn Alla l-ħaj!

³²Ftakru f’dawk l-ewwel jiem: lanqas biss ilħaqtu ddawwaltu[25] bit-tagħlim, li ma ġarrabtux bis-sabar taqbida ħarxa.

³³Lil xi wħud minnkom għamlu minnhom spettaklu bit-tagħjir u ħbit quddiem kulħadd; oħrajn minnkom kellhom jaqsmu fix-xorti ta’ dawk li sabu ruħhom f’dawn il-provi.

³⁴Għax tassew, intom ħadtu sehem fit-tbatijiet tal-priġunieri, u fraħtu meta serqulkom ġidkom, għax tafu li għandkom ġid akbar li jibqa’ għal dejjem.

³⁵Tarmux, mela, il-fiduċja tagħkom, għax din iġġib magħha ħlas kbir.

³⁶Tassew li teħtieġu s-sabar biex tagħmlu r-rieda ta’ Alla u tiksbu dak li hu wiegħed.

³⁷Għax “ftit ieħor, ftit ħafna, u dak li għandu jiġi ma jdumx ma jiġi.

³⁸Il-bniedem ġust tiegħi jgħix bil-fidi; imma jekk jerġa’ lura jien ma nitgħaxxaqx bih.”

³⁹Iżda aħna m’aħniex minn dawk li jerġgħu lura, biex nintilfu; aħna minn dawk li jemmnu, biex insalvaw.