Read Maltese Bible with DC – IL-BIBBJA IL-KOTBA MQADDSA LHUD 13 Bible Online

LHUD 13 - Maltese Bible with DC – IL-BIBBJA IL-KOTBA MQADDSA bible

LHUD 13

¹Ħa tibqa’ magħkom l-imħabba tal-aħwa.

²Tinsewx tilqgħu lill-barranin; minħabba f’hekk xi wħud laqgħu l-anġli bla ma kienu jafu.

³Ftakru f’dawk li huma fil-ħabs, daqslikieku kontu fil-ħabs magħhom; ftakru wkoll f’dawk li qegħdin ikasbruhom, daqslikieku qegħdin ikasbru lilkom f’ġisimkom.

⁴Ħalli jkun iż-żwieġ tagħkom miżmum fil-ġieħ minn kulħadd u s-sodda taż-żwieġ bla tinġis, għax Alla għad jagħmel ħaqq miż-żienja u mill-adulteri.

⁵Tkunux mogħtija għar-regħba tal-flus; kunu kuntenti b’dak li għandkom, għax Alla stess qal: “Jien m’iniex se nħallik, anqas nitilqek.”

⁶Għalhekk nistgħu ngħidu b’qalbna qawwija: “Il-Mulej l-għajnuna tiegħi, jien ma nibżax; x’jista’ jagħmilli l-bniedem?”

⁷Ftakru f’dawk li jmexxukom, dawk li wasslulkom il-kelma ta’ Alla; aħsbu fuq it-tmiem ta’ ħajjithom, imxu fuq l-eżempju tal-fidi tagħhom.

⁸Ġesù Kristu hu dak li kien, fl-imgħoddi, issa u għal dejjem.

⁹Tħallux li toħorġu ’l barra mit-triq b’xorta oħra ta’ tagħlim barrani; aħjar għalina li qalbna tissaħħaħ bil-grazzja ta’ Alla milli b’tagħlim dwar kull xorta ta’ ikel li anqas sewa ta’ ġid għal dawk li mxew miegħu.

¹⁰Aħna għandna artal[30] li minnu ma jistgħux jieklu l-qassisin tas-Santwarju.

¹¹Għax l-iġsma tal-bhejjem, li l-qassis il-kbir jieħu demmhom fis-santwarju b’sagrifiċċju għall-maħfra tad-dnubiet, jaħarquhom ’il barra mill-kamp.

¹²Għalhekk Ġesù wkoll bata ’l barra minn bieb il-belt biex bid-demm tiegħu nnifsu jqaddes lill-poplu.

¹³Ejjew mela noħorġu niltaqgħu miegħu ’l barra mill-kamp mgħobbijin bl-għajb li rafa’ hu.

¹⁴Għax aħna hawnhekk ma għandniex belt li tibqa’ għal dejjem, iżda qegħdin infittxu dik li għad trid tiġi.

¹⁵B’Ġesù, mela, ejjew noffru f’kull ħin lil Alla sagrifiċċju ta’ tifħir, jiġifieri l-kelma ta’ xufftejna li tistqarr ismu.

¹⁶Tinsewx tagħmlu l-ġid lill-oħrajn, u taqsmu bejnietkom dak li għandkom, għax b’sagrifiċċji bħal dawn jitgħaxxaq Alla.

¹⁷Oqogħdu għal dawk li jmexxukom, u obduhom, għax huma jgħassu fuqkom għall-ġid tagħkom, bħala nies li għad iridu jagħtu kont tagħkom. Hekk huma jaqdu dan id-dmir bil-ferħ, u mhux bi swied il-qalb; għax dan ma jkun jiswielkom ta’ ebda ġid.

¹⁸Itolbu għalina, għax aħna nemmnu li għandna kuxjenza safja billi rridu nġibu ruħna sewwa f’kollox.

¹⁹Dan wisq aktar nitlobkom tagħmluh biex nerġa’ nkun magħkom mill-aktar fis.

²⁰U Alla tas-sliem, li bis-saħħa tad-demm tal-patt ta’ dejjem qajjem mill-imwiet lil Sidna Ġesù, li hu r-Ragħaj il-kbir tan-nagħaġ,

²¹iwettaqkom b’kull ħaġa tajba, biex tagħmlu r-rieda tiegħu; ħalli jagħmel hu fina dak li jogħġob lilu b’Ġesù Kristu, li lilu l-glorja għal dejjem ta’ dejjem! Ammen.

²²Nitlobkom, imbagħad, l-aħwa, biex tilqgħu bis-sabar dan il-kliem ta’ twissija, li ktibtilkom fil-qosor.

²³Ngħarrafkom li ħuna Timotju ġie meħlus. Jekk ikun hawn fil-ħin, ikun miegħi meta narakom.

²⁴Sellu għall-mexxejja tagħkom kollha u għall-qaddisin kollha. Isellu għalikom ħutna tal-Italja[31].

²⁵Il-grazzja magħkom ilkoll[32]!