Read Maltese Bible with DC – IL-BIBBJA IL-KOTBA MQADDSA LHUD 2 Bible Online

LHUD 2 - Maltese Bible with DC – IL-BIBBJA IL-KOTBA MQADDSA bible

LHUD 2

¹Għalhekk għandna nagħtu ħafna aktar kas ta’ dak li smajna, li ma mmorrux nitbiegħdu ’l barra mit-triq.

²Għax jekk il-kelma li ngħatat permezz tal-anġli[3] kienet tiswa tant li min ma kienx iħarisha, jew ma kienx joqgħod għaliha, kien jieħu l-ħlas li ħaqqu,

³kif nistgħu neħilsuha aħna jekk inwarrbu salvazzjoni hekk kbira? Din hi salvazzjoni li ngħatat l-ewwel bil-fomm tal-Mulej stess, u mbagħad wassluha sħiħa lilna dawk li semgħuh.

⁴Ma’ tagħhom Alla żied ix-xhieda tiegħu b’sinjali u għeġubijiet u ħafna għemejjel setgħana, u wkoll bid-doni tal-Ispirtu s-Santu mqassmin skont ir-rieda tiegħu.

⁵Id-dinja li għandha tiġi, li fuqha qegħdin nitkellmu, Alla ma qegħedhiex taħt is-setgħa tal-anġli.

⁶X’imkien fl-Iskrittura hemm xhieda li tgħid hekk: “X’inhu l-bniedem biex tiftakar fih, jew bin il-bniedem biex tieħu ħsiebu?

⁷Ftit inqas mill-anġli int għamiltu, bil-glorja u l-ġieħ żejjintu,

⁸kollox taħt riġlejh qegħedtlu.” Issa, meta jgħid li “qiegħed kollox taħt is-setgħa tiegħu”, dan ifisser li xejn ma ħalla li ma jkunx imqiegħed taħtu. Tassew li għalissa aħna għadna m’aħniex naraw kollox taħt is-setgħa tiegħu.

⁹Madankollu, lil dak li għal ftit taż-żmien kien imniżżel ftit inqas mill-anġli, lil Ġesù, aħna issa qegħdin narawh imżejjen fil-glorja u l-ġieħ minħabba fil-mewt li hu bata, biex, għall-grazzja ta’ Alla, il-mewt li daq tkun għall-ġid ta’ kulħadd.

¹⁰Għax kien jixraq li Alla, li għalih u bih sar kollox, waqt li jwassal ħafna wlied għall-glorja, jagħmel li l-Awtur tas-Salvazzjoni tagħhom[4] ikun perfett bis-saħħa tas-sofferenzi.

¹¹Għax kemm dak li jqaddes, u kemm dawk li jiġu mqaddsin, ilkoll huma mill-istess wieħed. U għalhekk Ġesù ma jistħix isejħilhom ħutu,

¹²billi jgħid: “Inxandar ismek lil ħuti, f’nofs il-ġemgħa nfaħħrek;”

¹³u wkoll: “Fih jiena nittama;” u iżjed: “Hawn jien, jien u l-ulied li Alla tani”.

¹⁴Billi l-ulied għandhom l-istess demm u ġisem, Ġesù wkoll bl-istess mod sar bħalhom, biex b’mewtu jeqred is-setgħa ta’ dak li kellu l-mewt f’idejh, jiġifieri x-Xitan,

¹⁵u jeħles ’il dawk kollha li, minħabba fil-biża’ tal-mewt, kienu mjassrin għal għomorhom kollu.

¹⁶Għax tabilħaqq, mhux lill-anġli jrid jgħin, imma lil ulied Abraham.

¹⁷Għalhekk kellu jkun jixbah lil ħutu f’kollox, biex ikun il-qassis il-kbir, ħanin u fidil f’dak li għandu x’jaqsam ma’ Alla, u biex ipatti għal dnubiet il-poplu[5].

¹⁸Għax, billi hu stess bata u kien imġarrab, jaf jgħin lil dawk li huma fit-tiġrib.