Read Maltese Bible with DC – IL-BIBBJA IL-KOTBA MQADDSA LHUD 3 Bible Online

LHUD 3 - Maltese Bible with DC – IL-BIBBJA IL-KOTBA MQADDSA bible

LHUD 3

¹Għalhekk, l-aħwa qaddisin, li għandkom sehem fis-sejħa tas-sema, aħsbu f’Ġesù, l-appostlu[6] u l-qassis il-kbir li aħna nistqarru.

²Hu kien fidil ma’ dak li ħatru kif kien ukoll Mosè fid-dar kollha ta’ Alla.

³Issa dan Ġesù kien meqjus li jistħoqqlu glorja daqshekk aqwa minn dik ta’ Mosè daqs kemm aktar ħaqqu ġieħ il-bennej mid-dar li jkun bena.

⁴Għax kull dar jibniha xi ħadd, imma Alla jibni kollox hu.

⁵Tassew li Mosè kien fidil fid-dar kollha ta’ Alla bħala qaddej, u dan għamlu b’xhieda ta’ dak li kien għad irid jgħid Alla.

⁶Imma Kristu kien fidil fuq id-dar tiegħu bħala iben. U d-dar ta’ Alla hi aħna, kemm-il darba nżommu sħaħ il-fiduċja u t-tama li bihom niftaħru[7].

⁷Għalhekk, kif jgħid l-Ispirtu s-Santu: “Jekk illum tisimgħu leħnu,

⁸la twebbsux qalbkom bħal f’jum l-irvell, jum it-tiġrib fid-deżert,

⁹fejn ġarrbuni missirijietkom biex jippruvawni, u raw kulma għamilt jien

¹⁰tul erbgħin sena. Għalhekk jien stmerrejtha lil din il-ġenerazzjoni u għedt: ‘Dawn dejjem mitlufin f’qalbhom; huma ma għarfux triqati.’

¹¹Hekk ħlift waqt il-korla tiegħi: Ma jidħlux fil-mistrieħ tiegħi.”

¹²L-aħwa, araw li f’ebda wieħed minnkom ma jkun hemm qalb imħassra bin-nuqqas ta’ twemmin li jwassal għall-firda minn Alla l-ħaj.

¹³Imma agħmlu l-qalb lil xulxin kull jum, sakemm inkunu għadna nistgħu ngħidu “illum”, biex ħadd minnkom ma jiġġarraf mid-dnub u jwebbes qalbu.

¹⁴Għax aħna għandna sehem fi Kristu, jekk inżommu sħiħa sal-aħħar it-tama li kellna fil-bidu.

¹⁵Jingħad fl-Iskrittura: “Jekk illum tisimgħu leħnu, la twebbsux qalbkom bħal f’jum l-irvell.”

¹⁶U min huma dawk li semgħu u qamu kontrih? Mhux dawk kollha li ħarġu mill-Eġittu bis-saħħa ta’ Mosè?

¹⁷U lil min stmerr għal erbgħin sena? Mhux lil dawk li dinbu, u li l-iġsma tagħhom waqgħu mejta fid-deżert?

¹⁸U għal min ħalef li ma jidħlux fil-mistrieħ tiegħu, jekk mhux għal dawk li ma ridux jisimgħu?

¹⁹Hekk naraw li huma ma setgħux jidħlu minħabba fin-nuqqas ta’ twemmin tagħhom.