Read Maltese Bible with DC – IL-BIBBJA IL-KOTBA MQADDSA LHUD 5 Bible Online

LHUD 5 - Maltese Bible with DC – IL-BIBBJA IL-KOTBA MQADDSA bible

LHUD 5

¹Kull qassis il-kbir meħud minn fost il-bnedmin, hu mqiegħed għall-bnedmin f’dak li għandu x’jaqsam ma’ Alla, biex joffri għotjiet u sagrifiċċji għad-dnubiet.

²Hu dak li jista’ jagħder ’il dawk li ma jafux u li jiżbaljaw, għax huwa mlibbes bid-dgħufija;

³u minħabba f’hekk għandu joffri sagrifiċċji għad-dnubiet tiegħu wkoll, bħalma joffrihom għad-dnubiet tal-poplu.

⁴Ħadd m’għandu jieħu b’idejh dal-ġieħ għalih innifsu, imma biss min hu msejjaħ minn Alla, sewwasew kif kien imsejjaħ Aron.

⁵Għax hekk ukoll Kristu ma tax lilu nnifsu l-ġieħ li jkun il-qassis il-kbir, imma dan tahulu Alla, li qallu: “Ibni int; illum jien nissiltek.”

⁶U kif jgħid ukoll band’oħra: “Int qassis għal dejjem skont l-ordni ta’ Melkisedek.”

⁷Meta kien jgħix fuq din l-art, Kristu offra talb u suppliki b’leħen għoli u bid-dmugħ lil dak li seta’ jsalvah mill-mewt. U kien mismugħ minħabba fil-qima tiegħu lejn Alla.

⁸Għad li kien Iben, tgħallem minn dak li bata xi tfisser l-ubbidjenza.

⁹U, billi laħaq il-perfezzjoni, sar awtur tas-salvazzjoni ta’ dejjem għal kull min jisma’ minnu,

¹⁰wara li Alla għamlu l-qassis il-kbir skont l-ordni ta’ Melkisedek.

¹¹Fuq dan Melkisedek għandna ħafna xi ngħidu, ħwejjeġ tqal biex tfissirhom, ladarba intom sirtu tqal biex tisimgħuhom.

¹²Tant hu hekk li għalkemm issa jmisskom sirtu mgħallmin, għadkom teħtieġu ’l min jgħallimkom mill-ġdid l-ewwel elementi tal-kelma ta’ Alla; ġejtu fil-bżonn li tieħdu l-ħalib, u mhux ikel sħiħ.

¹³Issa kull min jieħu l-ħalib ma jifhimx il-kliem tal-ġustizzja, għax għadu tarbija.

¹⁴Imma l-ikel sħiħ hu tal-kbar, ta’ dawk li biż-żmien huma mdorrija jagħżlu bejn it-tajjeb u l-ħażin.