Read Maltese Bible with DC – IL-BIBBJA IL-KOTBA MQADDSA LHUD 6 Bible Online

LHUD 6 - Maltese Bible with DC – IL-BIBBJA IL-KOTBA MQADDSA bible

LHUD 6

¹Mela ħallina mill-ewwel elementi tat-tagħlim ta’ Kristu, u nimxu ’l quddiem lejn dak li hu aktar perfett. Ma għandniex għalfejn nerġgħu nibdew mill-bidu bl-indiema tal-għemejjel il-mejta tagħha u bil-fidi f’Alla,

²bit-tagħlim dwar ħasil[10] u tqegħid tal-idejn u dwar il-qawmien mill-imwiet u l-ġudizzju ta’ dejjem.

³Ħa nimxu ’l quddiem, kif issa se nagħmlu, jekk Alla jrid.

⁴Għax ma jistax ikun li traġġa’ lura għall-indiema lil dawk li, wara li darba sfaw imdawla, wara li daqu d-don tas-sema fl-Ispirtu s-Santu,

⁵wara li daqu t-tjubija tal-kelma ta’ Alla u l-qawwa taż-żmien li għad irid jiġi,

⁶imbagħad reġgħu waqgħu; għaliex dawn, bl-istess imġiba tagħhom, jerġgħu jsallbu lill-Iben ta’ Alla u jwaqqgħuh għat-tmaqdir.

⁷L-art tixrob ix-xita li sikwit taqa’ fuqha; jekk hi tagħti wċuħ tajba lil dawk li għalihom tinħadem, hi jkollha l-barka ta’ Alla;

⁸imma jekk tagħti xewk u għollieq, għal xejn ma tkun tiswa, imma tkun waslet biex tiġbed fuqha s-saħta u tispiċċa biex jaħarquha.

⁹Għalkemm qiegħed inkellimkom hekk, għeżież tiegħi, jiena ċert li għalikom hemm ħwejjeġ aħjar li għandhom x’jaqsmu mas-salvazzjoni tagħkom.

¹⁰Għax Alla mhux se jkun hekk inġust li jinsa dak li intom għamiltu u l-imħabba li wrejtu lejn ismu meta qdejtu u għadkom taqdu lill-qaddisin.

¹¹Imma jiena nixtieq li kull wieħed minnkom juri l-istess ħerqa, biex it-tama tagħkom tilħaq il-milja tagħha sal-aħħar.

¹²Ma nixtiqukomx li taqgħu fl-għażż, imma li tgħixu fuq l-eżempju ta’ dawk li bil-fidi u s-sabar jiksbu l-wegħdiet.

¹³Meta Alla għamel il-wegħda lil Abraham, billi ma kienx hemm aqwa minnu biex jaħlef bih, ħalef bih innifsu

¹⁴u qal: “Inwiegħed tassew li nimliek b’kull barka u nkattarlek nislek bil-bosta.”

¹⁵Hekk Abraham kiseb il-wegħda, wara li stenna bis-sabar.

¹⁶Il-bnedmin jaħilfu b’min hu aqwa minnhom, u l-ġurament li jsaħħaħ kliemhom jaqtgħalhom kull kwistjoni.

¹⁷U hekk Alla, meta lill-werrieta tal-wegħda ried jurihom b’mod aktar qawwi li r-rieda tiegħu ma titbiddilx, rabat lilu nnifsu b’ġurament,

¹⁸biex bis-saħħa ta’ żewġ atti li ma jitreġġgħux lura[11], u li jagħtu xhieda li Alla ma jigdibx, aħna, li sibna l-kenn, ikollna qalbna qawwija sewwa li niksbu t-tama li hemm lesta għalina.

¹⁹Din it-tama hija għalina bħal ankra tar-ruħ, sħiħa u qawwija; biha aħna nidħlu ’l ġewwa mill-velu[12],

²⁰fejn qabilna daħal Ġesù għalina meta sar għal dejjem il-qassis il-kbir skont l-ordni ta’ Melkisedek.