Read Maltese Bible with DC – IL-BIBBJA IL-KOTBA MQADDSA LHUD 7 Bible Online

LHUD 7 - Maltese Bible with DC – IL-BIBBJA IL-KOTBA MQADDSA bible

LHUD 7

¹Għax dan Melkisedek, sultan ta’ Salem u qassis ta’ Alla l-għoli, xħin Abraham kien ġej lura mix-xebgħa li kien ta lis-slaten, ħareġ jiltaqa’ miegħu u bierku;

²lilu mbagħad Abraham tah sehem minn kollox, bħala għexur. Isem Melkisedek ifisser l-ewwel nett “Sultan tal-Ġustizzja[13]”, imbagħad “Sultan ta’ Salem”, jiġifieri, sultan tas-sliem.

³Hu jidher bla missier, bla omm, bla nisel, qisu la għandu bidu u lanqas tmiem ta’ ħajtu[14]. Imma, biex ikun jixbah lill-Iben ta’ Alla[15], jibqa’ qassis għal dejjem.

⁴Araw mela kemm hu kbir dak li lilu l-patrijarka Abraham tah l-għexur mill-aħjar tal-priża!

⁵Tassew li dawk fost ulied Levi li jieħdu s-saċerdozju għandhom ukoll l-ordni mil-Liġi li jieħdu l-għexur mingħand il-poplu, jiġifieri, mingħand ħuthom, għalkemm dawn ukoll imnisslin minn Abraham;

⁶iżda Melkisedek, għad li mhuwiex min-nisel tagħhom, ħa l-għexur mingħand Abraham u bierku, lilu, li kellu l-wegħdiet.

⁷Issa ma hemmx dubju li hu ż-żgħir li jitbierek mill-kbir.

⁸Iżjed: fl-ewwel każ l-għexur qegħdin jeħduhom nies li jmutu, imma fil-każ l-ieħor għandna ’l dak li minnu jingħad li għadu ħaj.

⁹Anzi, biex ngħid hekk, Levi, li jieħu l-għexur, hu stess kien intaxxat f’Abraham,

¹⁰għax kien għadu fil-ġewwieni ta’ missieru[16] meta Melkisedek iltaqa’ miegħu.

¹¹Issa, kieku l-perfezzjoni kellha tkun bis-saħħa tas-saċerdozju ta’ Levi - għax kien minħabba fih li l-poplu ħa l-Liġi - xi bżonn kien hemm li jqum qassis ieħor li jissejjaħ skont l-ordni ta’ Melkisedek u mhux skont l-ordni ta’ Aron?

¹²Għax jekk jitbiddel is-saċerdozju, jeħtieġ li titbiddel ukoll il-Liġi.

¹³U dak li fuqu jingħadu dawn il-ħwejjeġ hu minn tribù ieħor, li minnu qatt ma kien hemm ħadd mogħti għas-servizz tal-artal.

¹⁴Għax hu magħruf li l-Mulej tagħna ġej mit-tribù ta’ Ġuda[17], li fuqu Mosè qatt ma qal xejn meta tkellem fuq is-saċerdozju.

¹⁵Dan jidher wisq aktar ċar fil-każ li l-qassis l-ieħor, li jiġi, ikun jixbah lil Melkisedek,

¹⁶hu li sar qassis mhux b’liġi tan-nisel tal-ġisem, imma bil-qawwa ta’ ħajja li ma tintemmx.

¹⁷Għax għalih tixhed l-Iskrittura: “Int qassis għal dejjem skont l-ordni ta’ Melkisedek.”

¹⁸Għalhekk tħassar il-kmandament ta’ qabel, għax hu dgħajjef u bla siwi,

¹⁹billi l-Liġi xejn ma wasslet għall-perfezzjoni; imma daħlet tama aħjar li biha aħna noqorbu lejn Alla.

²⁰U dan ma sarx bla ġurament; għax waqt li dawk saru qassisin bla ġurament,

²¹dan, għall-kuntrarju, sar qassis bil-ġurament, skont il-kelma ta’ dak li għalih qal: “Ħalef il-Mulej, u ma jisgħobx bih: Int qassis għal dejjem.”

²²Daqshekk ieħor hu aqwa l-patt li tiegħu Ġesù hu l-medjatur.

²³Dawk tal-imgħoddi kienu jsiru qassisin f’għadd kbir, għax minħabba fil-mewt ma kinux jistgħu jibqgħu għal dejjem.

²⁴Imma Ġesù, billi jibqa’ għal dejjem, għandu saċerdozju li ma jintemm qatt.

²⁵Għalhekk ukoll huwa jista’ jsalva għalkollox ’il dawk li bih jersqu lejn Alla, ladarba hu jibqa’ għal dejjem ħaj biex jidħol għalihom.

²⁶Dan hu, tabilħaqq, il-qassis il-kbir li kien jgħodd għalina: qaddis, innoċenti, safi, maqtugħ mill-midinbin, merfugħ ’il fuq mis-smewwiet;

²⁷li ma għandux bżonn, bħall-qassisin il-kbar l-oħra, joffri kuljum is-sagrifiċċju, l-ewwel għad-dnubiet tiegħu stess, imbagħad għad-dnubiet tal-poplu. Dan hu għamlu darba għal dejjem, meta offra lilu nnifsu.

²⁸Għax il-Liġi tqiegħed bħala qassisin il-kbar bnedmin li huma dgħajfa; iżda l-kelma tal-ġurament, li ġiet wara l-Liġi, tqiegħed Iben, li ġie magħmul perfett għal dejjem.