Read Maltese Bible with DC – IL-BIBBJA IL-KOTBA MQADDSA LHUD 8 Bible Online

LHUD 8 - Maltese Bible with DC – IL-BIBBJA IL-KOTBA MQADDSA bible

LHUD 8

¹Din hi issa l-aqwa ħaġa li rridu ngħidu: li aħna għandna qassis hekk kbir li qagħad fuq il-lemin tat-tron tal-kobor ta’ Alla[18] fis-sema,

²ministru tas-santwarju u tat-tabernaklu veru li hu magħmul mill-Mulej u mhux mill-bnedmin.

³Kull qassis isir biex iressaq l-offerti u joffri s-sagrifiċċji; jeħtieġ għalhekk li dan ukoll ikollu xi ħaġa x’joffri.

⁴Issa, li kieku Kristu kien fuq l-art ma kien ikun qassis xejn, billi fuq l-art hawn qassisin li jressqu l-offerti skont il-Liġi.

⁵Dawn jaqdu santwarju li hu xbieha u dell ta’ dak tas-sema[19], skont ma Alla qal lil Mosè meta dan kien wasal biex iwaqqaf it-tabernaklu: “Qis li tagħmel kollox fuq il-mudell li wrejtek fuq il-muntanja.”

⁶Issa l-ministeru li kiseb Kristu hu daqshekk aqwa minn dak tal-imgħoddi daqs kemm hu aqwa l-patt li tiegħu huwa l-medjatur, għaliex hu patt mibni fuq wegħdiet aqwa.

⁷Għax kieku dak l-ewwel patt kien perfett, ma kienx ikun hemm għalfejn jagħmel patt ieħor floku.

⁸Imma Alla, għax sab x’iċanfar fihom, qalilhom: “Ara, wasal iż-żmien, jgħid il-Mulej, li jiena nagħmel patt ġdid mad-dar ta’ Iżrael u mad-dar ta’ Ġuda.

⁹Dan ma jkunx bħall-patt li jien għamilt ma’ missirijiethom, meta qbadthom minn idhom biex noħroġhom mill-art tal-Eġittu; ladarba huma ma baqgħux iżommu mal-patt tiegħi, jiena wkoll tlaqthom, jgħid il-Mulej.

¹⁰Dan hu l-patt li jien għad nagħmel mad-dar ta’ Iżrael wara dawk il-jiem, jgħid il-Mulej: Inqiegħed il-liġijiet tiegħi f’moħħhom, u f’qalbhom niktibhom. U jiena nkun Alla tagħhom, u huma jkunu l-poplu tiegħi.

¹¹Ma jgħallmux aktar wieħed lil sieħbu u wieħed lil ħuh billi jgħidu: ‘Agħraf lill-Mulej’, għax ilkoll għad jagħrfuni, miż-żgħir nett sal-kbir nett fosthom.

¹²Jiena nħenn għalihom fil-ħażen tagħhom, u fi dnubiethom ma niftakarx iżjed.”

¹³Meta tkellem minn patt “ġdid”, wera li dak ta’ qabel kien qadim. Issa dak li jiqdiem u jixjieħ ikun wasal biex jispiċċa.