Read Maltese Bible with DC – IL-BIBBJA IL-KOTBA MQADDSA LHUD 9 Bible Online

LHUD 9 - Maltese Bible with DC – IL-BIBBJA IL-KOTBA MQADDSA bible

LHUD 9

¹L-ewwel patt kellu wkoll il-liġijiet tal-kult u s-santwarju, għalkemm dan kien santwarju tal-art.

²Fis-santwarju kien hemm tinda, dik ta’ quddiem, li fiha kien hemm il-kandelabru u l-mejda bil-ħobż tal-preżenza quddiem il-Mulej; din it-tinda kienet tissejjaħ “il-Post Qaddis”.

³Imbagħad, wara t-tieni velu, kien hemm tinda oħra, li kienet tissejjaħ “il-Post il-Qaddis”.

⁴F’din kien hemm l-artal tad-deheb għall-inċens, u l-arka tal-patt, miksija minn kull naħa bid-deheb, li fiha kien hemm bieqja tad-deheb bil-manna, il-virga ta’ Aron li minnha kien ħareġ il-ward, u t-twavel tal-patt.

⁵Fuq l-arka kien hemm il-kerubini tal-glorja jgħattu l-għatu tat-tpattija għad-dnubiet. M’hemmx għalfejn hawnhekk nidħlu fl-irqaqat kollha.

⁶Skont dan it-taqsim, fl-ewwel tinda jidħlu l-qassisin f’kull żmien biex jagħmlu s-servizz ritwali;

⁷imma fit-tieni waħda jidħol biss il-qassis il-kbir, darba fis-sena biss, u ma jidħolx mingħajr ma jieħu miegħu d-demm, li hu joffri għalih innifsu u għan-nuqqasijiet[20] li jagħmel il-poplu bla ma jkun jaf.

⁸B’dan l-Ispirtu s-Santu jrid ifisser illi t-triq li tieħu għas-santwarju għadha mhix miftuħa sakemm għad hemm wieqfa l-ewwel tinda.

⁹Din hi tixbiha għal dan iż-żmien. Skont din it-tixbiha, l-għotjiet u s-sagrifiċċji li wieħed joffri ma jistgħux jagħmlu perfetta l-kuxjenza ta’ min ikun qiegħed joffri l-kult;

¹⁰huma għandhom x’jaqsmu biss ma’ ikel, xorb u ħafna ċerimonji ta’ ħasil, liġijiet li jolqtu l-ġisem, mogħtija sa ma jasal żmien it-tiġdid[21].

¹¹Imma Kristu ġie bħala l-qassis il-kbir tal-ġid li diġà ġie[22]. Hu daħal minn tinda aqwa u aktar perfetta li mhijiex maħduma b’idejn il-bnedmin, jiġifieri mhijiex ħolqien ta’ din l-art;

¹²hu daħal darba għal dejjem fis-Santwarju, mhux bis-saħħa tad-demm tal-mogħoż u tal-għoġiela, imma bis-saħħa ta’ demmu stess, u hekk kiseb fidwa għal dejjem.

¹³Jekk id-demm tal-mogħoż u tal-gniedes u l-irmied tal-għoġla mraxxax fuq dawk li huma mniġġsa jista’ jqaddishom billi jagħtihom l-indafa tal-ġisem,

¹⁴kemm aktar id-demm ta’ Kristu, li bl-Ispirtu ta’ dejjem offra lilu nnifsu vittma safja lil Alla, jista’ jnaddaf il-kuxjenza tagħkom mill-għemil mejjet biex taqdu lil Alla ħaj!

¹⁵U għalhekk hu medjatur ta’ patt ġdid, testment ġdid[23], biex, wara li seħħet il-mewt għall-fidwa tal-ħtijiet li saru fi żmien il-patt ta’ qabel, dawk li huma msejħa minn Alla jiksbu l-wirt ta’ dejjem li hu wegħedhom.

¹⁶Fejn ikun hemm testment, ikun jeħtieġ li tixxandar il-mewt ta’ min għamlu.

¹⁷Għax testment jibda jgħodd wara l-mewt, u ebda saħħa ma jkollu sakemm dak li jkun għamlu jibqa’ ħaj.

¹⁸Kien għalhekk li anqas l-ewwel patt ma twettaq mingħajr demm.

¹⁹Għax Mosè, wara li nieda lill-poplu l-kmandamenti kollha kif titlob il-Liġi, ħa d-demm tal-għoġiela u tal-mogħoż flimkien mal-ilma, u bis-suf aħmar u l-friegħi tal-issopu raxx l-istess ktieb u l-poplu kollu,

²⁰u qal: “Dan hu d-demm tal-patt li Alla ordnalkom[24].”

²¹Hekk ukoll raxx bid-demm it-tabernaklu u t-tagħmir kollu tal-kult.

²²Tabilħaqq, skont il-Liġi, tista’ tgħid kollox jissaffa bid-demm; u bla tixrid tad-demm ma hemmx maħfra.

²³Jekk mela kien meħtieġ li xbihat tal-ħwejjeġ tas-sema jissaffew b’dawn ir-riti, dawn l-istess ħwejjeġ tas-sema kellhom jissaffew b’sagrifiċċji aqwa.

²⁴Għax Kristu ma daħalx f’santwarju magħmul b’idejn il-bnedmin li hu biss xbieha tas-santwarju veru, imma daħal fis-sema stess, biex issa jidher għalina quddiem Alla.

²⁵U daħal hemm mhux biex minn żmien għal żmien joffri lilu nnifsu bħalma l-qassis il-kbir jidħol kull sena fis-santwarju biex joffri demm ħaddieħor.

²⁶Li kieku kien hekk, kien ikollu jbati ħafna drabi sa mill-ħolqien tad-dinja. Iżda issa deher darba għal dejjem, meta waslet il-milja taż-żminijiet, biex ineħħi d-dnub bis-sagrifiċċju tiegħu nnifsu.

²⁷U kif hu miktub għall-bnedmin li għandhom imutu darba biss, u wara dan isir il-ġudizzju,

²⁸hekk ukoll Kristu, wara li offra lilu nnifsu darba biss biex jitgħabba bid-dnubiet tal-kotra, għad jerġa’ jidher darb’oħra, mhux biex ineħħi d-dnubiet, imma biex isalva lil dawk li qegħdin jistennewh bil-ħerqa.