Read Maltese Bible with DC – IL-BIBBJA IL-KOTBA MQADDSA ĠAKBU 4 Bible Online

ĠAKBU 4 - Maltese Bible with DC – IL-BIBBJA IL-KOTBA MQADDSA bible

ĠAKBU 4

¹Mnejn hu ġej il-ġlied u t-tilwim bejnietkom? Jaqaw mhux minn dan, mill-passjonijiet li hemm jitqabdu f’ġisimkom?

²Tixtiequ, u ma ssibu xejn; imbagħad toqtlu, u tgħiru, bla ma tistgħu tieħdu xejn; imbagħad tiġġieldu u titqabdu. Ma għandkom xejn għax ma titolbux.

³Titolbu, u ma tiksbux, għax titolbu ħażin: titolbu ħa jkollkom xi tberbqu fix-xalar.

⁴Nies adulteri[12]! Ma tafux li l-ħbiberija mad-dinja hija l-għadu ta’ Alla? Min mela jrid isir ħabib tad-dinja huwa għadu ta’ Alla.

⁵Taħsbu li għalxejn l-Iskrittura tgħid: “L-Ispirtu li jgħammar fina jħobb b’imħabba għajjura[13]”?

⁶Hu jagħti grazzja akbar minn hekk: għalhekk l-Iskrittura tgħid li “Alla jieqaf lill-kburi, u jagħti l-grazzja lill-umli”.

⁷Mela oqogħdu għar-rieda ta’ Alla. Ieqfu lix-xitan, u hu jaħrab minnkom.

⁸Ersqu lejn Alla, u hu jersaq lejkom. Midinbin, naddfu idejkom; nies ta’ moħħ imħawwad, saffu qlubkom.

⁹Agħrfu l-miżerja tagħkom, ibku, u olfqu, ħallu d-daħk tagħkom jinbidel f’niket u l-ferħ tagħkom f’diqa.

¹⁰Iċċekknu quddiem il-Mulej, u hu jerfagħkom.

¹¹Toqogħdux tqassu fuq xulxin, l-aħwa. Min iqassas fuq ħuh u jiġġudika lil ħuh, ikun qiegħed iqassas fuq il-Liġi u jiġġudika l-Liġi; imma jekk inti tiġġudika l-Liġi, ma tkunx qiegħed tagħmel dak li trid il-Liġi, imma ssir imħallef.

¹²Wieħed biss huwa dak li jagħmel il-Liġi, wieħed biss l-Imħallef: dak li għandu s-setgħa jeħles u jeqred. Int min int biex tiġġudika ’l ħaddieħor?

¹³Issa ejjew, intom li tgħidu: “Illum jew għada mmorru f’din jew dik il-belt u nqattgħu sena hemmhekk, nixtru u nbigħu u nagħmlu l-flus,”

¹⁴u intom ma tafux x’għad isir għada. Għax x’inhi ħajjitkom? Intom bħal fwar li jidher għal ftit u mbagħad jgħib.

¹⁵Flok ma tgħidu: “Jekk il-Mulej irid, ngħixu u nagħmlu dan jew dak,”

¹⁶tiftaħru bil-frugħat tagħkom! Kull ftaħir bħal dan huwa ħażen.

¹⁷Jekk mela xi ħadd jagħraf it-tajjeb li għandu jagħmel u ma jagħmlux, jagħmel dnub.