Read Maltese Bible with DC – IL-BIBBJA IL-KOTBA MQADDSA ĠAKBU 5 Bible Online

ĠAKBU 5 - Maltese Bible with DC – IL-BIBBJA IL-KOTBA MQADDSA bible

ĠAKBU 5

¹Ejjew issa, intom l-għonja, ibku u ixhru fuq l-għawġ li ġej fuqkom!

²Ġidkom tħassar, ħwejjiġkom kilithomlkom il-kamla.

³Id-deheb u l-fidda tagħkom rabbew is-sadid, u s-sadid tagħkom għad jixhed kontra tagħkom u jiklilkom ġisimkom bħan-nar. Ħżintu l-ġid fl-aħħar jiem!

⁴Ara, il-ħlas tal-ħaddiema li ħasdu l-għelieqi tagħkom - ħlas li intom żammejtuhulhom bil-qerq[14] - qiegħed jgħajjat kontra tagħkom, u l-biki ta’ dawk li ħasdu wasal f’widnejn il-Mulej tal-eżerċti.

⁵Fuq l-art għextu fix-xalar u l-lussu; qgħadtu tissemmnu għall-jum tal-qatla.

⁶Intom ikkundannajtu l-ġust, qtiltuh għax ma jistax jiqfilkom!

⁷L-aħwa, stabru, sa ma jasal il-Mulej. Ara, il-bidwi joqgħod b’sabar kbir jistenna l-frott għażiż tal-art, sa ma jieħu x-xita bikrija u mwaħħra.

⁸Stabru intom ukoll; qawwu qalbkom, għax il-miġja tal-Mulej hi fil-qrib.

⁹Tgergrux kontra xulxin, l-aħwa, biex ma tkunux iġġudikati: araw, l-Imħallef qiegħed hawn, quddiem il-bieb!

¹⁰Bħala eżempju tat-tbatija u s-sabar, l-aħwa, ħudu l-profeti li tkellmu f’isem il-Mulej.

¹¹Dawk li żammew sħiħ sal-aħħar, araw, aħna nqisuhom bħala hienja. Smajtu bis-sabar ta’ Ġob, u tafu kif bl-għajnuna tal-Mulej hu għalaq jiem ħajtu; għax il-Mulej jaf jagħder, u hu ħanin bil-bosta.

¹²Imma fuq kollox, ħuti, la taħilfux, u la bis-sema u la bl-art, u tieħdu ebda ġurament ieħor; iżda ħallu l- “iva” tagħkom ikun “iva” u l- “le” tagħkom ikun “le”, biex hekk ma tkunux ikkundannati.

¹³Hemm xi ħadd fostkom imnikket? Ħalli dan jitlob. Hemm xi ħadd ferħan? Ħalli jkanta s-salmi.

¹⁴Hemm xi ħadd marid fostkom? Ħalli dan isejjaħ lill-presbiteri tal-Knisja, biex dawn jitolbu għalih u jidilkuh biż-żejt f’isem il-Mulej;

¹⁵it-talba tal-fidi ssalva lill-marid, u l-Mulej iqajmu; u jekk ikun għamel xi dnubiet, jinħafrulu.

¹⁶Stqarru wieħed lill-ieħor in-nuqqasijiet tagħkom u itolbu għal xulxin, biex hekk tfiqu. It-talba tal-bniedem ġust magħmula bil-ħerqa għandha qawwa kbira.

¹⁷Elija bniedem bħalna kien: meta talab bil-ħerqa biex ma tagħmilx ix-xita, għal tliet snin u sitt xhur sħaħ ix-xita ma għamlitx fuq l-art.

¹⁸U meta raġa’ talab, is-sema radd ix-xita u l-art għamlet il-frott.

¹⁹Ħuti, jekk xi ħadd minnkom jitbiegħed mis-sewwa u xi ħaddieħor iġibu lura,

²⁰dan għandu jkun jaf li min iressaq lura mit-triq il-ħażina ’l xi midneb, jeħles ruħu mill-mewt u jostor kotra ta’ dnubiet[15].