Read Maltese Bible with DC – IL-BIBBJA IL-KOTBA MQADDSA 1 PIETRU 2 Bible Online

1 PIETRU 2 - Maltese Bible with DC – IL-BIBBJA IL-KOTBA MQADDSA bible

1 PIETRU 2

¹Warrbu, mela, ’l bogħod minnkom kull ħażen u kull qerq; warrbu l-wiċċ b’ieħor, u l-għira u kull xorta ta’ tqassis.

²Bħal trabi tat-twelid, ixxennqu għall-ħalib safi, il-ħalib tar-ruħ, biex bih tikbru sa ma taslu għas-salvazzjoni,

³jekk intom tabilħaqq doqtu kemm hu tajjeb il-Mulej.

⁴Ersqu, mela, lejh, li hu dik il-ġebla ħajja li kienet imwarrba mill-bennejja, imma magħżula minn Alla bħala ġebla għażiża.

⁵U intom ukoll, bħal ġebel ħaj, inbnew f’dar spiritwali, saċerdozju qaddis, biex toffru sagrifiċċji spiritwali li jogħġbu ’l Alla permezz ta’ Ġesù Kristu.

⁶Għax hekk hemm miktub fl-Iskrittura: “Jien inqiegħed f’Sijon ġebla tax-xewka, magħżula u għażiża; min jemmen fiha ma jkollux għax jitħawwad.”

⁷Għalikom, mela, li temmnu, dan huwa ġieħ! Għal dawk li ma jemmnux, “din l-istess ġebla li warrbu l-bennejja saret il-ġebla tax-xewka”

⁸u “ġebla ta’ tiġrif u tfixkil;” tfixklu għax ma qagħdux għall-kelma ta’ Alla; għal dan kienu ddestinati.

⁹Imma intom ġens maħtur, saċerdozju rjali[6], nazzjon qaddis, poplu li Alla kiseb għalih, biex ixxandru t-tifħir ta’ dak li sejħilkom mid-dlam għad-dawl tiegħu tal-għaġeb.

¹⁰Intom li darba ma kontux poplu, issa sirtu l-poplu ta’ Alla; intom li darba ma kontux issibu ħniena, issa sibtu l-ħniena tiegħu.

¹¹Ħuti għeżież, nitlobkom biex bħala barranin u għorba tiċċaħħdu mix-xewqat tal-ġisem li jitqabdu kontra r-ruħ.

¹²Ġibu rwieħkom sewwa qalb il-pagani biex, jekk huma jgħidu fuqkom bħallikieku kontu nies ħżiena, jaraw sewwa l-għemil tajjeb tagħkom u jsebbħu ’l Alla meta jasal jum iż-żjara tiegħu.

¹³Għall-imħabba tal-Mulej baxxu raskom għal kull awtorità tal-bnedmin: kemm għas-sultan bħala l-aqwa wieħed,

¹⁴u kemm għall-gvernaturi, li hu qiegħed biex jikkastigaw lil min jagħmel il-ħażin u jfaħħru lil min jagħmel it-tajjeb.

¹⁵Għax din hija r-rieda ta’ Alla: li bl-għemil tajjeb tagħkom issikktu fomm l-injuranza ta’ nies bla għaqal.

¹⁶Għixu bħala nies ħielsa, mhux li tinqdew bil-ħelsien tagħkom biex bħallikieku tgħattu l-ħażen, imma bħala qaddejja ta’ Alla.

¹⁷Agħtu ġieħ lil kulħadd. Ħobbu lill-aħwa, qimu lil Alla, weġġħu lis-sultan.

¹⁸Intom, qaddejja[7], oqogħdu bir-rispett kollu għas-sidien tagħkom; mhux biss għal dawk li huma twajbin u dħulin, imma wkoll għal dawk li huma ħorox.

¹⁹Għax din hi grazzja li wieħed ibati bla ħtija għal Alla, u jieħu bis-sabar it-tbatija.

²⁰X’mertu jkollkom li tieħdu bis-sabar is-swat meta tkunu għamiltu l-ħażen? Imma jekk tagħmlu t-tajjeb u ssofru t-tbatija bis-sabar, din tkun grazzja quddiem Alla.

²¹Għal dan intom kontu msejħa għax Kristu wkoll bata għalikom u ħallielkom eżempju biex timxu fuq il-passi tiegħu.

²²“Hu li ma kien għamel ebda dnub, u ebda qerq ma nstab f’fommu,”

²³meta għajruh ma weġibx bit-tagħjir; meta bata ma heddidx imma ħalla f’idejn l-Imħallef ġust.

²⁴Hu tgħabba bi dnubietna sa fuq is-salib, biex aħna mmutu għad-dnubiet u ngħixu għall-ġustizzja. Bil-ġrieħi tiegħu intom fieqtu.

²⁵Intom kontu bħal nagħaġ mitlufa, imma issa rġajtu lura għand ir-Ragħaj u l-Għassies ta’ ruħkom.