Read Maltese Bible with DC – IL-BIBBJA IL-KOTBA MQADDSA 2 PIETRU 3 Bible Online

2 PIETRU 3 - Maltese Bible with DC – IL-BIBBJA IL-KOTBA MQADDSA bible

2 PIETRU 3

¹Din hi t-tieni ittra li qiegħed niktbilkom, ħuti għeżież. Fihom it-tnejn nifhem inqajjem fikom ħsibijiet sbieħ billi nfakkarkom f’dak li diġà tafu.

²Ftakru fil-kliem li diġà qalu l-profeti qaddisa, u wkoll fil-kmandament tal-Mulej[6] u s-Salvatur tagħna, li wasslulkom l-appostli tagħkom.

³Dan għandkom tkunu tafu, l-ewwel nett: li fl-aħħar jiem jiġu nies kollhom tmaqdir u jwaqqgħu kollox għaż-żufjett, nies li jaġixxu skont ix-xewqat ħżiena tagħhom;

⁴u jibdew jgħidu: “Fejn hi l-wegħda tal-miġja tiegħu? Għax sa minn meta mietu missirijietna[7], kollox baqa’ miexi kif kien sa mill-bidu tal-ħolqien.”

⁵Dawn jinsew, għax iridu, li sa minn żmien ilu kienu s-smewwiet u l-art, li saret mill-ilma u żżomm bl-ilma bis-saħħa tal-kelma ta’ Alla;

⁶kien ukoll bl-ilma li d-dinja ta’ dak iż-żmien tgħarrqet u ntilfet.

⁷Hekk ukoll bl-istess kelma ta’ Alla s-smewwiet u l-art tal-lum huma merfugħin għall-ħruq, miżmumin sa jum il-ġudizzju, li jkun jum it-telfien tal-ħżiena.

⁸Dan għandkom tkunu tafu, ħuti għeżież: li quddiem il-Mulej jum wieħed hu bħal elf sena, u elf sena bħal jum wieħed.

⁹Mhux għax jiddawwar il-Mulej li jtemm il-wegħdiet tiegħu, kif jaħsbu xi wħud, imma qiegħed jistabar bikom għax ma jridx li xi ħadd jintilef, imma li kulħadd jersaq għall-indiema.

¹⁰Jasal, tabilħaqq, Jum il-Mulej bħal ħalliel; jintemmu mbagħad is-smewwiet bi ħsejjes kbar, jinħallu bin-nar l-elementi tad-dinja, u l-art b’kulma fiha tkun maħruqa min-nar[8].

¹¹Ladarba hekk kollox għandu jintemm, araw daqsxejn kif għandkom iġġibu ruħkom, kemm għandha tkun qaddisa u tajba ħajjitkom,

¹²waqt li tistennew b’ħerqa kbira l-miġja tal-Jum ta’ Alla. Hu minħabba f’dan il-Jum li s-smewwiet jinħarqu u jinħallu, u l-elementi tad-dinja jinqerdu bin-nar.

¹³Imma aħna, skont il-wegħda tiegħu, nistennew smewwiet ġodda u art ġdida, li fihom tgħammar il-ġustizzja[9].

¹⁴Għalhekk, ħuti għeżież, waqt li nistennew dan kollu, qisu li jsibkom fis-sliem, bla tebgħa u bla dnub.

¹⁵Is-sabar li bih il-Mulej jeħodna qisuh bħala salvazzjoni tagħna. Hekk ukoll kitbilkom Pawlu, ħuna l-għażiż, skont l-għerf li ngħata lilu.

¹⁶Hekk kiteb fl-ittri kollha tiegħu, li fihom tkellem fuq din il-ħaġa. Dawn l-ittri fihom xi ħwejjeġ li huma tqal biex wieħed jifhimhom, u dawk li ma jifhmux u li mhumiex sħaħ biżżejjed ifissruhom ħażin għat-telfien tagħhom stess; hekk jagħmlu wkoll mill-kotba l-oħra tal-Iskrittura.

¹⁷Intom, mela, ħuti għeżież, ladarba tafu dan, għassu sewwa li ma tisfawx maħkuma mill-iżbalji ta’ dawn in-nies bla rażan u taqgħu mnejn tinsabu fis-sod.

¹⁸Ikbru fil-grazzja u fl-għarfien ta’ Sidna u s-Salvatur tagħna Ġesù Kristu. Lilu glorja issa u għal dejjem.