Read Maltese Bible with DC – IL-BIBBJA IL-KOTBA MQADDSA MĦALLFIN 12 Bible Online

MĦALLFIN 12 - Maltese Bible with DC – IL-BIBBJA IL-KOTBA MQADDSA bible

MĦALLFIN 12

¹U nġabru l-Efrajmin u għaddew għal Safon, u qalu lil Ġeftaħ: “Għala mort taħbat għall-Għammonin u ma sejjaħtilniex biex niġu miegħek? Naħarqulek darek fuqek.”

²U Ġeftaħ weġibhom: “Kelli xi ngħid sewwa ma’ wlied Għammon, jien u niesi. Sejjaħtilkom u intom ma ġejtux teħilsuni minn idejhom.

³Meta rajt li ħadd ma ġie jgħinni, qegħedt ħajti f’idejja, u mort għall-Għammonin; u l-Mulej irħiehom f’idejja. Għaliex mela tlajtu għalija llum biex teħduha miegħi?”

⁴Ġeftaħ imbagħad sejjaħ l-irġiel kollha ta’ Gilgħad u ħabtu għall-Efrajmin, u l-irġiel ta’ Gilgħad tawhom xebgħa - għax l-Efrajmin kienu qalulhom: “Intom il-Gilgħadin, nies maħruba minn Efrajm, f’nofs Efrajm, u f’nofs Manassi” -

⁵Il-Gilgħadin ħatfu l-mogħdijiet tal-Ġordan lejn Efrajm u meta xi ħadd maħrub mill-Efrajmin kien jgħid: “Ħa ngħaddi,” l-irġiel ta’ Gilgħad kienu jistaqsuh: “Int raġel minn Efrajm?”; jekk kien iwieġeb: “Le”, kienu jgħidulu:

⁶“Għid mela ‘xibbolet’[19]; u kien jgħid: ‘sibbolet!’ għax ma kienx ikun jista’ jgħidha sewwa, huma kienu jaqbduh u joqtluh ħdejn il-mogħdijiet tal-Ġordan. U f’dak iż-żmien mietu tnejn u erbgħin elf raġel minn Efrajm.

⁷U dam jaħkem Ġeftaħ lil Iżrael sitt snin. U meta miet Ġeftaħ il-Gilgħadi, difnuh fil-belt tiegħu ta’ Gilgħad.

⁸Warajh ħakem lil Iżrael Ibsan minn Betlehem.

⁹U kellu tletin tifel, u żewweġ tletin tifla barra mid-dar, u ġieb tletin tifla barranija għal uliedu. Ħakem fuq Iżrael għal seba’ snin.

¹⁰Meta Ibsan miet, difnuh f’Betlehem.

¹¹Warajh ħakem fuq Iżrael Elon mit-tribù ta’ Żebulun. Dan ħakem għal għaxar snin.

¹²Meta Elon mit-tribù ta’ Żebulun miet, difnuh f’Ajjalon fl-art ta’ Żebulun.

¹³Warajh ħakem fuq Iżrael Għabdon bin Ħilel minn Pirgħatun għal tmien snin.

¹⁴Kellu erbgħin tifel u tletin ulied uliedu, li kienu jirkbu fuq sebgħin felu. Ħakem fuq Iżrael għal tmien snin.

¹⁵Meta Għabdon bin Ħillel minn Pirgħatun miet, difnuh f’Pirgħatun, fl-art ta’ Efrajm fl-għoljiet tal-Għamalekin.