Read Maltese Bible with DC – IL-BIBBJA IL-KOTBA MQADDSA MĦALLFIN 13 Bible Online

MĦALLFIN 13 - Maltese Bible with DC – IL-BIBBJA IL-KOTBA MQADDSA bible

MĦALLFIN 13

¹U wlied Iżrael baqgħu jagħmlu l-ħażin f’għajnejn il-Mulej, u l-Mulej telaqhom f’idejn il-Filistin għal erbgħin sena.

²U kien hemm raġel minn Sorgħa mit-tribù ta’ Dan, jismu Manuħa, u martu kienet sterili, u ma kellhiex tfal.

³U deher l-anġlu tal-Mulej lill-mara u qalilha: “Ara, int sterili u ma għandekx tfal, imma int se titqal u tiled iben.

⁴Issa qis li ma tixrobx inbid, u anqas xorb li jsakkar, u tiekol xejn imniġġes.

⁵Għax, ara, int se titqal u tiled iben, u l-mus ma jgħaddix minn fuq rasu, għax it-tifel ikun nażir ikkonsagrat[20] lil Alla sa minn ġuf ommu, u hu jibda jeħles lil Iżrael minn id il-Filistin.”

⁶U l-mara marret tgħid lil żewġha: “Ġie ħdejja raġel ta’ Alla, wiċċu wiċċ ta’ anġlu ta’ Alla, wiċċ li jbeżżgħek tarah. Ma staqsejtux mnejn ġie, u lanqas hu ma qalli ismu.

⁷U qalli, ‘Ara, inti titqal u tiled iben, u issa tixrobx inbid jew xorb li jsakkar, u tiekol xejn imniġġes, għax it-tifel ikun nażir ikkonsagrat lil Alla sa minn ġuf ommu sakemm imut.”

⁸Imbagħad Manuħa talab lill-Mulej u qal: “Iddew, Sidi, ħa jerġa’ jiġi għandna r-raġel ta’ Alla, li bgħattilna, u jurina x’għandna nagħmlu bit-tifel li se jitweldilna.”

⁹U Alla sama’ t-talba ta’ Manuħa, u l-anġlu ta’ Alla raġa’ ġie ħdejn il-mara waqt li kienet bilqiegħda fl-għalqa, u żewġha Manuħa ma kienx magħha.

¹⁰Il-mara marret tiġri tgħid lil żewġha, u qaltlu: “Ara, raġa’ deherli r-raġel li kien deherli dakinhar.”

¹¹U Manuħa mar wara martu u resaq lejn ir-raġel u qallu: “Int dak ir-raġel li kellimt lil marti?” U hu wieġbu: “Jiena hu.”

¹²U Manuħa qallu: “Issa meta jseħħ kliemek, x’għandu jħares u jagħmel it-tifel?”

¹³U l-anġlu tal-Mulej qal lil Manuħa: “Il-mara għandha tiċċaħħad minn kulma għedtilha,

¹⁴li ma tiekol xejn milli joħroġ mid-dwieli; inbid u xorb isakkar; u ma tiekol xejn imniġġes, imma għandha tħares kulma ordnajtilha.”

¹⁵U Manuħa qal lill-anġlu tal-Mulej; “Ħallina nżommuk magħna u nsajrulek gidi.”

¹⁶U l-anġlu tal-Mulej qal lil Manuħa: “Jekk iżżommuni magħkom, ma nikolx minn ħobżok; jekk trid tagħmel sagrifiċċju tal-ħruq, offrih lill-Mulej.” Manuħa ma ntebaħx li kien l-anġlu tal-Mulej.

¹⁷Imbagħad staqsa lill-anġlu tal-Mulej: “X’jismek? Għax meta sseħħ kelmtek, aħna nkunu rridu nagħtuk ġieħ.”

¹⁸U l-anġlu tal-Mulej wieġeb: “Għala tistaqsini x’jisimni? Hu isem misterjuż!”

¹⁹U Manuħa ħa gidi bl-offerta tiegħu u offrieh b’sagrifiċċju fuq ġebla lill-Mulej, li jagħmel ħwejjeġ tal-għaġeb. U waqt li Manuħa u martu kienu jħarsu,

²⁰il-fjamma tan-nar telgħet mill-artal lejn is-sema, u l-anġlu tal-Mulej tala’ fil-fjamma tal-artal. Meta Manuħa u martu raw dan, waqgħu wiċċhom fl-art.

²¹U l-anġlu tal-Mulej ma baqax jidher aktar lil Manuħa u lil martu. Imbagħad Manuħa għaraf li kien l-anġlu tal-Mulej.

²²U Manuħa qal lil martu: “Immutu żgur, għax rajna lil Alla.”

²³U martu wieġbet: “Li kieku ried il-Mulej joqtolna ma kienx jilqa’ s-sagrifiċċju u l-offerta minn idejna, u jurina u jsemmagħna dan kollu.”

²⁴U l-mara wildet iben u semmietu Sansun, u t-tifel kiber u l-Mulej bierku.

²⁵It-tifel kiber f’Maħane-dan, bejn Sorgħa u Estawl, u l-ispirtu tal-Mulej beda jaħdem ġewwa fih.