Read Maltese Bible with DC – IL-BIBBJA IL-KOTBA MQADDSA MĦALLFIN 14 Bible Online

MĦALLFIN 14 - Maltese Bible with DC – IL-BIBBJA IL-KOTBA MQADDSA bible

MĦALLFIN 14

¹U Sansun niżel f’Timna, u hemm xeħet għajnejh fuq mara mill-bniet tal-Filistin.

²U raġa’ tala’, u għarraf lil missieru u ’l ommu, u qalilhom: “Rajt mara f’Timna mill-bniet tal-Filistin, u issa rridkom teħduhieli b’marti[21].”

³U missieru u ommu weġbuh: “Ma hemmx mara fost il-bniet ta’ ħutek u fost il-poplu kollu tiegħek, biex int tmur tieħu mara minn fost il-Filistin bla ħtin?” U Sansun wieġeb lil missieru: “Ħudli lilha, għax dik togħġobni.”

⁴U missieru u ommu ma kinux jafu li dan kien ġej mill-Mulej, għax kien qiegħed ifittex jeħodha mal-Filistin, billi dak iż-żmien il-Filistin kienu jaħkmu fuq Iżrael.

⁵U Sansun u missieru u ommu niżlu f’Timna; u xħin waslu fl-oqsma tad-dwieli ta’ Timna, Sansun jilmaħ ferħ ta’ ljun jgħajjat riesaq lejh.

⁶L-ispirtu tal-Mulej ħakem lil Sansun u dan tertqu bħalma wieħed itertaq gidi; ma kellu xejn f’idu, u lil missieru u lil ommu ma wriehom xejn x’kien għamel.

⁷U Sansun niżel u kellem lill-mara, u din għoġbitu.

⁸Meta raġa’ lura biex jeħodha, lewa biex jara l-ġisem mejjet tal-iljun, u jsib ferħ naħal u għasel.

⁹Ħa minnu f’idejh, u baqa’ sejjer jiekol fit-triq, u laħaq ’il missieru u ’l ommu, u tahom minnu u kielu; iżda ma qalilhomx li l-għasel ħadu mill-ġisem mejjet tal-iljun.

¹⁰Missieru mar jara l-mara, u hemm Sansun għamel festa, bħalma kienu jagħmlu ż-żgħażagħ.

¹¹U ġara li malli rawh għażlu tletin żagħżugħ[22] biex joqogħdu miegħu.

¹²U Sansun qalilhom: “Ħa ngħidilkom ħaġa moħġaġa, jekk tfissruhieli sewwa matul is-sebat ijiem tal-festa u ssibuha, nagħtikom tletin qmis tal-għażel u tletin tibdila ħwejjeġ.

¹³U jekk ma jirnexxilkomx tgħiduhieli tagħtuni intom tletin biċċa għażel u tletin tibdila ħwejjeġ. U huma weġbuh: “Għidilna l-ħaġa moħġaġa, u aħna nisimgħuha.”

¹⁴U hu qalilhom: “L-ikel ħareġ mill-wikkiel, u mill-qawwi ħarġet il-ħlewwa.” U fi tlitt ijiem ma rnexxilhomx ifissru l-ħaġa moħġaġa.

¹⁵U ġara li fis-seba’ jum qalu lill-mara ta’ Sansun: “Żiegħel b’żewġek ħalli jgħidilna x’inhi, inkella naħarqu lilek u lil dar missierek. Għalhekk stedintuna, biex tfaqqruna? Hux hekk?”

¹⁶U mart Sansun bdiet tibki quddiemu u tgħidlu: “Int tobgħodni, u ma tħobbnix. Int għedt ħaġa moħġaġa lil ulied il-poplu tiegħi, u lili ma fissirthilix.” U hu weġibha: “Jekk jien ma fissirthiex lil ommi u lil missieri, se nfissirha lilek?”

¹⁷U damet tibki quddiemu għas-sebat ijiem li damet il-festa. Fis-seba’ jum fissirhielha għax dejqitu, u hi mbagħad fissritha lil ulied il-poplu tagħha.

¹⁸U fis-seba’ jum, qabel inżul ix-xemx, in-nies tal-belt qalulu: “X’inhu ħelu aktar mill-għasel? min hu b’saħħtu aktar mill-iljun?” U hu weġibhom: “Li ma ħrattux bl-għoġla tiegħi, ma kontux tikxfu l-moħġaġa tiegħi.”

¹⁹L-ispirtu tal-Mulej ġie fuqu, u Sansun niżel f’Askalon, u qatel tletin raġel minnhom, neżżagħhom minn ħwejjiġhom, u ta t-tibdiliet lil dawk li fissrulu l-ħaġa moħġaġa; imbagħad saħan bl-għadab u raġa’ tala’ f’dar missieru.

²⁰U l-mara ta’ Sansun tawha lil wieħed minn ħbiebu, li kien miegħu.