Read Maltese Bible with DC – IL-BIBBJA IL-KOTBA MQADDSA MĦALLFIN 16 Bible Online

MĦALLFIN 16 - Maltese Bible with DC – IL-BIBBJA IL-KOTBA MQADDSA bible

MĦALLFIN 16

¹U Sansun mar Gaża, u hemm ra mara żienja u daħal għandha.

²U marru qalu lin-nies ta’ Gaża: “Sansun ġie hawn!” Dawruh u qagħdulu għassa l-lejl kollu fil-bieb tal-belt, u baqgħu siekta l-lejl kollu u qalu: “Inħalluh sakemm jisbaħ, imbagħad noqtluh.”

³U Sansun baqa’ rieqed sa nofs il-lejl; f’nofs il-lejl qam, qabad il-battenti tal-bieb tal-belt u ż-żewġ waqqafiet, qalagħhom bl-istanga b’kollox, għabbiehom fuq spallejh, u tala’ bihom fuq il-quċċata tal-għolja biswit Ħebron.

⁴Ġara li wara dan Sansun ħabb mara mill-wied ta’ Sorek, jisimha Dalila.

⁵Il-kapijiet tal-Filistin marru għandha u qalulha: “Żiegħel bih u ara mnejn ġejja s-saħħa kbira li għandu, u tkixxfilna biex inkunu nistgħu norbtuh u rrażżnuh. Nagħtuk kull wieħed minna elf u mitt xekel tal-fidda.”

⁶U Dalila staqsiet lil Sansun: “Għidli mnejn hi ġejja din is-saħħa kbira tiegħek, u biex jistgħu jrażżnuk?”

⁷U Sansun weġibha: “Jekk jorbtuni b’seba’ ħbula tan-nerv friski u mhux nexfin, insir bla saħħa u nkun bħal kull bniedem ieħor.”

⁸U l-kapijiet tal-Filistin bagħtulha seba’ ħbula tan-nerv friski, mhux nexfin, u rabtitu bihom.

⁹U kellha l-għases moħbija fil-kamra u qaltlu: “Il-Filistin fuqek, Sansun!” U hu qatta’ l-irbit bħalma titqatta’ l-ftila tal-istoppa malli tħoss in-nar, u l-qawwa tiegħu ma għarfux mnejn kienet ġejja.

¹⁰U Dalila qalet lil Sansun: “Ara, dħakt bija u gdibtli. Issa għidli biex jistgħu jorbtuk.”

¹¹U hu weġibha: “Jekk jorbtuni bi ħbula ġodda li qatt ma sar xogħol bihom, insir bla saħħa u nkun bħan-nies l-oħra.”

¹²Dalila mbagħad ħadet ħbula ġodda, u rabtitu bihom u qaltlu: “Il-Filistin fuqek, Sansun!” Imma hu qattagħhom minn dirgħajh bħal ħajta.

¹³U Dalila reġgħet qalet lil Sansun: “S’issa dħakt bija u gdibtli. Għidli biex jistgħu jorbtuk.” U hu weġibha: “Jekk tinseġ is-seba’ nokkli ta’ rasi mal-medd tan-newl, u tħabbathom bl-għuda, insir bla saħħa, u nsir bniedem bħall-oħrajn.

¹⁴U hi raqqditu u nisġitlu s-seba’ nokkli ta’ rasu mal-medd, u ħabbtithom bl-għuda u qaltlu: “Il-Filistin fuqek, Sansun!” U hu stenbaħ mir-raqda, u qala’ l-musmar tan-newl u l-medd b’kollox.

¹⁵U reġgħet qaltlu: “Kif tgħidli: ‘Inħobbok’, meta int ma tiftaħx qalbek miegħi? Tliet darbiet dħakt bija, u ma għedtlix fiex inhi l-qawwa tiegħek.”

¹⁶U billi dejqitu bi kliemha u ta’ kuljum baqgħet issus warajh, iddejjaq għall-mewt.

¹⁷U fetaħ qalbu magħha għalkollox u qalilha: “Qatt ma għadda mus minn fuq rasi, għax jien nażir ikkonsagrat lil Alla sa minn ġuf ommi. Jekk inqaxxar xagħri, il-qawwa tiegħi tgħib għalkollox, u nsir bla saħħa bħal kull bniedem ieħor.”

¹⁸Malli ntebħet li fetaħ qalbu magħha għalkollox, Dalila bagħtet issejjaħ lill-Filistin u tgħidilhom: “Itilgħu, għax din id-darba fetaħli qalbu għalkollox.” U telgħu għandha l-kapijiet tal-Filistin u ġiebu l-flus magħhom.

¹⁹U raqqditu fuq irkupptejha u sejħet raġel u dan qarwiżlu s-seba’ nokkliet ta’ rasu; u beda jitmantar sakemm marritlu saħħtu minn fuqu.

²⁰U għajtet: “Il-Filistin fuqek, Sansun.” Dan stenbaħ min-ngħas u qal: “Noħroġ bħal dari u neħles.” Ma kienx jaf li l-Mulej kien warrab minnu.

²¹U qabduh il-Filistin, u qalgħulu għajnejh; u niżżluh Gaża, u rabtuh bis-sniesel tal-bronż, u għalquh idawwar il-mitħna fil-ħabs.

²²U xagħru raġa’ beda jikber wara li qarwżuh.

²³U l-kapijiet tal-Filistin inġemgħu biex jagħmlu festa u joffru sagrifiċċju kbir lil alla tagħhom Dagon[24], u qalu: “Tana f’idejna alla tagħna lil Sansun, il-għadu tagħna.”

²⁴Malli l-poplu ra lil Sansun bdew ifaħħru lill-alla tagħhom u jgħidu: “Tana f’idejna alla tagħna l-għadu tagħna; u ’l min ħarbtilna artna, u kattar il-mejtin tagħna.”

²⁵Kif qalbhom imtliet bil-ferħ qalu: “Ħa nsejħu lil Sansun biex jgħaddilna ż-żmien.” U sejħu ’l Sansun mill-ħabs, u beda jilgħab quddiemhom. U qegħduh bejn il-plieri.

²⁶U Sansun qal liż-żagħżugħ li kien qiegħed iżommlu idu: “Ħallini mmiss il-plieri li fuqhom qiegħda żżomm id-dar, u nserraħ fuqhom.”

²⁷Id-dar kienet mimlija rġiel u nisa, u kien hemm il-kapijiet tal-Filistin, u fuq is-setaħ xi tlitt elef raġel u mara jaraw lil Sansun jilgħab.

²⁸U Sansun sejjaħ il-Mulej u qal: “Mulej, Sidi, ftakar fija! Agħtini l-forza, imqar għal din id-darba, o Alla, u f’salt wieħed nitħallas taż-żewġ għajnejja mill-Filistin.”

²⁹U Sansun qabad iż-żewġ plieri tan-nofs, li fuqhom kienet mibnija d-dar, u twieżen fuqhom, fuq waħda bil-lemin u fuq l-oħra bix-xellug.

³⁰U Sansun għajjat: “Ħa mmut jien mal-Filistin.” U Sansun miel ’il quddiem fuqhom b’saħħtu kollha u ġġarrfet id-dar fuq il-kapijiet u fuq il-poplu kollu li kien hemm fiha. U l-għadd tal-mejtin, li qatel f’mewtu, kien akbar minn kemm kien qatel f’ħajtu.

³¹U niżlu ħutu u d-dar kollha ta’ missieru, u refgħuh u tellgħuh, u difnuh bejn Sorgħa u bejn Estawl fil-qabar ta’ missieru Manuħa. Dam jaħkem fuq Iżrael għal għoxrin sena.