Read Maltese Bible with DC – IL-BIBBJA IL-KOTBA MQADDSA MĦALLFIN 17 Bible Online

MĦALLFIN 17 - Maltese Bible with DC – IL-BIBBJA IL-KOTBA MQADDSA bible

MĦALLFIN 17

¹Kien hemm raġel mill-muntanji ta’ Efrajm li kien jismu Mika[25].

²U qal lil ommu: “Dawk l-elf u mitt xekel tal-fidda li kienu ħadulek u li int bdejt tisħet li nisimgħek, hawn huma għandi. Kont ħadthom jien; se rroddhomlok.” U ommu wieġbet: “Imbierek int, ibni, mill-Mulej.”

³U radd l-elf u mitt xekel lil ommu. U ommu qalet: “Irrid nikkonsagra dawn flusi lill-Mulej, biex issir xbieha mdewba[26] għal ibni.”

⁴Malli radd il-flus lil ommu, din ħadet mitejn xekel, tathom lill-arġentier li minnhom għamel xbieha mdewba, u qegħduha f’dar Mika;

⁵u hekk dan ir-raġel Mika kellu santwarju f’daru; għamel efod u terafim, u kkonsagra ’l wieħed minn uliedu, u sarlu qassis.

⁶Dak iż-żmien ma kienx hemm sultan f’Iżrael; kulħadd kien jagħmel li jogħġbu.

⁷Kien hemm żagħżugħ minn Betlehem ta’ Ġuda, mit-tribù ta’ Ġuda, li kien Levita, li kien frustier hemmhekk.

⁸Dan ir-raġel telaq mill-belt ta’ Betlehem ta’ Ġuda biex ifittex fejn joqgħod bħala frustier. Hu u għaddej mill-muntanji ta’ Efrajm sab ruħu ħdejn id-dar ta’ Mika.

⁹U Mika qallu: “Mnejn ġej?” U hu wieġbu: “Jien Levita minn Betlehem ta’ Ġuda, u qiegħed infittex fejn noqgħod.”

¹⁰U Mika qallu: “Oqgħod miegħi, u kun għalija missier u qassis; u jien nagħtik għaxar bċejjeċ tal-fidda fis-sena, tagħmira ħwejjeġ u ikel biex tgħix.”

¹¹Il-Levita aċċetta li joqgħod miegħu, u ż-żagħżugħ kien għalih bħal wieħed minn uliedu.

¹²U Mika kkonsagra lil-Levita, u ż-żagħżugħ kien għalih qassis, u qagħad f’dar Mika.

¹³U Mika qal: “Issa naf li l-Mulej tani r-riżq, għax għandi qassis Levita miegħi.”