Read Maltese Bible with DC – IL-BIBBJA IL-KOTBA MQADDSA MĦALLFIN 18 Bible Online

MĦALLFIN 18 - Maltese Bible with DC – IL-BIBBJA IL-KOTBA MQADDSA bible

MĦALLFIN 18

¹F’dak iż-żmien ukoll ma kienx hemm sultan f’Iżrael; u t-tribù ta’ Dan kien qiegħed ifittex art fejn jgħammar[27], għax sa dakinhar kien għadu ma messux sehem f’nofs it-tribujiet ta’ Iżrael.

²Ulied Dan għalhekk bagħtu ħamsa min-nies mit-tribù tagħhom, irġiel ta’ ħila, minn Sorgħa u Estawl, biex iduru u jitkixxfu l-art, u qalulhom: “Morru u tkixxfu l-art.” U marru fil-muntanji ta’ Efrajm sad-dar ta’ Mika u għaddew il-lejl hemm.

³Kif kienu ħdejn dar Mika għarfu leħen iż-żagħżugħ Levita u ġibduh ’l hemm u staqsewh: “Min ġiebek hawn?”

⁴U weġibhom: “Dan u dan għamilli Mika; krieni, u jien sirt qassis tiegħu.”

⁵U huma qalulu: “Stħarreġ lil Alla biex inkunu nafu jekk fit-triq li qbadna jkollniex ir-risq?”

⁶U l-qassis weġibhom: “Morru bis-sliema! F’idejn il-Mulej hi t-triq li intom mexjin fiha.”

⁷U telqu l-ħamest irġiel, u waslu Lajs, u raw li l-poplu kien jgħix bla biża’ bħas-Sidonin, b’moħħhom mistrieħ; ma kien jonqoshom xejn mill-ġid tal-art; u ħadd ma kien jaħkimhom bi dritt ta’ wirt; u kienu ’l bogħod mis-Sidonin, u ma kellhom x’jaqsmu xejn mal-Aramin.

⁸Imbagħad reġgħu lura għand ħuthom f’Sorgħa u Estawl, u dawn staqsewhom: “X’minnkom?”

⁹U huma wieġbu: “Qumu, u nitilgħu għaliha! Għax aħna rajnieha li hi art tajba ħafna! X’intom taħsbuha? La titnikkrux, fittxu itilqu u morru ħudu l-art f’idejkom.

¹⁰Meta taslu hemm issibu nies jgħixu bla biża’ f’medda kbira ta’ art. Tassew li Alla rħieha f’idejkom. Post fejn m’hemm xejn nieqes mill-ġid li tista’ tagħti l-art.”

¹¹Imbagħad telqu minn Sorgħa u Estawl mit-tribù ta’ Dan sitt mitt raġel armati għall-gwerra.

¹²Telgħu, u waqqfu l-kamp f’Kirjat-jegħarim f’Ġuda; għalhekk għadhom isejħulu Maħane-dan sal-lum; u jiġi wara Kirjat-jegħarim.

¹³Minn hawn għaddew għall-muntanji ta’ Efrajm, u waslu ħdejn id-dar ta’ Mika.

¹⁴Dawk il-ħamest irġiel, li kienu marru jitkixxfu l-art ta’ Lajs, kellmu lil ħuthom u qalulhom: “Tafu intom li f’dawn id-djar hemm efod, terafim, xbieha mnaqqxa u xbieha mdewba? Issa araw x’tagħmlu.”

¹⁵U lwew ’il dik in-naħa, u marru fid-dar taż-żagħżugħ Levita, id-dar ta’ Mika, u sellmulu ta’ ħbieb.

¹⁶U s-sitt mitt raġel minn ulied Dan armati għall-gwerra waqfu fi dħul il-bieb.

¹⁷U l-ħamest irġiel li kienu marru jitkixxfu l-art, daħlu fid-dar u ħadu x-xbieha mnaqqxa u l-efod u t-terafim u x-xbieha mdewba, waqt li l-qassis baqa’ fil-bieb mas-sitt mitt raġel armati għall-gwerra.

¹⁸Meta daħlu f’dar Mika, u ħadu x-xbieha mnaqqxa, l-efod u t-terafim, u x-xbieha mdewba, il-qassis qalilhom: “X’intom tagħmlu?”

¹⁹U huma weġbuh: “Oqgħod bi kwietek! Qiegħed idek fuq fommok u ejja magħna, u kun għalina missier u qassis. X’inhu l-aħjar għalik, tkun qassis ta’ dar ta’ bniedem wieħed jew tkun qassis ta’ tribù u familja sħiħa f’Iżrael?”

²⁰U l-qassis feraħ f’qalbu; u ħa l-efod u t-terafim u x-xbieha mnaqqxa u mar f’nofs dik il-kotra nies.

²¹Imbagħad daru u telqu, u bagħtu t-tfal u l-imrieħel u ġidhom qabilhom.

²²Malli tbiegħdu minn dar Mika, l-irġiel li kienu joqogħdu fid-djar ta’ ħdejn id-dar ta’ Mika, inġemgħu u telqu għal wara wlied Dan,

²³u bdew jgħajtulhom. Ulied Dan dawru wiċċhom lejhom u staqsew lil Mika: “X’għandek, biex qiegħed tgħajjat?”

²⁴U hu weġibhom: “Ħadtuli allati, li għamilt, u l-qassis, u tlaqtu! X’fadalli? U mbagħad tgħiduli: ‘X’għandek?’ ”

²⁵U wlied Dan qalulu: “La ssammagħniex aktar leħnek, li ma jmorrux iħebbu għalikom in-nies ta’ ras iebsa u titlef ħajtek u ħajjet darek.”

²⁶U wlied Dan baqgħu sejrin fi triqthom, u Mika dawwar wiċċu u raġa’ lura lejn daru, għax ra li kienu aqwa minnu.

²⁷U huma ħadu kulma kien għamel Mika, u l-qassis li kellu miegħu, u marru Lajs, għand nies li kienu jgħixu fil-kwiet bla ħsieb ta’ xejn, u għaddewhom minn xifer ix-xabla, u l-belt ħarquha bin-nar.

²⁸Ma kien hemm ħadd min jgħinha, għax kienet bogħod minn Sidon, u ma kellhom x’jaqsmu xejn ma’ Aram. Kienet fil-wita ta’ Bet-reħob; reġgħu bnewha mill-ġdid u għammru fiha.

²⁹U semmewha Dan, għal isem missierhom Dan, li kien twieled lil Iżrael. Imma qabel, sa mill-bidu, kien jisimha Lajs.

³⁰U wlied Dan waqqfu xbieha, u Ġonatan bin Gersom, bin Manassi, hu u wliedu, saru qassisin għat-tribù ta’ Dan sa meta nqabdet l-art[28].

³¹U qiegħdu għalihom ix-xbieha, li kien għamel Mika, u baqgħet hemm iż-żmien kollu li dar Alla kienet f’Silo.