Read Maltese Bible with DC – IL-BIBBJA IL-KOTBA MQADDSA MĦALLFIN 19 Bible Online

MĦALLFIN 19 - Maltese Bible with DC – IL-BIBBJA IL-KOTBA MQADDSA bible

MĦALLFIN 19

¹F’dak iż-żmien ma kienx hemm sultan f’Iżrael, u kien hemm Levita jgħammar f’nofs il-muntanji ta’ Efrajm, u ħa mara konkubina minn Betlehem ta’ Ġuda.

²Din il-konkubina żniet kontrih, telqitu u marret f’dar missierha f’Betlehem ta’ Ġuda; u kienet ilha hemm erba’ xhur,

³meta żewġha qam u mar warajha biex iżiegħel biha u jġibha lura. Kellu miegħu l-qaddej tiegħu u żewġt iħmir. Daħħlitu f’dar missierha, u malli rah missier it-tifla feraħ bih u mar jilqgħu.

⁴U ħatnu, missier it-tifla, żammu għandu, u hu qagħad miegħu tlitt ijiem, u kielu u xorbu, u għaddew il-lejl hemmhekk.

⁵Fir-raba’ jum bakkru filgħodu u qam biex jitlaq; imma missier it-tifla qal lil ħatnu: “Ħu biċċa ħobż u stejqer, u mbagħad itlaq.”

⁶U qagħdu t-tnejn bilqiegħda jieklu u jixorbu. U missier it-tifla qallu: “Nitolbok, oqgħod hawn illejla u ferraħ qalbek.”

⁷Imma l-ieħor qam biex jitlaq; iżda ħatnu baqa’ jissikkah, u baqa’ u għadda l-lejl hemmhekk.

⁸U fil-ħames jum bakkar, u qam biex jitlaq; imma missier it-tifla qallu: “Kul xi ħaġa qabel.” U għaddew iż-żmien sa ma daħal il-jum sewwa, u kielu flimkien.

⁹Ir-raġel qam biex jitlaq hu, il-konkubina u l-qaddej tiegħu, imma ħatnu, missier it-tifla, qallu: “Ara, il-jum wasal għal filgħaxija; oqogħdu hawn illejla. U ferraħ qalbek, u għada tbakkru għal triqtkom u tmur lejn l-għarix tiegħek.”

¹⁰Ir-raġel ma riedx jgħaddi l-lejl hemm; qabad u telaq u wasal sa quddiem Ġebus, li hi Ġerusalemm; u kellu miegħu żewġt iħmir mgħobbija, u l-konkubina.

¹¹Xħin qorbu lejn Ġebus, il-jum kien wasal fi tmiemu, u l-qaddej qal lil sidu: “Ejja nduru lejn din il-belt tal-Ġebusin, u ngħaddu l-lejl hemmhekk.”

¹²U sidu wieġbu: “Ma ndurux lejn belt il-barranin, li mhumiex minn ulied Iżrael. Ħa nibqgħu sejrin sa Gibgħa.”

¹³U ssokta jgħid lill-qaddej tiegħu: “Ejja naslu sa wieħed minn dawn il-postijiet u ngħaddu l-lejl f’Gibgħa jew Rama.”

¹⁴U baqgħu sejrin sakemm laħaqhom inżul ix-xemx, ħdejn Gibgħa ta’ Benjamin.

¹⁵U lwew ’l hemm biex imorru jgħaddu l-lejl f’Gibgħa; u daħal u waqaf fil-misraħ tal-belt, u ma kien hemm ħadd li laqagħhom biex jgħaddu l-lejl f’daru.

¹⁶U ara, raġel xiħ kien ġej filgħaxija minn fuq ix-xogħol fl-għalqa. Kien raġel mill-muntanji ta’ Efrajm, u kien frustier f’Gibgħa; imma n-nies tal-post kienu wlied Benjamin.

¹⁷U rafa’ għajnejh u ra r-raġel li kien għaddej mill-misraħ tal-belt, u r-raġel ix-xiħ qallu: “Fejn sejjer? Mnejn ġej?”

¹⁸U hu wieġbu: “Ġejjin minn Betlehem ta’ Ġuda, u sejrin lejn il-qalba tal-muntanji ta’ Efrajm. Jiena minn dawk l-inħawi, u mort sa Betlehem ta’ Ġuda, u issa sejjer lejn dari, u ma hawn ħadd li jilqagħni f’daru.

¹⁹Għandi tiben u għalf għall-ħmir tagħna, ħobż u nbid għalija, u għall-qaddejja tiegħek, u għaż-żagħżugħ tal-qaddej tiegħek; xejn ma jonqosna.”

²⁰U x-xiħ qallu: “Is-sliem għalik! Naħsiblek għal kulma teħtieġ, biss la tgħaddix il-lejl fil-misraħ.”

²¹U ħadu f’daru, tah l-għalf għall-ħmir, ħaslu riġlejhom, u kielu u xorbu.

²²Meta kienu qalbhom ferħana, xi rġiel tal-belt, nies mill-agħar[29], dawru d-dar, u bdew iħabbtu fuq il-bieb u jgħajtu lix-xiħ, sid id-dar: “Oħorġilna r-raġel li daħal f’darek, ħa nużawh.”

²³U ħareġ ħdejhom ix-xiħ, sid id-dar, u qalilhom: “Le, ħuti, la tagħmlux din il-bluha! La darba dan ir-raġel daħal f’dari, la tagħmlux dan l-għajb.

²⁴Ara, għandi ’l binti xebba u l-mara konkubina tiegħu; noħroġhomlkom u użawhom, u għamlu bihom li jogħġobkom, u ’l dan ir-raġel la tagħmlulux dan l-għajb.”

²⁵Iżda huma ma ridux jisimgħu u għalhekk ir-raġel qabad il-konkubina u ħariġhielhom barra; u huma żebilħuha, u nfexxew fiha l-lejl kollu sa filgħodu, u malli sebaħ telquha.

²⁶Mas-sebħ il-mara ġiet u waqgħet fl-art ħdejn il-bieb ta’ dar ir-raġel fejn kien żewġha, u baqgħet hemm sakemm sebaħ sewwa.

²⁷U filgħodu qam żewġha, u fetaħ il-bieb tad-dar, u ħareġ biex jaqbad triqtu; u jsib il-mara konkubina tiegħu fl-art ħdejn il-bieb tad-dar b’idejha mqabbda mal-għatba.

²⁸“Qum,” qalilha, “ħa nitilqu.” Imma hi ma weġbitx. U mbagħad għabbieha fuq il-ħmar, u r-raġel qabad u telaq lejn daru.

²⁹Kif wasal id-dar ħa sikkina, qabad il-konkubina u qattagħha fi tnax-il biċċa b’għadamha b’kollox, u bagħathom fl-art kollha ta’ Iżrael.

³⁰U kull min ra dan qal: “Qatt sal-lum ma ġrat biċċa bħal din; u qatt ħadd ma ra bħalha minn mindu telgħu wlied Iżrael mill-art tal-Eġittu. Aħsbu fuqha, u araw x’se tagħmlu u tkellmu.”