Read Maltese Bible with DC – IL-BIBBJA IL-KOTBA MQADDSA MĦALLFIN 2 Bible Online

MĦALLFIN 2 - Maltese Bible with DC – IL-BIBBJA IL-KOTBA MQADDSA bible

MĦALLFIN 2

¹U l-Anġlu tal-Mulej tala’ minn Gilgal għal Bokim u qal: “Jien tellajtkom mill-Eġittu, u wassaltkom fl-art li kont wegħedt lil missirijietkom, u għedt: ‘Ma nħassar qatt il-patt li għamilt magħkom,

²u intom min-naħa tagħkom ma tagħmlu ebda patt man-nies ta’ din l-art u għandkom tkissru l-artali tagħhom.’ Imma intom ma smajtux minn kliemi, u araw x’għamiltu!

³U issa ngħidilkom: ‘Ma nkeċċihomx minn quddiemkom, u jibqgħu ma’ ġniebkom u allathom ikunulkom ta’ xibka.’ ”

⁴U ġara li malli l-Anġlu tal-Mulej temm jgħid dan il-kliem lil ulied Iżrael kollu, il-poplu għolla leħnu u bdew jibku.

⁵U semmew dak il-post Bokim u hemm offrew sagrifiċċju lill-Mulej.

⁶Ġożwè bagħat il-poplu f’daru u wlied Iżrael marru, kulħadd fl-art li messitu biex jeħodha f’idejh.

⁷U l-poplu serva lill-Mulej il-jiem kollha ta’ Ġożwè u l-jiem kollha tax-xjuħ li baqgħu ħajjin wara Ġożwè, u li kienu raw kulma kien għamel il-Mulej, l-opri kbar kollha li għamel għal Iżrael.

⁸U miet Ġożwè bin Nun, il-qaddej tal-Mulej, fl-għomor ta’ mija u għaxar snin.

⁹U difnuh fl-art li messitu f’Timnat-ħeres, fil-muntanji ta’ Efrajm, fuq it-Tramuntana tal-muntanja Ġagħas.

¹⁰U dik il-ġenerazzjoni kollha nġabru ma’ missirijiethom; u mbagħad telgħet ġenerazzjoni oħra warajhom, li ma kinitx taf il-Mulej u anqas x’għamel il-Mulej għal Iżrael.

¹¹U wlied Iżrael għamlu l-ħażin f’għajnejn il-Mulej u servew lill-allat Bagħalim.

¹²Telqu l-Mulej, Alla ta’ missirijiethom, li ħariġhom mill-art tal-Eġittu, u marru wara allat oħra minn fost l-allat tal-ġnus ta’ madwarhom, u bdew jadurawhom; u inkurlaw lill-Mulej.

¹³U telqu lill-Mulej u servew lil Bagħal u lil Għastarot[3].

¹⁴U xegħlet il-korla tal-Mulej għal Iżrael, u telaqhom f’idejn il-ħallelin li serquhom, u biegħhom f’idejn l-għedewwa tagħhom ta’ madwarhom, hekk li ma setgħux iżjed jieqfu lill-għedewwa tagħhom.

¹⁵Kull meta kienu joħorġu għat-taqbid id il-Mulej kienet kontrihom bħalma kien qal il-Mulej, u kif kien ħalfilhom il-Mulej; u kellhom dwejjaq kbar.

¹⁶U l-Mulej kien iqajjem l-imħallfin, u dawn kienu jsalvawhom minn id il-ħallelin.

¹⁷Imma anqas mill-imħallfin tagħhom ma semgħu; anzi żnew wara allat oħra u adurawhom. Malajr warrbu mit-triq li mxew fiha missirijiethom, li semgħu l-liġijiet tal-Mulej, ħaġa li huma ma għamluhiex.

¹⁸U kull meta l-Mulej kien iqajmilhom l-imħallfin, il-Mulej kien ikun mal-imħallef u kien isalvahom minn id l-għedewwa tagħhom sakemm kien idum ħaj l-imħallef; għax kien il-Mulej iħenn għall-krib tagħhom minħabba dawk li kienu jaħqruhom u jgħakksuhom.

¹⁹Iżda meta kien imut l-imħallef, kienu jerġgħu jitħassru, u jsiru agħar minn missirijiethom, u jmorru wara allat oħra biex jaqduhom u jadurawhom; qatt ma nqatgħu mill-għemejjel ħżiena tagħhom u mill-ebusija ta’ rashom.

²⁰U l-korla tal-Mulej xegħlet kontra Iżrael u qal: “Talli dan il-poplu kiser il-patt tiegħi li ordnajt lil missirijiethom u ma semgħux minn kliemi,

²¹jien ma nibqa’ nkeċċi lil ħadd iżjed minn quddiemhom, mill-ġnus li ħalla Ġożwè meta miet.

²²Bihom jien inġarrab lil Iżrael, u nara jekk iżommux jew le fit-triq tal-Mulej u jimxu fiha, bħalma żammew missirijiethom.”

²³U l-Mulej ħalla lil dawk il-ġnus u ma qeridhomx malajr, u ma telaqhomx f’idejn Ġożwè.