Read Maltese Bible with DC – IL-BIBBJA IL-KOTBA MQADDSA MĦALLFIN 20 Bible Online

MĦALLFIN 20 - Maltese Bible with DC – IL-BIBBJA IL-KOTBA MQADDSA bible

MĦALLFIN 20

¹U wlied Iżrael ħarġu lkoll u ltaqgħet il-ġemgħa bħal bniedem wieħed, minn Dan sa Birsaba, u minn art Gilgħad f’Misfa[30], quddiem il-Mulej.

²U ħarġu fin-nofs il-kapijiet tal-poplu kollu u t-tribujiet ta’ Iżrael kollha quddiem il-ġemgħa tal-poplu ta’ Alla; erba’ mitt elf ruħ tal-fanterija mħarrġa fix-xabla.

³U wlied Benjamin semgħu li wlied Iżrael telgħu Misfa, u wlied Iżrael qalu: “Tkellmu! Kif saret din il-biċċa ħażen?”

⁴U r-raġel Levita, żewġ il-mara maqtula, wieġeb u qal: “Konna wasalna, jiena u l-konkubina tiegħi, f’Gibgħa ta’ Benjamin biex ngħaddu l-lejl hemmhekk.

⁵U qamu għalija n-nies ta’ Gibgħa, u dawruli d-dar billejl; lili riedu joqtluni, u lill-konkubina tiegħi żebilħuha u mietet.

⁶Imbagħad jien ġbart il-konkubina u qattajtha bċejjeċ u bgħattha fl-oqsma kollha ta’ art Iżrael; għax huma għamlu ħaġa faħxija u kerha f’Iżrael.

⁷Araw, hawn intom ilkoll; tkellmu u araw x’se tagħmlu.”

⁸U qam il-poplu kollu bħal bniedem wieħed u qalu: “Ħadd ma jerġa’ lura fl-għarix tiegħu, u ħadd ma jmur lura lejn daru.

⁹Issa nagħmlu hekk lil Gibgħa: intellgħu x-xorti, u nitilgħu għaliha.

¹⁰Nieħdu minn kull tribù ta’ Iżrael għaxart irġiel minn kull mija, u mija minn kull elf, u elf minn kull għaxart elef, biex iġibu l-ikel għall-poplu li ġie biex jagħmel ma’ Gibgħa ta’ Benjamin skont ma ħaqqha għal dan il-ħażen li għamlu f’Iżrael.”

¹¹U nġabru kollha għalenija bħal bniedem wieħed l-irġiel ta’ Iżrael kontra l-belt.

¹²U t-tribujiet ta’ Iżrael bagħtu nies fit-tribù kollu ta’ Benjamin jgħidulhom: “X’ħażen hu dan, li sar f’nofskom?

¹³Agħtuna issa n-nies mill-agħar li hemm f’Gibgħa, u noqtluhom u nneħħu l-ħażen minn Iżrael.” Imma wlied Benjamin ma ridux jisimgħu minn kliem ħuthom, ulied Iżrael.

¹⁴U wlied Benjamin inġabru mill-ibliet f’Gibgħa biex joħorġu jitqabdu ma’ wlied Iżrael.

¹⁵U ntgħaddu ulied Benjamin dakinhar: mill-ibliet, sitta u għoxrin elf raġel imħarreġ fix-xabla barra n-nies ta’ Gibgħa;

¹⁶fost dawk in-nies kollha kien hemm ukoll seba’ mitt raġel magħżul, xellugin, u kull wieħed kellu l-ħila jwaddab ġebla bl-iżbandola għal xagħra, u ma jfallilux.

¹⁷U wlied Iżrael intgħaddu wkoll: barra minn ulied Benjamin, erba’ mitt elf raġel imħarreġ fix-xabla, kull wieħed raġel tal-ġlied.

¹⁸U qabdu u marru wlied Iżrael f’Betel u staqsew lil Alla u qalu: “Min minna jitla’ l-ewwel jitqabad ma’ wlied Benjamin?” U l-Mulej wieġeb: “Ġuda jitla’ l-ewwel.”

¹⁹Ulied Iżrael bakkru filgħodu, u waqqfu l-kamp biswit Gibgħa.

²⁰In-nies ta’ Iżrael ħarġu għat-taqbida ma’ wlied Benjamin, u tqassmu għall-ġlied ħdejn Gibgħa.

²¹U wlied Benjamin ħarġu minn Gibgħa u meddew fl-art dakinhar tnejn u għoxrin elf raġel minn Iżrael.

²²Imma l-poplu għamel il-qalb u l-Iżraelin reġgħu tqassmu għat-taqbida fejn kienu tqassmu fl-ewwel jum.

²³U wlied Iżrael telgħu jibku quddiem il-Mulej sa filgħaxija, u staqsew lill-Mulej u qalu: “Għandi jien nerġa’ noħroġ nitqabad ma’ wlied ħija Benjamin?” U l-Mulej wieġeb: “Itilgħu għalih.”

²⁴Fit-tieni jum ulied Iżrael marru għal ulied Benjamin.

²⁵U ħareġ jilqagħhom Benjamin minn Gibgħa fit-tieni jum u meddew mal-art tmintax-il elf oħra minn ulied Iżrael, ilkoll imħarrġa fix-xabla.

²⁶U wlied Iżrael ilkoll, u l-poplu kollu telgħu u marru Betel, u qagħdu hemm jibku quddiem il-Mulej, u samu dak in-nhar sa filgħaxija u offrew sagrifiċċji tal-ħruq, u sagrifiċċji tas-sliem quddiem il-Mulej.

²⁷U wlied Iżrael staqsew lill-Mulej - għax hemm kienet l-arka tal-patt ta’ Alla f’dak iż-żmien

²⁸u Fineħas bin Elgħażar, bin Aron, dik il-ħabta kien iservi quddiemha - u qalu: “Għandi jien nerġa’ noħroġ nitqabad ma’ ħija Benjamin, jew nieqaf?” U l-Mulej wieġeb: “Itilgħu, għax għada nerħih f’idejk.”

²⁹U Iżrael imbagħad dawwar lil Gibgħa dawramejt bl-għases moħbija.

³⁰U fit-tielet jum ulied Iżrael telgħu għal ulied Benjamin u tqassmu ħdejn Gibgħa bħall-ewwel u t-tieni darba.

³¹U wlied Benjamin ħarġu għall-poplu u tbiegħdu mill-belt, u bdew joqtlu mill-eżerċtu bħall-ewwel u t-tieni darba fit-toroq li jieħdu, waħda għal Betel u l-oħra għal Gibgħa, u fir-raba’, u qatlu xi tletin raġel minn Iżrael b’kollox.

³²U wlied Benjamin qalu: “Kissirniehom bħall-ewwel darba.” U wlied Iżrael qalu: “Ħa naħarbu, u nbegħduhom mill-belt, u nxerrduhom mat-toroq.”

³³U l-Iżraelin qamu kollha minn fejn kienu, u tqassmu f’Bagħal-tamar, u l-għases moħbija ta’ Iżrael ħarġu minn fejn kienu min-naħa tal-Punent ta’ Gibgħa.

³⁴U ġew quddiem Gibgħa għaxart elef raġel magħżula minn Iżrael kollu; u t-taqbida ħraxet, u wlied Benjamin ma ntebħux li kienet ġejja fuqhom ħsara kbira.

³⁵Il-Mulej ħarbat lil ulied Benjamin quddiem Iżrael, u dakinhar ulied Iżrael qatlu minn ulied Benjamin ħamsa u għoxrin elf u mitt ruħ, ilkoll imħarrġa fix-xabla.

³⁶Ulied Benjamin intebħu li kienu mirbuħa; u l-Iżraelin taw il-wisa’ lil ulied Benjamin, għax kellhom moħħhom mistrieħ bl-għases moħbija li kienu qiegħdu ħdejn Gibgħa.

³⁷U l-għases moħbija ntefgħu bil-ħeffa fuq Gibgħa, ħabtu għall-belt minn kull naħa, u għaddew il-belt kollha minn xifer ix-xabla.

³⁸L-Iżraelin kienu ftiehmu mal-għases moħbija li jtellgħu sħaba duħħan mill-belt.

³⁹Malli l-Iżraelin li kienu jitqabdu daru, ulied Benjamin bdew jaħbtu għall-Iżraelin u qatlu minnhom xi tletin raġel, għax qalu: “Iva, kissirniehom bħal fl-ewwel taqbida.”

⁴⁰Imma dak il-ħin bdiet tielgħa minn fuq il-belt sħaba duħħan; u wlied Benjamin ħarsu lura, u raw in-nar mill-belt tiela’ lejn is-sema.

⁴¹U l-Iżraelin daru u wlied Benjamin tħawdu għax raw li laħqithom il-ħsara;

⁴²u daru, u ħarbu minn quddiem Iżrael lejn id-deżert; imma l-ġlied laħaqhom, u dawk li kienu ħierġa mill-belt daħlu ġo nofshom u bdew iqattgħuhom bċejjeċ.

⁴³Hekk dawru lil ulied Benjamin, u għamlu għal warajhom u għaffġuhom taħt riġlejhom minn Noħa sa quddiem Gibgħa, in-naħa tal-Lvant.

⁴⁴U waqgħu mejtin tmintax-il elf raġel minn Benjamin, kollha nies ta’ ħila.

⁴⁵L-oħrajn daru u ħarbu lejn id-deżert lejn il-blat ta’ Rimmon; l-Iżraelin qatlu minnhom fit-toroq ħamest elef raġel u baqgħu jrossu fuqhom sa Gidgħon u qatlu elfejn oħra.

⁴⁶U dakinhar il-mejtin kollha ta’ Benjamin laħqu l-ħamsa u għoxrin elf raġel imħarrġa fix-xabla, kollha nies ta’ ħila.

⁴⁷U ħarbu lura lejn id-deżert sitt mitt raġel, u baqgħu fil-blat ta’ Rimmon għal erba’ xhur.

⁴⁸Imbagħad ulied Iżrael daru għal ulied Benjamin l-oħra, u għaddew minn xifer ix-xabla n-nies fil-belt, u l-bhejjem u kulma sabu; u l-ibliet li sabu tawhom in-nar.