Read Maltese Bible with DC – IL-BIBBJA IL-KOTBA MQADDSA MĦALLFIN 3 Bible Online

MĦALLFIN 3 - Maltese Bible with DC – IL-BIBBJA IL-KOTBA MQADDSA bible

MĦALLFIN 3

¹U dawn huma l-ġnus li l-Mulej ħalla biex bihom iġarrab lil Iżrael, lil dawk kollha li ma kinux jafu bit-taqbid li kien sar qabel għal Kangħan.

²L-għan tiegħu kien biss li l-ġenerazzjonijiet ta’ wlied Iżrael jitgħallmu jitqabdu, għallinqas dawk li qatt ma kienu ġarrbu t-taqbid.

³Dawn kienu: Il-ħames prinċpijiet tal-Filistin[4], il-Kangħanin kollha, is-Sidonin u l-Ħiwwin, li kienu jgħammru fil-muntanji tal-Libanu mill-muntanja ta’ Bagħal-ħermon sad-daħla ta’ Ħamat.

⁴U dan kien biex iġarrab bihom lil Iżrael, u jara jisimgħux l-ordnijiet li l-Mulej kien ordna lil missirijiethom permezz ta’ Mosè.

⁵Hekk ulied Iżrael kienu jgħammru f’nofs il-Kangħanin, il-Ħittin, l-Amurrin, il-Periżżin, il-Ħiwwin u l-Ġebusin.

⁶U kienu jiżżewġu n-nisa tagħhom, u lil uliedhom subien kienu jżewġulhom il-bniet tagħhom; u kienu jservu l-allat tagħhom.

⁷Ulied Iżrael għamlu l-ħażin f’għajnejn il-Mulej, insew il-Mulej, Alla tagħhom, u marru jservu lill-Bagħalim u x-xbihat tal-Asera.

⁸Il-Mulej xegħel bil-korla għal Iżrael u biegħhom f’idejn Kusan-risgħatajm, sultan ta’ Aram-naħarajm, u wlied Iżrael damu mjassra taħt Kusan-risgħatajm għal tmien snin sħaħ.

⁹Imbagħad ulied Iżrael għajtu lill-Mulej u l-Mulej qajjem salvatur lil ulied Iżrael, li ħelishom, Għotnijel bin Kenaż, ħu Kaleb, iżgħar minnu.

¹⁰U l-ispirtu tal-Mulej kien fuqu, u sar imħallef fuq Iżrael, u ħareġ għall-gwerra, u l-Mulej reħa f’idejh lil Kusan-risgħatajm, sultan ta’ Aram. Għotnijel kien qawwi wisq għal Kusan-risgħatajm.

¹¹U l-art strieħet għal erbgħin sena; u Għotnijel bin Kenaż miet.

¹²U wlied Iżrael issuktaw jagħmlu l-ħażin f’għajnejn il-Mulej u l-Mulej saħħaħ lil Għeglon, sultan ta’ Mowab, kontra Iżrael għax dawn għamlu l-ħażen f’għajnejn il-Mulej.

¹³Għeglon ġabar miegħu l-Għammonin u l-Għamalekin, u ħareġ jaħbat għal Iżrael, u ħa f’idejh Belt it-tamar.

¹⁴U wlied Iżrael qdew lil Għeglon, sultan ta’ Mowab, għal tmintax-il sena.

¹⁵U wlied Iżrael għajtu lill-Mulej, u l-Mulej qajmilhom salvatur, lil Eħud bin Gera, raġel xellugi mit-tribù ta’ Benjamin. U wlied Iżrael bagħtuh bit-tribut f’idu għand Għeglon, sultan ta’ Mowab.

¹⁶U Eħud għamel sejf b’żewġt ixfar, twil driegħ, u rabtu mal-ħżiem minn taħt il-ħwejjeġ fuq ġenbu tal-lemin.

¹⁷U mar joffri t-tribut lil Għeglon, sultan ta’ Mowab; u Għeglon kien raġel smin ħafna.

¹⁸U ġara li malli temm joffri t-tribut, Eħud bagħat in-nies li kienu jġorruh.

¹⁹U hu raġa’ lura minn ħdejn l-idoli li hemm ħdejn Gilgal u qallu: “Għandi kelma moħbija xi ngħidlek, Sultan.” Is-sultan ordna s-skiet u dawk li kienu preżenti ħdejh ħarġu ’l barra.

²⁰Eħud resaq lejh, u hu kien waħdu fl-għorfa friska li kellu fuq, u Eħud qallu: “Għandi kelma minn Alla għalik,” u s-sultan qam minn fuq is-siġġu.

²¹Eħud imbagħad ħareġ idu x-xellugija, silet is-sejf minn ma’ ġenbu tal-lemin, u daħħalhulu f’żaqqu.

²²U daħal saħansitra l-manku max-xafra, u x-xaħam għalaq fuq ix-xafra, għax ma kienx silet lura s-sejf minn żaqqu u ħmieġu ħareġ barra.

²³Imbagħad Eħud ħareġ fis-setaħ, u għalaq il-bieb tal-għorfa ta’ fuq, u sakkar warajh.

²⁴U hu ħareġ; u l-qaddejja tas-sultan, meta raw il-bieb tal-għorfa msakkar qalu: “Għandu mnejn qiegħed jaqdi l-bżonnijiet tiegħu fl-għorfa friska.”

²⁵U qagħdu jistennew sa ma bdew jitħassbu; u billi hu baqa’ ma fetaħx il-bieb tal-għorfa, qabdu l-muftieħ u fetħu, u sabu hemm lil sidhom mixħut mejjet fl-art.

²⁶Eħud laħaq ħarab sakemm huma qagħdu jitħassbu, għadda ’l hemm mill-idoli, u wasal bis-sliema f’Segħira.

²⁷Malli wasal hemm daqq il-kornu minn fuq il-muntanji ta’ Efrajm, u wlied Iżrael niżlu flimkien miegħu minn fuq il-muntanji, u hu quddiem nett.

²⁸Hu qalilhom: “Imxu warajja għax il-Mulej reħa f’idejkom il-Mowabin, l-għedewwa tagħkom.” U niżlu warajh, u ħadu f’idejhom il-mogħdijiet tal-Ġordan lejn Mowab, u ma ħallew lil ħadd jgħaddi.

²⁹U qatlu dakinhar madwar għaxart elef ruħ mill-Mowabin, kollha nies b’saħħithom u ta’ ħila, u ebda bniedem ma salva.

³⁰U Mowab dakinhar waqgħet f’idejn Iżrael, u l-art strieħet għal tmenin sena.

³¹Wara Eħud kien hemm Samgar bin Għanat, u dan darab sitt mitt raġel mill-Filistin b’niggiesa tal-baqar, u hekk ħeles hu wkoll lil Iżrael.