Read Maltese Bible with DC – IL-BIBBJA IL-KOTBA MQADDSA MĦALLFIN 4 Bible Online

MĦALLFIN 4 - Maltese Bible with DC – IL-BIBBJA IL-KOTBA MQADDSA bible

MĦALLFIN 4

¹Wara li miet Eħud, ulied Iżrael reġgħu għamlu l-ħażen f’għajnejn il-Mulej,

²u l-Mulej biegħhom f’id Ġabin, sultan ta’ Kangħan, li kien isaltan f’Ħasor; u l-kmandant tal-eżerċtu tiegħu kien Sisera, li kien joqgħod f’Ħaroset tal-ġnus.

³U wlied Iżrael għajtu lill-Mulej, għax dan is-sultan kellu disa’ mitt karru tal-ħadid, u kien ilu jgħakkes lil ulied Iżrael għal għoxrin sena sħaħ.

⁴Dik il-ħabta kien hemm Debora, mara profeta u mart Lappidot; kienet imħallef f’Iżrael.

⁵Kienet toqgħod taħt it-tamra ta’ Debora, bejn Rama u Betel, fuq il-muntanji ta’ Efrajm, u wlied Iżrael kienu jitilgħu biex tagħmlilhom il-ħaqq bejniethom.

⁶U bagħtet issejjaħ lil Barak bin Abinogħam, minn Kedes ta’ Naftali, u qaltlu: “Il-Mulej, Alla ta’ Iżrael, ta din l-ordni: ‘Mur u ħu għaxart elef raġel minn ulied Naftali u minn ulied Żebulun, u erħilha bihom lejn il-muntanja tat-Tabor.

⁷U jien inġiblek ħdejn il-wied ta’ Kison lil Sisera, il-kmandant tal-eżerċtu ta’ Ġabin, bil-karrijiet u l-kotra tiegħu, u nerħih f’idejk.’ ”

⁸U Barak weġibha: “Jekk int tiġi miegħi, jien immur; jekk ma tiġix miegħi, ma mmurx[5].”

⁹U Debora wieġbet: “Jien niġi miegħek; imma ma jkollokx glorja fit-triq li se taqbad, għaliex b’id ta’ mara se jbigħ il-Mulej lil Sisera.” U qamet Debora u marret ma’ Barak f’Kedes.

¹⁰Barak, imbagħad, ġabar lil Żebulun u lil Naftali f’Kedes u telgħu miegħu għaxart elef raġel, u telgħet ukoll miegħu Debora.

¹¹Ħeber il-Keni kien infired mill-Kenin, minn ulied Ħobab, ħaten Mosè, u waqqaf it-tined tiegħu ħdejn il-Balluta f’Sagħnannin ħdejn Kedes.

¹²U ’l Sisera wasslulu l-aħbar li Barak bin Abinogħam kien tala’ fuq il-muntanja tat-Tabor.

¹³U Sisera ġabar il-karrijiet kollha tiegħu, disa’ mitt karru tal-ħadid, u n-nies kollha li kellu miegħu minn Ħaroset-ħaggojjim sal-wied ta’ Kison.

¹⁴U Debora qalet lil Barak: “Qum għax dan hu l-jum li fih il-Mulej reħa f’idejk lil Sisera. Il-Mulej se joħroġ quddiemek.” U Barak niżel mill-muntanja tat-Tabor b’għaxart elef raġel warajh.

¹⁵U l-Mulej ħarbat lil Sisera, u l-karrijiet tiegħu, u l-kotra kollha għaddiehom minn xifer ix-xabla quddiem Barak. U Sisera niżel mill-karru, u ħarab bil-mixi.

¹⁶U Barak għamel għal wara l-karrijiet, u wara l-eżerċtu sa Ħaroset-ħaggojjim; u waqa’ l-eżerċtu kollu ta’ Sisera b’xifer ix-xabla, u anqas wieħed ma baqa’ minnhom.

¹⁷U Sisera ħarab bil-mixi lejn it-tinda ta’ Ġagħel, il-mara ta’ Ħeber il-Keni, għax kien hemm il-paċi bejn Ġabin, is-sultan ta’ Ħasor, u bejn id-dar ta’ Ħeber il-Keni.

¹⁸U Ġagħel ħarġet tilqa’ lil Sisera u qaltlu: “Idħol hawn, Sidi, idħol għandi. La tibżax.” U daħal għandha fl-għarix, u għattietu b’tapit.

¹⁹U hu qalilha: “Isqini daqsxejn ilma, għax bini l-għatx.” Fetħet żaqq ħalib, u sqietu, u għattietu.

²⁰U hu qalilha: “Oqgħod fil-bieb tal-għarix, u jekk jiġi xi ħadd, u jistaqsik u jgħidlek jekk hawnx xi ħadd, għidlu: ‘Ma hawnx.’ ”

²¹Imbagħad Ġagħel, il-mara ta’ Ħeber, ħadet kunjard tat-tined, qabdet martell f’idha, u resqet ħdejh inkiss inkiss, u sammret il-kunjard ġo nagħsu u nifdithulu sal-art. U hu kien għajjien u rieqed fil-fond, u baqa’ mejjet hemm.

²²U hemm hu Barak ġej jiġri wara Sisera. Ġagħel ħarġet tilqgħu u qaltlu: “Ejja, u ara r-raġel li int qiegħed tfittex.” U daħal għandha, u hemm kien Sisera mejjet fl-art, u l-kunjard f’nagħsu.

²³U hekk dakinhar Alla ġieb fix-xejn lil Ġabin, sultan ta’ Kangħan, quddiem ulied Iżrael.

²⁴U id ulied Iżrael baqgħet dejjem tagħfas fuq Ġabin, sultan ta’ Kangħan, sakemm qerdu għalkollox lil Ġabin, sultan ta’ Kangħan.