Read Maltese Bible with DC – IL-BIBBJA IL-KOTBA MQADDSA MĦALLFIN 5 Bible Online

MĦALLFIN 5 - Maltese Bible with DC – IL-BIBBJA IL-KOTBA MQADDSA bible

MĦALLFIN 5

¹Imbagħad Debora u Barak bin Abinogħam dakinhar għannew din l-għanja:

²Talli l-mexxejja ta’ Iżrael, bi dlielhom maħlula; talli l-poplu minn rajh ta ruħu; bierku lil Jaħweh!

³Isimgħu, Slaten! agħtu widen, kbarat! Jien lil Jaħweh, jien ngħanni, indoqq lil Jaħweh, Alla ta’ Iżrael.

⁴Jaħweh, int u ħiereġ minn Segħir, int u tiela’ minn Edom, triegħdet l-art, u nħallu s-smewwiet, tqattar l-ilma mis-sħab,

⁵theżżu l-iġbla quddiem Jaħweh, ġebel Sinaj, quddiem Jaħweh, Alla ta’ Iżrael.

⁶Fi żmien Samgar bin Għanat, fi żmien Ġagħel, waqfu l-karwani, u fl-imwarrab terrqu n-nies;

⁷ħemdu l-irħula f’Iżrael, ħemdu, sa ma qomt jien, Debora, sa ma qomt jien, omm f’Iżrael!

⁸Allat ġodda ħatru, u ġo bliethom ġiethom il-gwerra. Tarka f’Iżrael ma kinitx tidher, u lanqas lanza f’erbgħin elf f’Iżrael.

⁹Minn qalbi ndur lejn il-kbarat ta’ Iżrael, lejkom li tajtu ruħkom lill-poplu: Bierku lil Jaħweh!

¹⁰Intom riekba fuq il-ħmir xehbiena, intom mixħuta fuq it-twapet, intom miexja fit-triq, għannu lkoll!

¹¹Isma’ l-għannejja ħdejn il-bjar, hemm itennu r-rebħiet ta’ Jaħweh, ir-rebħiet tiegħu b’risq Iżrael. Sal-bibien niżel il-poplu ta’ Jaħweh.

¹²Stenbaħ! Stenbaħ, Debora! Stenbaħ! Stenbaħ, għanni għanja! Qum, Barak, agħżel il-priġunieri, bin Abinogħam!

¹³Imbagħad niżlu l-bqija tan-nobbli, il-poplu ta’ Jaħweh niżel għalih bil-qawwijin.

¹⁴Minn Efrajm niżlu fil-wied, warajk fost niesek, Benjamin. Minn Makir niżlu l-mexxejja, u minn Żebulun in-nies b’ħatar il-kmand;

¹⁵u l-kbarat ta’ Issakar ma’ Debora. Issakar żamm sħiħ ma’ Barak, u lejn il-wied irħielha. Fost il-familji ta’ Ruben, firdiet kbar ta’ fehmiet il-qalb.

¹⁶Għala bqajt fl-imqawel? Għala bqajt tisma’ tisfir ir-rgħajja? Fost il-familji ta’ Ruben, firdiet kbar ta’ fehmiet il-qalb.

¹⁷Gilgħad baqa’ ’l hemm mill-Ġordan. U int, Dan, għala bqajt ’il bogħod ħdejn l-iġfien? Aser qagħad jitlajja fuq xatt il-baħar, u ħdejn il-qaliet tiegħu baqa’.

¹⁸Żebulun sal-mewt ma jibżax għal ħajtu, flimkien ma’ Naftali fuq il-wita fil-għoli.

¹⁹Ġew is-slaten, u bdew jitqabdu; tqabdu mbagħad is-slaten ta’ Kangħan, f’Tagħnak ħdejn l-ilma ta’ Megiddu; ebda priża ta’ fidda ma ħadu.

²⁰Sa l-kwiekeb tqabdu mis-smewwiet, il-kwiekeb minn triqathom tqabdu ma’ Sisera.

²¹Ġarrhom il-wied ta’ Kison, wied qalbieni, il-wied ta’ Kison! Agħmel il-ħila, imbotta ’l quddiem, ruħ tiegħi!

²²Imbagħad ħabbtu dwiefer iż-żwiemel, u lebbtu fuq li lebbtu l-ġerrejja tiegħu.

²³Isħtu lil Meroż, għajjat l-anġlu tal-Mulej Isħtu, isħtuh lil min jgħammar fih. Ma għenux lil Jaħweh, ebda għajnuna ma taw lil Jaħweh u l-qalbenin.

²⁴Imbierka fost in-nisa Ġagħel, il-mara ta’ Ħeber il-Keni, fost in-nisa tal-għerejjex imbierka.

²⁵Ilma talabha, u l-ħalib tatu; f’bieqja tal-kbarat newlitlu l-baqta.

²⁶Meddet idejha għall-kunjard, u lemintha għall-martell tal-ħaddiem. Darbet lil Sisera, u r-ras saħqitlu; nifditlu nagħsu u saħqithulu.

²⁷F’riġlejha miel, u waqa’, u nxteħet fl-art; ’il fejn miel, hemm waqa’, u mejjet baqa’.

²⁸Mit-tieqa xirfet u għajtet, Omm Sisera, mit-tieqa mxebbka: ‘X’kien iddawwar ma ġie l-mirkeb tiegħu? X’kien mitnikkra l-imriekeb tiegħu?’

²⁹Wieġbet l-egħref fost il-kbarat tan-nisa tagħha, u hi stess kellha t-tweġiba tagħha:

³⁰‘Humiex ifittxu jaqsmu l-priża? Lil kull raġel, tfajla jew tnejn; priża ta’ xaqaq bil-kulur u r-rakkmu, żewġ xaqaq bil-kulur u r-rakkmu, għal għonq Sisera?’

³¹Hekk jintemmu l-għedewwa tiegħek, Jaħweh! Imma dawk li jħobbuk, bħal ħruġ ix-xemx fil-qawwa tagħha!” U hekk il-pajjiż kellu mistrieħ għal erbgħin sena.