Read Maltese Bible with DC – IL-BIBBJA IL-KOTBA MQADDSA MĦALLFIN 6 Bible Online

MĦALLFIN 6 - Maltese Bible with DC – IL-BIBBJA IL-KOTBA MQADDSA bible

MĦALLFIN 6

¹U wlied Iżrael reġgħu għamlu l-ħażen f’għajnejn il-Mulej, u l-Mulej telaqhom f’idejn il-Midjanin għal seba’ snin.

²U id Midjan tqalet sewwa fuq Iżrael. Minħabba Midjan ulied Iżrael kellhom imorru joqogħdu fil-ħofor fil-muntanji, fl-għerien u l-fortizzi fuq l-għoljiet.

³U kull meta l-Iżraelin kienu jiżirgħu, kienu jitilgħu l-Midjanin u l-Għamalekin u n-nies tal-Lvant u jagħmlu għalihom.

⁴U jwaqqfu t-tined tagħhom ħdejhom, u jeqirdu l-uċuħ tar-raba’ sa ħdejn Gaża, u ma jħallu xejn għall-għajxien ta’ Iżrael, u la mrieħel, u la baqar u la ħmir.

⁵Kienu jiġu bl-imrieħel tagħhom, bit-tined tagħhom kotrana daqs il-ġradijiet, u iġmla bla għadd, u kienu jiġu jħarbtu l-art kollha.

⁶Iżrael kien mgħakkes sewwa minn Midjan, u wlied Iżrael għajtu lill-Mulej.

⁷Meta wlied Iżrael għajtu lill-Mulej minħabba Midjan,

⁸il-Mulej bagħat wieħed profeta lil ulied Iżrael, u qalilhom: “Dan hu li jgħid il-Mulej, Alla ta’ Iżrael: ‘Jiena tellajtkom mill-Eġittu u ħriġtkom minn art il-jasar,

⁹u ħlistkom minn idejn l-Eġizzjani, u minn idejn dawk kollha li kienu jaħqrukom, u keċċejthom minn quddiemkom, u tajtkom arthom.

¹⁰U għedtilkom: ‘Jiena hu l-Mulej, Alla tagħkom. La tqimux l-allat tal-Amurrin li intom qegħdin tgħammru f’arthom, imma intom ma smajtux minn kliemi.’ ”

¹¹L-anġlu tal-Mulej ġie u qagħad taħt il-balluta li hemm f’Għofra, li hi ta’ Ġowas l-Abigħeżri; u ibnu Gidgħon kien qiegħed jidres il-qamħ fil-magħsar biex jeħilsu mill-aktar fis mill-Midjanin.

¹²U deherlu l-anġlu tal-Mulej u qallu: “Il-Mulej miegħek, raġel qalbieni!”

¹³U Gidgħon qallu: “Imma għidli, Sidi, jekk il-Mulej magħna għaliex ġralna dan kollu? Fejn huma l-opri l-kbar li kienu jgħidulna bihom missirijietna, u qalulna: ‘Ma tellagħniex mill-Eġittu l-Mulej?’ U issa għala l-Mulej telaqna u rħiena f’idejn il-Midjanin?”

¹⁴Il-Mulej dar lejh u qallu: “Mur u eħles b’din il-qawwa tiegħek lil Iżrael mill-ħakma ta’ idejn Midjan. M’hux jien bgħattek?”

¹⁵U Gidgħon wieġbu: “Iddew, Sidi, biex se neħles lil Iżrael? Ara, il-familja tiegħi hi l-inqas waħda fit-tribù ta’ Manassi, u jien iż-żgħir f’dar missieri.”

¹⁶U l-Mulej wieġbu: “Jiena nkun miegħek! Int tidrob il-Midjanin, bħallikieku kienu raġel wieħed.”

¹⁷U wieġbu: “Jekk jien sibt ħniena f’għajnejk, agħmilli sinjal li inti qiegħed tkellimni.

¹⁸Twarrabx minn hawn sa ma nerġa’ niġi ħdejk u nġib l-offerta tiegħi u noffrihielek.” U dak wieġbu: “Jien noqgħod hawn sa ma tiġi.”

¹⁹U Gidgħon mar u ħejja gidi u ħa efa dqiq u għamilha ftajjar bla ħmira; il-laħam qiegħdu f’qoffa u l-meraq qiegħdu f’borma, u ġibhomlu quddiemu taħt il-balluta.

²⁰U l-anġlu tal-Mulej qallu: “Ħu l-laħam u l-ftajjar, u qegħedhom fuq din il-blata u sawwab il-meraq.” U hekk għamel.

²¹Imbagħad l-anġlu tal-Mulej medd tarf il-ħatar, li kellu f’idu, u mess bih il-laħam u l-ftajjar, u ħareġ in-nar mill-blata, u ħaraq il-laħam u l-ftajjar, u l-anġlu tal-Mulej għab minn quddiemu.

²²U Gidgħon ra li kien l-anġlu tal-Mulej u qal: “Ah, Sidi Mulej! Rajt jien l-anġlu tal-Mulej wiċċ imb wiċċ.”

²³U l-Mulej qallu: “Sliem għalik, la tibżax! M’intix se tmut.”

²⁴Gidgħon imbagħad bena artal lill-Mulej u sejjaħlu: ‘Jaħweh - sliem.’ Għadu hemm sal-lum f’Għofra tal-Abigħeżrin.

²⁵U ġara li dak il-lejl qallu l-Mulej: “Ħu għoġol milli għandu missierek, it-tieni għoġol ta’ seba’ snin, u ħott l-artal ta’ Bagħal, li għandu missierek, u qaċċat ix-xbieha tal-Asera[6] ta’ ħdejh.

²⁶U ibni artal kif għandu jkun lill-Mulej, Alla tiegħek, fuq ras din l-għolja, u mbagħad tieħu t-tieni għoġol, u toffrih maħruq bil-ħatab tal-Asera li tkun qaċċatt.”

²⁷Gidgħon ħa għaxart irġiel mill-qaddejja tiegħu, u għamel kif qallu l-Mulej. Iżda billi beża’ minn dar missieru u n-nies tal-belt jagħmel dan binhar, għamlu billejl.

²⁸Kif qamu filgħodu n-nies tal-belt sabu l-artal ta’ Bagħal imġarraf u l-Asera ta’ ħdejh imqaċċta, u t-tieni għoġol issagrifikat fuq l-artal li kien bena.

²⁹U bdew jgħidu wieħed lil ieħor: “Min għamel dan?” U staqsew, u fittxew, u qalu: “Gidgħon bin Ġowas għamel dan.”

³⁰U n-nies tal-belt qalu lil Ġowas: “Oħroġ lil ibnek ħa noqtluh, talli ġarraf l-artal ta’ Bagħal u qaċċat l-Asera li kienet ħdejh.”

³¹U Ġowas wieġeb lil dawk li kienu preżenti madwaru: “Tridu intom taqbżu għal Bagħal? Intom se tgħinuh? Min jaqbeż għalih, sa filgħodu jkun mejjet. Jekk Bagħal hu alla tassew, jiddefendi ruħu hu, talli ġarrfulu l-artal tiegħu.”

³²U dakinhar semmew lil Gidgħon, Ġerub-bagħal’, jiġifieri ‘ħa jeħodha kontrih Bagħal’, għax kien ġarraf l-artal ta’ Bagħal.

³³Il-Midjanin ilkoll u l-Għamalekin u n-nies tal-Lvant inġabru, u ngħaqdu flimkien, u qasmu l-Ġordan, u waqqfu l-kamp fil-wita ta’ Ġisragħel.

³⁴U l-ispirtu tal-Mulej ħataf lil Gidgħon, u dan daqq it-tromba, u nġemgħu l-Abigħeżrin għal warajh.

³⁵Bagħat ukoll messaġġiera għand Manassi, u dawn inġabru wkoll għal warajh; u messaġġiera oħra għand Aser u Żebulun u Naftali, u telgħu għal magħhom.

³⁶U Gidgħon qal lil Alla: “Jekk inti se ssalva lil Iżrael permezz tiegħi kif għedtli,

³⁷arani, jien se nqiegħed din il-ġeżża suf fuq l-andar, jekk in-nida taqa’ fuqha weħidha, u l-art tibqa’ niexfa madwarha, jien inkun naf li int se teħles lil Iżrael permezz tiegħi kif għedtli.”

³⁸U hekk ġara. L-għada bakkar, u għasar il-ġeżża, u ħarġet minnha daqs bieqja nida.

³⁹U Gidgħon qal lil Alla: “La tisħonx għalija! Ħa nitkellem u nġarrbek darba oħra biss: Ħa jkun hemm l-inxief fuq il-ġeżża weħidha u n-nida fuq l-art.”

⁴⁰U Alla għamel hekk matul il-lejl; u kien hemm l-inxief fuq il-ġeżża weħidha u nida fuq l-art kollha.