Read Maltese Bible with DC – IL-BIBBJA IL-KOTBA MQADDSA MĦALLFIN 7 Bible Online

MĦALLFIN 7 - Maltese Bible with DC – IL-BIBBJA IL-KOTBA MQADDSA bible

MĦALLFIN 7

¹U Ġerub-bagħal, jiġifieri Gidgħon, u n-nies tiegħu, qamu filgħodu kmieni, u waqqfu l-kamp ħdejn Għajn-ħarod; u l-kamp tal-Midjanin kien lejn it-Tramuntana ta’ Gidgħon, fil-wita ħdejn l-għolja Mori.

²U l-Mulej qal lil Gidgħon: “Għandek nies wisq miegħek biex nerħi lill-Midjanin f’idejhom; Iżrael jibda jiftaħar minn fuqi u jgħid: ‘Idi salvatni’.

³Għalhekk issa kellem lin-nies u xandar li jisimgħuk u għidilhom: ‘Min jibża’ u jitwerwer jerġa’ lura.’ U reġgħu lura mill-kotra tnejn u għoxrin elf, u baqgħu għaxart elef ruħ.

⁴U l-Mulej raġa’ qal lil Gidgħon: “Għad fadal wisq nies; niżżilhom ħdejn l-ilma, u hemm nagħmillek l-għażla; u ’l min ngħidlek: ‘Dan jiġi miegħek’, dan jiġi miegħek, u ’l kull min ngħidlek: ‘Dan ma jiġix miegħek’, dan ma jiġix miegħek.”

⁵U niżżel in-nies ħdejn l-ilma. U l-Mulej qal lil Gidgħon: “Kull min jilgħaq l-ilma bi lsienu bħalma jilagħqu l-klieb, qiegħdu għalih; u kull min jinżel għarkupptejh biex jixrob qiegħdu għalih”.

⁶U l-għadd ta’ dawk li lagħqu l-ilma minn idejhom ma’ fommhom kienu ta’ tliet mitt ruħ, u l-bqija tan-nies niżlu għarkupptejhom biex jixorbu l-ilma.

⁷U l-Mulej qal lil Gidgħon: “Bit-tliet mitt raġel li lagħqu l-ilma, jien insalvakom u nerħi lill-Midjanin f’idejk, u n-nies l-oħra kulħadd imur f’postu.”

⁸Imbagħad in-nies kollha ħadu l-ġarar f’idejhom u t-trombi tagħhom, u l-Iżraelin l-oħra bagħathom, kulħadd fl-għarix tiegħu, u ħa miegħu t-tliet mitt raġel. Il-kamp tal-Midjanin kien taħtu fil-wita.

⁹Dak il-lejl il-Mulej qallu: “Qum u inżel fil-kamp, għax irħejtu f’idejk.

¹⁰U jekk tibża’ tinżel int, inżel int u Pura, il-qaddej tiegħek, fil-kamp.

¹¹Issamma’ xi jkunu jgħidu, imbagħad tagħmel il-ħila, u tinżel fil-kamp.” U niżel hu u Pura, il-qaddej tiegħu, sa ħdejn l-għases tal-kamp.

¹²U l-Midjanin u l-Għamalekin u n-nies tal-Lvant kienu kollha mifruxa fil-wita, kotrana bħall-ġradijiet, u l-iġmla tagħhom daqs ir-ramel f’xatt il-baħar.

¹³Wasal Gidgħon u sama’ wieħed jirrakkonta ħolma lil sieħbu u jgħidlu: “Ara, ħlomt ħolma: rajt bħal ħobża tonda tax-xgħir[7] titgerbeb fil-kamp ta’ Midjan, ġiet ħdejn għarix, laqtitu u waqqgħetu, u qalbitu ta’ taħt fuq, u l-għarix waqa’ fl-art.”

¹⁴U sieħbu wieġeb, u qallu: “Din mhijiex ħaġa oħra ħlief ix-xabla ta’ Gidgħon bin Ġowas, l-Iżraeli. Alla tah f’idejh lill-Midjanin u l-kamp kollu.”

¹⁵Ġara li malli sama’ l-ħolma u t-tifsira tagħha, Gidgħon niżel wiċċu fl-art u raġa’ lura lejn il-kamp ta’ Iżrael, u qal: “Qumu, għax il-Mulej reħa f’idejkom il-kamp tal-Midjanin.”

¹⁶Imbagħad qassam it-tliet mitt raġel fi tliet taqsimiet; tahom tromba kull wieħed, u ġarar vojta, u torċi f’nofs il-ġarar.

¹⁷U qalilhom: “Ħarsu lejja u agħmlu bħali: Jiena mmur f’tarf il-kamp, u kif nagħmel jien, agħmlu intom.

¹⁸Malli ndoqq it-tromba, jien u dawk li jkunu miegħi, doqqu wkoll intom it-trombi madwar il-kamp kollu u għajtu: ‘Għall-Mulej u għal Gidgħon!’ ”

¹⁹U Gidgħon flimkien mal-mitt raġel li kellu miegħu wasal sa tarf il-kamp fil-bidu tal-għassa tan-nofs[8]; kienu għadhom kemm qiegħdu l-għases meta daqqew it-trombi u kissru l-ġarar li kellhom f’idejhom,

²⁰u t-tliet taqsimiet daqqew it-trombi u kissru l-ġarar, u qabdu f’idhom ix-xellugija t-torċi u f’idhom il-leminija t-trombi biex idoqqu, u għajtu: “Xabla għall-Mulej u għal Gidgħon!”

²¹U huma baqgħu kulħadd f’postu madwar il-kamp; u l-kamp kollu kien kollu ġiri u għajjat, u n-nies kollha ħarbu.

²²It-tliet mitt raġel baqgħu jdoqqu t-trombi, u l-Mulej dawwar ix-xabla ta’ kull wieħed mill-Midjanin lejn sieħbu mal-kamp kollu; u ħarab il-kamp kollu sa Bet-sitta lejn Serera sa xatt Abel-meħola ħdejn Tabbat.

²³U minn Naftali u Aser u minn Manassi kollu nġemgħu n-nies ta’ Iżrael, u għamlu għal wara l-Midjanin.

²⁴U Gidgħon bagħat messaġġiera mal-muntanji kollha ta’ Efrajm jgħidilhom: “Inżlu biex tilqgħu lill-Midjanin; aqtgħulhom il-mogħdijiet tax-xmara matul il-Ġordan sa Bet-bara.” U nġemgħu n-nies ta’ Efrajm kollha, u ħadu f’idejhom il-mogħdijiet tax-xmara matul il-Ġordan sa Bet-bara.

²⁵U qabdu ż-żewġ prinċpijiet ta’ Midjan, Għoreb u Żeb. U qatlu lil Għoreb fuq il-blata ta’ Għoreb, u lil Żeb ħdejn il-magħsar ta’ Żeb, u baqgħu sejrin għal wara l-Midjanin; u ġiebu l-irjus ta’ Għoreb u Żeb lil Gidgħon ’l hemm mill-Ġordan.