Read Maltese Bible with DC – IL-BIBBJA IL-KOTBA MQADDSA MĦALLFIN 8 Bible Online

MĦALLFIN 8 - Maltese Bible with DC – IL-BIBBJA IL-KOTBA MQADDSA bible

MĦALLFIN 8

¹U n-nies ta’ Efrajm qalulu: “Għaliex għamiltilna hekk, li ma sejjaħtilniex meta mort titqabad mal-Midjanin?” U tlewmu miegħu bl-aħrax.

²U weġibhom: “X’għamilt jien ħdejkom? Mhux aħjar għanqud żgħir ta’ Efrajm mill-ġabra sħiħa ta’ Abigħeżer?

³F’idejkom reħa Alla l-prinċpijiet ta’ Midjan, Għoreb u Żeb; xi stajt nagħmel jien aqwa milli għamiltu intom?” U birdet is-saħna li kellhom għalih malli qalilhom dan il-kliem.

⁴Gidgħon wasal ħdejn il-Ġordan, u qasam, hu u t-tliet mitt raġel li kellu miegħu, għajjenin u bil-ġuħ.

⁵U qal lin-nies ta’ Sukkot: “Iddew, agħtu ftajjar tal-ħobż lin-nies li għandi miegħi, għaliex huma għajjenin, u jien qiegħed niġri wara Żebaħ u Salmunna, slaten ta’ Midjan.”

⁶U l-kapijiet ta’ Sukkot wieġbu: “Jaqaw idejn Żebaħ u Salmunna f’idejk[9], biex nagħtu l-ħobż lill-qtajja’ tiegħek?”

⁷U Gidgħon wieġeb: “Tajjeb! Meta l-Mulej jagħtini f’idejja lil Żebaħ u lil Salmunna, nidres ġisimkom bix-xewk u bl-għollieq tax-xagħri.”

⁸U tala’ minn hemm għal Penuwel u qalilhom l-istess; u n-nies ta’ Penuwel wieġbu l-istess bħan-nies ta’ Sukkot.

⁹U hu wieġeb l-istess lin-nies ta’ Penuwel u qalilhom: “Meta nerġa’ lura bis-sliem, inġarraf dan it-torri.”

¹⁰Żebaħ u Salmunna kienu f’Karkor bil-kamp tagħhom, b’xi ħmistax-il elf raġel; dan kulma kien baqa’ mill-kamp kollu ta’ wlied il-Lvant, li minnhom kienu waqgħu xi mija u għoxrin elf raġel kapaċi jħaddmu x-xabla.

¹¹Gidgħon tala’ u qabad it-triq tan-nies li jgħammru fit-tined, fuq in-naħa tal-Lvant ta’ Noba u Ġogħba, u ħarbat il-kamp, meta n-nies ma kellhom ebda ħsieb ta’ xejn.

¹²Żebaħ u Salmunna ħarbu, u hu għamel għal warajhom, u qabad f’idejh lil dawn iż-żewġ slaten tal-Midjanin, Żebaħ u Salmunna, u ħarbat il-kamp kollu.

¹³Gidgħon bin Ġowas raġa’ lura mit-taqbida mit-telgħa ta’ Ħeres.

¹⁴U qabad żagħżugħ min-nies ta’ Sukkot u staqsieh; u dan kitiblu l-ismijiet tal-kapijiet u x-xjuħ ta’ Sukkot, sebgħa u sebgħin raġel.

¹⁵U mar għand in-nies ta’ Sukkot u qalilhom: “Hawn huma Żebaħ u Salmunna li għajjartuni bihom u staqsejtuni: ‘Għandek forsi f’idejk ’il Żebaħ u Salmunna biex nagħtuk il-ħobż għal niesek għajjenin?’ ”

¹⁶U qabad il-kbarat tal-belt; u ħa x-xewk u l-għollieq mix-xagħri, u dires bihom in-nies ta’ Sukkot.

¹⁷U ġarraf it-torri ta’ Penuwel u qatel in-nies tal-belt.

¹⁸U lil Żebaħ u Salmunna qalilhom: “Kif kienu n-nies li qtiltu f’Tabor?” U huma weġbuh: “Jixbhu lilek; kull wieħed donnu bin sultan.”

¹⁹U hu qalilhom: “Kienu ħuti, ulied ommi. Daqs kemm hu ħaj il-Mulej, ma kontx noqtolkom, kieku ħallejtuhom ħajjin.”

²⁰U dar fuq ibnu l-kbir Ġeter u qallu: “Qum u oqtolhom.” Imma ż-żagħżugħ ma silitx ix-xabla għax baża’, billi kien għadu tfal.

²¹U Żebaħ u Salmunna qalulu: “Qum, u nxteħet fuqna int, għax int għandek saħħa ta’ raġel.” U qam Gidgħon u qatel lil Żebaħ u lil Salmunna, u ħa l-oqmra li kienu ma’ għonq l-iġmla tagħhom.

²²U n-nies ta’ Iżrael qalu lil Gidgħon: “Saltan fuqna, int u ibnek, u bin ibnek, għax int salvajtna minn id il-Midjanin.”

²³U weġibhom Gidgħon: “Ma nsaltanx fuqkom, la jien u lanqas ibni; il-Mulej isaltan fuqkom.”

²⁴U ssokta jgħidilhom Gidgħon: “Ħaġa waħda nitlobkom: agħtuni kull wieħed il-ħoloq li ħadtu mill-priża” - għax kellhom kull wieħed ħoloq tad-deheb, billi l-għedewwa kienu Ismagħelin[10].

²⁵U qalulu: “Nagħtuhomlok.” U firxu mantar, u xeħtu fuqu kull wieħed il-ħoloq li kellu mill-priża.

²⁶U l-piż ta’ dawn il-ħoloq tad-deheb li talab kien ta’ elf u seba’ mitt xekel, barra l-oqmra, l-imsielet, l-ilbies tal-porpra, li kienu fuq is-slaten ta’ Midjan, u l-ħnienaq ta’ madwar għonq l-iġmla tagħhom.

²⁷U Gidgħon għamel efod u qiegħdu fil-belt tiegħu ta’ Għofra; u l-poplu ta’ Iżrael kollu żena hemm mal-allat, u kienet nassa għal Gidgħon u daru.

²⁸Hekk il-Midjanin għakksuhom ulied Iżrael, u ma setgħux jerfgħu rashom aktar, u l-art strieħet għal erbgħin sena sakemm baqa’ ħaj Gidgħon.

²⁹Ġerub-bagħal bin Ġowas mar u għammar f’daru.

³⁰Gidgħon kellu sebgħin tifel li tnisslu minnu, għax kien iżżewweġ ħafna nisa.

³¹Waħda konkubina tiegħu, li kienet toqgħod f’Sikem, wilditlu iben hi wkoll, u semmieh Abimelek.

³²U Gidgħon bin Ġowas miet meta kien xjieħ sewwa, u difnuh fil-qabar ta’ Ġowas missieru f’Għofra ta’ Abigħeżer.

³³U ġara li malli miet Gidgħon ulied Iżrael reġgħu żnew mal-allat Bagħalim u għażlu b’alla tagħhom lil Bagħal-berit[11];

³⁴ma ftakrux aktar fil-Mulej Alla tagħhom, li kien ħelishom minn id l-għedewwa tagħhom ta’ madwarhom.

³⁵U ma wrewx imħabba lejn dar Ġerub-bagħal, Gidgħon, għall-ġid kollu li kien għamel ma’ Iżrael.