Read Maltese Bible with DC – IL-BIBBJA IL-KOTBA MQADDSA MĦALLFIN 9 Bible Online

MĦALLFIN 9 - Maltese Bible with DC – IL-BIBBJA IL-KOTBA MQADDSA bible

MĦALLFIN 9

¹Abimelek bin Ġerub-bagħal mar Sikem, għand ħut ommu, u kellem lilhom u l-familja kollha ta’ dar missier ommu, u qalilhom:

²“Għidu f’widnejn il-kbarat kollha ta’ Sikem: ‘X’inhu l-aħjar għalikom, li jaħkmu fuqkom sebgħin raġel, ilkoll ulied Ġerub-bagħal, jew li jaħkem fuqhom bniedem wieħed? Ftakru li laħamkom u għadamkom jien.”

³U ħut ommu tkellmu f’widnejn in-nies ta’ Sikem dan il-kliem kollu, u qalbhom inġibdet lejn Abimelek, għax qalu: “Ħuna hu.”

⁴U tawh sebgħin biċċa tal-fidda mit-tempju ta’ Bagħal-berit, u bihom kera nies ta’ xejn u bla kont, u marru warajh.

⁵U mar f’dar missieru f’Għofra, u qatel lil ħutu wlied Ġerub-bagħal, sebgħin wieħed, fuq ħaġra waħda; u baqa’ wieħed, Ġotam, l-iben iż-żgħir ta’ Ġerub-bagħal, għax kien inħeba.

⁶Imbagħad inġabru l-kbarat kollha ta’ Sikem u Bet-millu, u qabdu u għamlu lil Abimelek sultan ħdejn il-balluta li hemm f’Sikem.

⁷Meta għarrfuh b’dan, Ġotam mar u qagħad fuq il-quċċata tal-muntanja Gariżim, u għolla leħnu u sejħilhom u qalilhom: “Isimgħu, nies ta’ Sikem! Hekk Alla jisma’ lilkom.

⁸Darba marru s-siġar biex jidilku sultan fuqhom. U qalu liż-żebbuġa: ‘saltan fuqna.’

⁹U ż-żebbuġa weġbithom: ‘Għandi nħalli jiena żejti, li bih jitweġġħu l-allat u l-bnedmin[12], biex immur niddandan fuq is-siġar?’

¹⁰U s-siġar qalu lit-tina: ‘Ejja int, u saltan fuqna.’

¹¹U t-tina weġbithom: ‘Għandi nħalli jien il-ħlewwa, u l-frott bnin tiegħi, u mmur niddandan fuq is-siġar?’

¹²U s-siġar qalu lid-dielja: ‘Ejja int, u saltan fuqna.’

¹³U d-dielja weġbithom: ‘Għandi nħalli jien l-inbid tiegħi, li jferraħ l-allat u l-bnedmin[13], u mmur niddandan fuq is-siġar?’

¹⁴U s-siġar kollha qalu lill-għollieq: ‘Ejja int, u saltan fuqna.’

¹⁵U l-għollieq qal lis-siġar: ‘Jekk intom tassew tridu tidilkuni sultan fuqkom, ejjew stkennu taħt delli. Jekk le, joħroġ nar mill-għollieq[14] u jibla’ ċ-ċedri tal-Libanu.’

¹⁶U issa, taħsbu li għamiltu l-ħaqq u s-sewwa meta għamiltu lil Abimelek sultan fuqkom? Taħsbu li għamiltu l-ġid ma’ Ġerub-bagħal u ma’ daru? Taħsbu li għamiltu miegħu skont ma għamel hu,

¹⁷meta missieri tqabad għalikom, u tarraf ħajtu, u ħeliskom minn id il-Midjanin?

¹⁸Intom illum qomtu kontra dar missieri u qtiltu lil uliedu - sebgħin wieħed fuq ħaġra waħda - u għamiltu lil Abimelek, bin il-konkubina tiegħu, fuq in-nies ta’ Sikem, għax hu ħukom.

¹⁹Jekk għamiltu l-ħaqq u s-sewwa ma’ Ġerub-bagħal u ma’ daru llum, ifirħu b’Abimelek u hu jifraħ bikom.

²⁰Imma jekk le, ħa joħroġ nar minn Abimelek u jibla’ n-nies ta’ Sikem u Bet-millu; u mbagħad joħroġ nar min-nies ta’ Sikem u Bet-millu, u jibla’ lil Abimelek.”

²¹Imbagħad Ġotam ħarab, u għab u mar Bir u baqa’ hemm minħabba ħuh Abimelek.

²²Tliet snin kien ilu Abimelek jaħkem ta’ prinċep fuq Iżrael.

²³U Alla bagħat spirtu ħażin bejn Abimelek u bejn in-nies ta’ Sikem; u n-nies ta’ Sikem qamu kontra Abimelek,

²⁴biex b’hekk titħallas il-qatla tas-sebgħin tifel ta’ Ġerub-bagħal, u demmhom jaqa’ fuq Abimelek ħuhom, li kien qatilhom, u fuq in-nies ta’ Sikem li għenuh biex qatel lil ħutu.

²⁵U n-nies ta’ Sikem qegħdulu nies moħbija fuq il-qċaċet tal-għoljiet, u dawn kienu jisirqu lil kull min jgħaddi mit-triq minn dawn l-inħawi; u hekk l-aħbar waslet għand Abimelek.

²⁶U ġie Ġagħal bin Għebed, u ħutu, u għaddew minn Sikem; u n-nies ta’ Sikem fdaw ruħhom f’idejh.

²⁷Ħarġu fir-raba’, qatgħu l-għeneb mid-dwieli tagħhom, u għaffġuh fil-magħsar, u għamlu festa; u marru f’dar alla tagħhom u kielu u xorbu, u seħtu lil Abimelek.

²⁸U Ġagħal bin Għebed qal: “Min hu Abimelek? Min hu Sikem, biex aħna naqduh? Ma kienx dan bin Ġerub-bagħal u dan Żebul, qaddej tiegħu, jaqdu lin-nies ta’ Ħamor, missier Sikem? Għala għandna naqduhom aħna?

²⁹Li kelli dawn in-nies f’idejja kont inneħħi lil Abimelek u ngħidlu: ‘Iġbor in-nies tiegħek u oħroġ u ġġieled.’ ”

³⁰U Żebul, il-kap tal-belt, sama’ bi kliem Ġagħal bin Għebed, u xegħel bil-korla.

³¹U bagħat messaġġiera għand Abimelek f’Aruma jgħidulu: “Ara, Ġagħal bin Għebed u ħutu ġew Sikem, u bdew ixewxu n-nies tal-belt kontra tiegħek.

³²Qum mela billejl, int u niesek li għandek miegħek, u għasses fir-raba’;

³³u filgħodu kmieni ma’ tlugħ ix-xemx aħbat għall-belt, u malli joħorġu għalik, hu u n-nies li għandu miegħu, agħmillu li jiġi għal idejk.”

³⁴U qam Abimelek u n-nies li kellu miegħu billejl u qagħdu għassa ħdejn Sikem f’erba’ qatgħat.

³⁵U ħareġ Ġagħal bin Għebed u qagħad fid-daħla ta’ bieb il-belt, u Abimelek u n-nies li kellu miegħu qamu mill-moħba.

³⁶Malli Ġagħal ra n-nies qal lil Żebul: “Ara hemm in-nies nieżla mill-għoljiet.” U Żebul wieġbu: “Dell l-għoljiet qiegħed taħsbu nies.”

³⁷U Ġagħal issokta jgħid: “Ara hemm in-nies nieżla minn nofs l-art, qatgħa minnhom ġejja mit-triq tal-Balluta tas-Saħħara.”

³⁸U Żebul qallu: “Fejn hu l-ftaħir tiegħek meta għedt: ‘Min hu Abimelek biex naqduh? Mhux dawn huma n-nies li int maqdart? Oħroġ issa u tqabad miegħu.”

³⁹U Ġagħal ħareġ quddiem in-nies ta’ Sikem u tqabad ma’ Abimelek.

⁴⁰Abimelek għamel għal warajh u Ġagħal ħarab minn quddiemu, u ħafna nies waqgħu maqtula sa ħdejn id-daħla ta’ bieb il-belt.

⁴¹U Abimelek raġa’ lura f’Aruma, u Żebul keċċa lil Ġagħal u ’l niesu, u ma ħallihomx joqogħdu f’Sikem.

⁴²L-għada l-poplu ħareġ fir-raba’; u ’l Abimelek qalulu b’dan.

⁴³U ġabar in-nies tiegħu, u qassamhom fi tliet qatgħat, u qagħad moħbi fir-raba’. Malli ra n-nies ħierġa mill-belt, qam għalihom u farrakhom.

⁴⁴Abimelek u l-qatgħa li kellu miegħu tqassmu u qagħdu fid-daħla ta’ bieb il-belt, u ż-żewġ qatgħat l-oħra nxteħtu fuq dawk kollha li kienu fir-raba’ u farrkuhom.

⁴⁵U Abimelek baqa’ jitqabad fil-belt dak il-jum kollu, u ħa l-belt u qatel in-nies li kien hemm fiha; ġarraf il-belt u xerred il-melħ fuqha[15].

⁴⁶U n-nies tat-torri ta’ Sikem semgħu b’dan, u marru jistkennu fil-kamra taħt l-art fit-tempju ta’ El-berit.

⁴⁷U ’l Abimelek qalulu li n-nies tat-torri ta’ Sikem marru jinġemgħu hemmhekk.

⁴⁸U Abimelek tala’ fuq l-għolja ta’ Salmon, hu u n-nies kollha li kellu miegħu; u Abimelek ħa mannara f’idu u qaċċat fergħa minn siġra, refagħha u qegħedha fuq spalltu, u qal lin-nies li kellu miegħu: “Fittxu agħmlu dak li rajtuni nagħmel.”

⁴⁹U n-nies kollha qaċċtu fergħa kull wieħed, u marru wara Abimelek, u xeħtuhom ħdejn il-kamra taħt l-art u tawha n-nar bihom, u hekk mietu n-nies kollha tat-torri ta’ Sikem, madwar elf ruħ, nisa u rġiel.

⁵⁰Abimelek imbagħad mar Tebes, dawwarha u ħadha f’idejh.

⁵¹F’nofs il-belt kien hemm torri qawwi, u marru jinħbew fih in-nies kollha tal-belt, nisa u rġiel; sakkru warajhom u telgħu fuq is-saqaf tat-torri.

⁵²Abimelek erħielha lejn it-torri, u ħabat għalih, u resaq lejn il-bieb biex jagħtih in-nar.

⁵³Imma waħda mara waddbet ħaġra ta’ fuq ta’ mitħna għal fuq ras Abimelek, u kissritlu rasu.

⁵⁴U sejjaħ iż-żagħżugħ li kien iġorrlu l-armi u qallu: “Islet ix-xabla u oqtolni, li ma jgħidux li qatlitni mara.” U ż-żagħżugħ nifdu u miet.

⁵⁵U l-Iżraelin raw li Abimelek miet, u kulħadd mar lejn daru.

⁵⁶U hekk Alla radd lil Abimelek il-ħażin kollu li kien għamel lil missieru meta qatel is-sebgħin ħutu.

⁵⁷U Alla radd ukoll fuqhom il-ħażin kollu li kienu għamlu n-nies ta’ Sikem, u laħqithom is-saħta ta’ Ġotam bin Ġerub-bagħal.