Read Maltese Bible with DC – IL-BIBBJA IL-KOTBA MQADDSA 3 ĠWANNI 1 Bible Online

3 ĠWANNI 1 - Maltese Bible with DC – IL-BIBBJA IL-KOTBA MQADDSA bible

3 ĠWANNI 1

¹Il-presbiteru, lil Gaju l-għażiż, li jiena nħobb fis-sewwa.

²Għażiż, nitlob lil Alla li kollox imurlek tajjeb u li tkun f’saħħtek, l-istess bħalma inti sejjer tajjeb f’ruħek.

³Fraħt ħafna b’dawk l-aħwa li ġew u taw xhieda tal-verità tiegħek, kif inti miexi fil-verità.

⁴Ngħid għalija, ma nafx b’ferħ akbar minn dak li nħoss meta nisma’ li wliedi mexjin fil-verità.

⁵Int, għażiż, qiegħed iġġib ruħek bħala bniedem tal-fidi f’dak li qiegħed tagħmel għal ħutna, imqar meta jkunu barranin.

⁶Huma xehdu dwar l-imħabba tiegħek quddiem il-knisja[1]. Tagħmel sew jekk tieqaf magħhom fil-vjaġġi tagħhom kif jixraq lis-servizz ta’ Alla.

⁷Għax jekk dawn siefru, dan għamluh għall-Isem, bla ma ħadu xejn mingħand il-pagani.

⁸Mela nies bħal dawn aħna fid-dmir li nilqgħuhom, ħalli b’hekk nissieħbu magħhom fil-ħidma għat-tixrid tal-verità.

⁹Jien ġa ktibt xi ħaġa lill-knisja[2], imma Dijotrefi, dak li jħobb jaqbeż lil kulħadd, ma riedx jilqa’ l-kelma tagħna.

¹⁰Għalhekk, jekk niġi, nurih kulma qiegħed jagħmel, it-tpaċpiċ żejjed u l-kliem ħażin li qiegħed jgħid fuqna. U mhux kuntent b’dan, anqas lill-aħwa ma jilqa’, u anqas ma jħalli lil dawk li jkunu jridu jilqgħuhom; imma jkeċċihom ’il barra mill-knisja.

¹¹Għażiż, timxix fuq il-ħażin, imma fuq it-tajjeb. Min jagħmel it-tajjeb ġej minn Alla; min jagħmel il-ħażin ma rax lil Alla.

¹²Demetriju għandu x-xhieda tiegħu minn kulħadd, sa mill-istess verità. U aħna wkoll nixhdu għalih, u inti taf li x-xhieda tagħna hija vera.

¹³Kont kieku niktiblek wisq iżjed minn hekk, imma ma rridx ngħidhulek bil-linka u l-pinna.

¹⁴Nittama li narak ma ndumx; imbagħad inkellmek wiċċ imb wiċċ.

¹⁵Is-sliem għalik. Il-ħbieb jibagħtu jsellu għalik. Sellili għall-ħbieb, wieħed wieħed.