Read Maltese Bible with DC – IL-BIBBJA IL-KOTBA MQADDSA APOKALISSI 1 Bible Online

APOKALISSI 1 - Maltese Bible with DC – IL-BIBBJA IL-KOTBA MQADDSA bible

APOKALISSI 1

¹Ir-Rivelazzjoni[1] ta’ Ġesù Kristu li tahielu Alla biex jgħarraf lill-qaddejja tiegħu b’dak li għandu jiġri ma jdumx. Alla bagħat lill-anġlu tiegħu jfissirha lill-qaddej tiegħu Ġwanni,

²li kien xhud tal-kelma ta’ Alla u tax-xhieda mogħtija minn Ġesù Kristu, u ta’ kulma ra b’għajnejh[2].

³Hieni dak li jaqra[3] u dawk li jisimgħu l-kliem ta’ din il-profezija u jħarsu dak li hemm miktub, għax iż-żmien qorob!

⁴Ġwanni, lis-seba’ knejjes li hemm fl-Asja[4]: grazzja lilkom u sliem mingħand Dak li hu, u li kien, u li għad irid jiġi, u min-naħa tas-seba’ spirti li qegħdin quddiem it-tron tiegħu,

⁵u mingħand Ġesù Kristu, ix-xhud fidil, il-Kbir fost il-mejtin, il-Prinċep tas-slaten tad-dinja. Lil Dak li ħabbna, u li ħallna minn dnubietna[5] bis-saħħa ta’ demmu,

⁶u li għamilna Saltna, Qassisin għal Alla tiegħu Missieru, lilu l-glorja u s-setgħa għal dejjem ta’ dejjem. Ammen.

⁷Arawh, ġej fis-sħab, u l-għajnejn kollha jarawh, ukoll dawk li kienu nifduh; u r-razez kollha tal-art jibdew iħabbtu fuq sidirhom minħabba fih. Iva. Ammen.

⁸“Jiena huwa l-Alfa u l-Omega[6]”, jgħid il-Mulej Alla, li hu, u li kien, u li għad irid jiġi, Dak li jista’ kollox.

⁹Jiena, Ġwanni, ħukom u sieħeb tagħkom fit-taħbit u fis-saltna u fis-sabar ma’ Ġesù, jien sibt ruħi fil-gżira jisimha Patmos[7] minħabba l-Kelma ta’ Alla u x-xhieda ta’ Ġesù.

¹⁰Darba, f’jum il-Mulej[8], ħassejtni merfugħ fl-Ispirtu, u minn warajja smajt leħen qawwi, bħal ta’ tromba,

¹¹jgħidli: “Kulma tara niżżlu fi ktieb u ibagħtu lis-seba’ knejjes, lil dik ta’ Efesu, ta’ Żmirna, ta’ Pergamu, ta’ Tjatira, ta’ Sardi, ta’ Filadelfja u ta’ Laodiċija.”

¹²U jiena dort biex nara min kien qiegħed ikellimni; u, kif dort, rajt seba’ kandelabri tad-deheb,

¹³u f’nofs il-kandelabri kien hemm wieħed qisu Iben ta’ bniedem, liebes libsa twila sa wiċċ saqajh, b’sidru mħażżem bi ħżiem tad-deheb;

¹⁴rasu u xuxtu bajda bħas-suf, ileqqu daqs is-silġ, u għajnejh kienu ġamra nar;

¹⁵kellu saqajh donnhom tal-metall ileqq imsoffi ġo forġa, u leħnu bħall-ħoss ta’ ħafna ilmijiet;

¹⁶f’idu l-leminija kellu seba’ kwiekeb, u minn fommu kienet ħierġa xabla misnuna miż-żewġ naħat; wiċċu kien jiddi bħax-xemx fl-eqqel tagħha.

¹⁷Jien, kif rajtu, waqajt qisni mejjet f’riġlejh. Iżda hu ressaq idu l-leminija fuqi u qalli: “Tibżax; jien hu l-Ewwel u l-Aħħar,

¹⁸jiena l-Ħaj; jien kont mejjet, u ara, jien issa ħaj għal dejjem ta’ dejjem, u għandi jinsabu l-imfietaħ tal-Mewt u ta’ Post il-Mejtin[9].

¹⁹Ikteb kulma tara, kemm il-ħwejjeġ li hawn issa u kemm dawk li se jiġru ’l quddiem.

²⁰Dwar il-misteru moħbi fis-seba’ kwiekeb li rajtli f’idi l-leminija u fis-seba’ kandelabri tad-deheb, kun af li s-seba’ kwiekeb huma s-seba’ anġli tas-seba’ knejjes, u s-seba’ kandelabri huma s-seba’ knejjes.