Read Maltese Bible with DC – IL-BIBBJA IL-KOTBA MQADDSA APOKALISSI 10 Bible Online

APOKALISSI 10 - Maltese Bible with DC – IL-BIBBJA IL-KOTBA MQADDSA bible

APOKALISSI 10

¹U rajt anġlu ieħor ta’ saħħa kbira nieżel mis-sema, bi sħaba madwaru, qawsalla fuq rasu[43], wiċċu qisu x-xemx, saqajh donnhom kolonni tan-nar,

²bi ktejjeb miftuħ f’idu. U hu serraħ siequ l-leminija fuq il-baħar u x-xellugija fuq l-art,

³u fetaħ jgħajjat b’leħen qawwi kif jgħajjat iljun, u wara li samma’ l-għajta tiegħu, il-ħoss tas-seba’ ragħdiet beda jfaqqa’.

⁴Wara li nstama’ l-ħoss tas-seba’ ragħdiet jien kont se naqbad nikteb, imma smajt leħen ġej mis-sema jgħid: “Kulma qalu s-seba’ ragħdiet ħallih moħbi, tniżżlux fil-kitba.”

⁵Imbagħad l-anġlu, li kont rajtu wieqaf fuq il-baħar u fuq l-art, rafa’ idu l-leminija lejn is-sema,

⁶u ħalef b’dak li hu ħaj għal dejjem ta’ dejjem, li ħalaq is-smewwiet b’kulma fihom, u d-dinja b’kulma fiha, u l-baħar b’kulma fih; ħalef li ma hemmx aktar dewmien,

⁷imma li meta jinstama’ s-seba’ anġlu, li kellu jdoqq it-tromba tiegħu, ikun mitmum il-misteru ta’ Alla[44], li kien ħabbar lill-qaddejja tiegħu l-profeti.

⁸Imbagħad il-leħen li kont smajt mis-sema raġa’ kellimni u qalli: “Mur ħu l-ktieb il-miftuħ li hemm f’id l-anġlu wieqaf fuq il-baħar u fuq l-art”.

⁹U mort ħdejn l-anġlu u għedtlu jagħtini l-ktejjeb. U qalli: “Ħu, u ibilgħu, u jsirlek imrar ġo fik, imma ġo ħalqek jiġik ħelu għasel.”

¹⁰Jien ħadt il-ktejjeb minn id l-anġlu u blajtu, u ġo ħalqi ħassejtu ħelu għasel; iżda meta kiltu, imlieni bl-imrar ġo fija.

¹¹Imbagħad qaluli: “Int għandek terġa’ tħabbar dwar ħafna popli u ġnus, u ilsna[45] u slaten.”