Read Maltese Bible with DC – IL-BIBBJA IL-KOTBA MQADDSA APOKALISSI 11 Bible Online

APOKALISSI 11 - Maltese Bible with DC – IL-BIBBJA IL-KOTBA MQADDSA bible

APOKALISSI 11

¹Tawni qasba tal-qjies, donna għasluġ, u qaluli: “Qum, u ħu l-qisien tat-tempju ta’ Alla u tal-artal u ta’ dawk li qegħdin jagħtu qima fih.

²Il-bitħa ta’ barra tat-tempju ħalliha, tiħux qisien tagħha, għax dik ingħatat lill-ġnus, u huma se jdumu tnejn u erbgħin xahar[46] jirfsu fuq il-Belt Imqaddsa.

³Imma liż-żewġ xhieda tiegħi nagħtihom li, bl-ilbies tax-xkejjer fuqhom[47], iħabbru għal elf, mitejn u sittin jum.”

⁴Dawn huma ż-żewġ siġriet taż-żebbuġ u ż-żewġ kandelabri wieqfa quddiem is-Sid tal-art.

⁵Jekk xi ħadd jaqbad biex jagħmlilhom ħsara, joħroġ nar minn fommhom li jibla’ l-għedewwa tagħhom. Jekk xi ħadd ikun irid jagħmlilhom ħsara, hekk ikollu jinqered.

⁶Huma għandhom is-setgħa jagħlqu s-sema biex ma tagħmilx xita matul il-jiem li fihom ikunu qegħdin iħabbru; għandhom is-setgħa fuq l-ilmijiet biex ibiddluhom f’demm, u li, kull meta jridu, jidorbu l-art b’kull kastig.

⁷U meta jkunu taw ix-xhieda tagħhom, il-Bhima, li titla’ mill-bir bla qiegħ, tagħmlilhom gwerra, tirbaħhom u toqtolhom.

⁸U l-ġisem mejjet tagħhom iħalluh fil-pjazza tal-Belt il-Kbira[48], li jsejħulha b’tixbiha Sodoma u Eġittu, hemm fejn ukoll il-Mulej tagħhom kien imsallab.

⁹Xi wħud mill-popli, mit-tribù, mill-ilsna u mill-ġnus joqogħdu għal tlitt ijiem u nofs iħarsu lejn il-ġisem mejjet tagħhom, u ma jħallux li l-iġsma mejta tagħhom jindifnu f’qabar.

¹⁰U dawk li jkunu jgħammru fuq l-art jifirħu u jithennew minħabba fihom, u jagħtu rigali lil xulxin, għax dawn iż-żewġ profeti kienu jaħqru lil min jgħammar fuq l-art.

¹¹Imma wara tlitt ijiem u nofs daħal fihom spirtu ta’ ħajja, ġej minn Alla, u huma waqfu fuq riġlejhom, u biża’ kbir waqa’ fuq dawk li kienu qegħdin iħarsu lejhom.

¹²U semgħu leħen qawwi mis-sema jgħidilhom: “Itilgħu hawn.” U huma telgħu lejn is-sema fi sħaba, u l-għedewwa tagħhom baqgħu jħarsu lejhom.

¹³U f’dik is-siegħa saret theżżiża kbira tal-art, u ġġarrfet waħda mill-għaxra tal-Belt; inqerdu f’dik it-theżżiża sebat elef ruħ, u l-bqija twerwru u taw glorja lil Alla tas-sema.

¹⁴It-tieni ħasra għaddiet; u ara, tasal minnufih it-tielet ħasra.

¹⁵Is-seba’ anġlu daqq it-tromba; u ilħna qawwija nstemgħu fis-sema jgħidu: “Is-saltna tad-dinja saret ta’ Sidna u tal-Messija tiegħu, u hu se jsaltan għal dejjem ta’ dejjem.”

¹⁶U l-erbgħa u għoxrin Xiħ, li kienu bilqiegħda fuq is-siġġijiet tagħhom quddiem Alla, inxteħtu għal wiċċhom jagħtu qima lil Alla

¹⁷u qalu: “Niżżuk ħajr, Mulej, Alla li tista’ kollox, li int u li kont, talli ħadt il-qawwa l-kbira tiegħek u bdejt issaltan.

¹⁸Il-ġnus imtlew bil-korla, imma l-korla tiegħek ġiet u wasal iż-żmien li jsir ħaqq mill-mejtin u jingħata l-ħlas mistħoqq, lill-qaddejja tiegħek il-profeti, lill-qaddisin u ’l dawk li jibżgħu minn ismek, kemm iż-żgħar u kemm il-kbar, u jinqerdu dawk li qegħdin jeqirdu d-dinja.”

¹⁹U nfetaħ it-tempju ta’ Alla, li hemm fis-sema, u dehret l-Arka tal-Patt tiegħu fit-tempju tiegħu. Imbagħad beda jberraq u kien hemm ħafna ħsejjes u ragħad u theżżiż u silġ oħxon.