Read Maltese Bible with DC – IL-BIBBJA IL-KOTBA MQADDSA APOKALISSI 14 Bible Online

APOKALISSI 14 - Maltese Bible with DC – IL-BIBBJA IL-KOTBA MQADDSA bible

APOKALISSI 14

¹Imbagħad ħarist u rajt il-Ħaruf, wieqaf fuq il-muntanja Sijon, u miegħu mija u erbgħa u erbgħin elf ruħ, li kellhom ismu u isem Missieru miktub fuq ġbinhom.

²U smajt leħen mis-sema, qisu ħoss ta’ ħafna ilmijiet, donnu tkarwit ta’ ragħad; u l-leħen li smajt kien bħal dak ta’ kitarristi jdoqqu ċ-ċetri tagħhom.

³Kienu jgħannu għanja ġdida quddiem it-tron u quddiem l-erba’ Ħlejjaq Ħajjin u x-Xjuħ. U ħadd ma seta’ jitgħallimha dik l-għanja, ħlief il-mija u erbgħa u erbgħin elf, il-mifdija mill-art.

⁴Dawn huma li ma tniġġsux man-nisa[59], għax huma verġni; huma li jimxu wara l-Ħaruf kull fejn imur; huma kienu mifdija minn fost il-bnedmin, l-ewwel frott għal Alla u għall-Ħaruf,

⁵u minn fommhom qatt ma ħarġet gidba[60]; bla tebgħa huma.

⁶Imbagħad rajt anġlu ieħor jittajjar fl-għoli tas-sema, bl-Evanġelju ta’ dejjem ħalli jxandru lil min jgħammar fuq l-art, lil kull ġens, tribù, ilsien u poplu;

⁷u b’leħen qawwi beda jgħid: “Ibżgħu minn Alla u agħtuh glorja, għax ġiet is-siegħa tal-ħaqq tiegħu, u nxteħtu agħtu qima lil dak li għamel is-sema u l-art u l-baħar u l-għejun tal-ilmijiet.”

⁸U anġlu ieħor, it-tieni wieħed, ġie warajh jgħid: “Iġġarrfet, iġġarrfet Babilonja l-Kbira[61], dik li sqiet il-ġnus kollha bl-inbid ibaqbaq taż-żina tagħha.”

⁹U anġlu ieħor, it-tielet wieħed, ġie warajhom jgħid b’leħen qawwi: “Min jinxteħet iqim il-Bhima u x-xbieha tagħha u jieħu l-marka fuq ġbinu jew fuq idu,

¹⁰hu wkoll jixrob mill-inbid tal-korla ta’ Alla li hemm imferragħ safi fit-tazza tal-qilla tiegħu, u jinħaqar b’nar u kubrit quddiem l-anġli qaddisin u quddiem il-Ħaruf.

¹¹U d-duħħan tat-tbatija tagħhom jitla’ għal dejjem ta’ dejjem; u ma jkollhomx mistrieħ, la billejl u lanqas binhar, dawk li jinxteħtu jqimu l-Bhima u x-xbieha tagħha u min jieħu l-marka ta’ isimha.”

¹²F’dan qiegħed is-sabar tal-qaddisin, ta’ dawk li jħarsu l-preċetti ta’ Alla u l-fidi f’Ġesù.

¹³Imbagħad smajt leħen mis-sema jgħid: “Ikteb: Hienja minn issa l-mejtin li jmutu fil-Mulej. Iva, jgħid l-Ispirtu, huma jistrieħu mit-taħbit kollu tagħhom, għax l-għemejjel tagħhom imorru magħhom.”

¹⁴Ħarist, u rajt sħaba bajda, u fuq is-sħaba kien hemm bilqiegħda wieħed donnu Iben ta’ bniedem, b’kuruna tad-deheb fuq rasu u minġel misnun f’idu.

¹⁵U mit-tempju ħareġ anġlu ieħor jgħajjat b’leħen qawwi lil dak li kien bilqiegħda fuq is-sħaba: “Midd il-minġel tiegħek u aħsad, għax waslet is-siegħa biex taħsad, għax il-ħsad tal-art misjur sewwa.”

¹⁶U dak li kien bilqiegħda fuq is-sħaba xejjer il-minġel tiegħu, u l-art sarilha l-ħsad.

¹⁷U mbagħad mit-tempju li hemm fis-sema ħareġ anġlu ieħor, li kellu hu wkoll minġel misnun.

¹⁸U anġlu ieħor, li kellu s-setgħa fuq in-nar, ħareġ minn ħdejn l-artal u għajjat b’leħen qawwi lil dak li kellu l-minġel misnun u qallu: “Midd int il-minġel il-misnun, u iġbor l-għenieqed tad-dielja tal-art, għax l-għeneb tagħha sar.”

¹⁹U l-anġlu xejjer il-minġel tiegħu lejn l-art, qata’ l-għenieqed tad-dielja tal-art, u xeħethom fil-magħsra l-kbira tal-korla ta’ Alla;

²⁰imbagħad bdew jisħqu l-għeneb fil-magħsra barra l-belt, u mill-magħsra ħareġ demm hekk li laħaq sal-ħadid tal-ilġiem taż-żwiemel f’wesgħa ta’ elf u sitt mitt stadju.